ADផ្ទាំងផ្សព្វផ្សាយពាណិជ្ជកម្ម

ក្រុមអាជីវករផ្សារគគីរឆេះដុំរឿងគំនរសំរាម គ្មានអ្នកទទួលខុសត្រូវ

5 ឆ្នាំ មុន

កណ្តាល
០៣ ខែ តុលា ឆ្នាំ ២០១៨ ម៉ោង ១៨:៥៤

ខេត្តកណ្ដាល ៖ ប្រជាពលរដ្ឋ និងក្រុមអាជីវករលក់ដូរនៅក្នុងផ្សារគគីរ ឃុំគគីរ ស្រុកកៀនស្វាយ ខេត្តកណ្តាល បាននាំគ្នាធ្វើការរិះគន់ទៅលើអ្នកគ្រប់គ្រងផ្សារថា ដឹងតែពីដើរយកលុយផាស៊ីពីពួកគាត់ រីឯសំរាមយកមកគរចោលពាសពេញផ្លូវដើរចេញចូលក្នុងផ្សារ និងនៅក្បែររបងតូបរបស់ពួកគាត់រាប់ខែ ទុកឲ្យរុយរោមរហូតមានដង្កូវ ជះក្លិនស្អុយអសោចសាយភាយពេញក្នុងផ្សារធ្វើឲ្យពួកគាត់មានការ ព្រួយបារម្ភយ៉ាងខ្លាំងទៅលើបញ្ហាសុខភាព។ ក្រុមអាជីវករបានលើកឡើងប្រហាក់ប្រហែលគ្នាថា ពួកម្នាក់ៗបានជួលតូបក្នុងមួយខែៗតម្លៃជាង១០ម៉ឺនទៅ២០ម៉ឺនរៀល ហើយនៅបង់ទៅឲ្យផាស៊ី អនាម័យសរុបក្នុងមួយថ្ងៃ៤០០រៀល, ៦០០រៀល, ៧០០រៀល រហូតដល់២.០០០រៀលថែមទៀត។

ប៉ុន្តែមិនដឹងជាយ៉ាងម៉េចបានជាអ្នកគ្រប់គ្រងផ្សារគគីរ លោក អ៊ិន យ៉ុម ប្រធានផ្សារមិនអើពើពីរឿង ប្រមូលសំរាមសោះឡើយ។ ដោយទុកចោលឡើងគរដូចភ្នំមានដង្កូវចង់ប៉ុនៗកូនដៃ ពេញតូបរបស់ ពួកគាត់ និងជះក្លិនស្អុយឆួលពេញច្រមុះ ពេលហូបបាយម្តងៗរត់ទៅហូបខាងក្រៅផ្សារទើបហូបចូល។ បញ្ហាក្លិនស្អុយសំរាមនេះមិនត្រឹមតែនាំឲ្យប៉ះពាល់ដល់សុខភាពរបស់ពួកគាត់មានការឈឺថ្កាត់ប៉ុណ្ណោះទេ ថែមទាំងធ្វើឲ្យពួកគាត់ជាអាជីវករជួបការលំបាកពីបញ្ហាសេដ្ឋកិច្ចគ្រួសារទៀតផង។ ដោយសារគ្មានភ្ញៀវ ចូលមកទិញអីវ៉ាន់ ធ្វើមុខធ្វើសក់ ហើយខ្លះគ្រាន់តែដើរចូលមកធុំក្លិនស្អុយរត់ចេញទៅវិញក៏មានដែរ ធ្វើឲ្យពួកគាត់ខែខ្លះរកចំណូលមិនបានចូលលុយផ្ទះបង់ឲ្យតូបក៏មានដែរ។

រីឯក្រុមអ្នកដើរប្រមូលលុយ ផាស៊ី ពេលដែលពួកគាត់សួរថា សំរាមគរស្អុយរលួយមានដង្កូវវារចូលផ្ទះខ្ញុំនៅយកលុយផាសស៊ីទៀត បែរជាក្រុមអ្នកយកផាស៊ីទាំងនោះឆ្លើយថា ចង់ស្អុយដូចអាចម៍ ឬដេកលើអាចម៍ក៏ពួកគេមិនខ្វល់ដែរ ដឹងតែពីយកលុយ។ អាជីវករបន្តថា ការដែលលោកប្រធានផ្សារឈ្មោះ អ៊ិន យ៉ុម ទុកសំរាមចោលឡើងគរ ដូចភ្នំ ក្បែរតូបរបស់ពួកគាត់រាប់ខែមកហើយនេះ ប្រហែលជាគាត់អាងថាជិតដល់អាណត្តិ ហើយមើលទៅ។ ហើយក្រៅពីគំនរសំរាមលោកប្រធានផ្សារមុខដឹងតែពីលុយនេះ ថែមទាំងបណ្តែតបណ្តោយឲ្យអ្នកលក់ទំនិញអីវ៉ាន់គ្រឿងទេស និងស្បែកជើងបន្លែផ្លែឈើតយ៉ាប ដាក់តាំងលក់ពាសពេញផ្លូវមួយខ្សែជាប់ជ្រុងផ្សារខាងកើតយ៉ាងណែនតាន់តាប់រកតែផ្លូវដើរចេញចូលស្ទើរតែមិនរួច។

មិនតែប៉ុណ្ណោះលោកប្រធានផ្សារគគីរនេះថែមទាំងយកបរិវេណសាលាស្រុកកៀនស្វាយ ធ្វើជាកន្លែងកឹបសំបុត្រផ្ញើរកង់ម៉ូតូរថយន្តយកលុយដែលនាំឲ្យបាត់បង់សោភ័ណភាពសាលាស្រុកដែលជាកន្លែងសម្រាប់បម្រើសេវាសាធារណៈទៀតផង។ និងថែមទាំងបណ្តែតបណ្តោយឲ្យរថយន្តម៉ូតូ រ៉ឺម៉កគ្រប់ប្រភេទចតយ៉ាងអនាធិបតេយ្យតាមដងផ្លូវជាតិលេខ១ ត្រង់ចំណុចខាងមុខផ្សារនាំឲ្យបាត់បង់ សណ្តាប់ធ្នាប់លើដងផ្លូវសាធារណៈបង្កការកកស្ទះចរាចរណ៍ដល់អ្នកធ្វើដំណើរថែមទៀតផង។ ក្រុមអាជីវករក៏សូមសំណូមពរដល់អាជ្ញាធរស្រុក ខេត្តជាពិសេសឯកឧត្តមបណ្ឌិត ម៉ៅ ភិរុណ មេត្តាជួយដោះស្រាយសម្របសម្រួលភាពរញ៉េរញ៉ៃគ្មានសណ្តាប់ធ្នាប់នៅក្នុងផ្សារគគីរនេះផង។

ពិសេសបញ្ហាអនាម័យសំរាមស្អុយរលួយហូរចូលទឹកស្ទឹងធ្វើឲ្យពលរដ្ធមិនបាច់ថាយកប្រើប្រាស់មុជផឹក ឬដាំស្លនោះទេ សូម្បីតែបូមស្រោចស្រពផលដំណាំមិនកើតផង។ ពិសេសចំណុចនេះគឺជាកំពង់ដ ចម្លងសិស្ស សាលាតូចៗពីកោះប្រាក់មករៀននៅគគីរទៀតផង។ ហើយបញ្ហានេះពួកគាត់ក៏ធ្លាប់បាន លើកឡើងនៅក្នុងវេទិការសាលាស្រុករួចហើយដែរតែហាក់បីដូចជាគ្មានទទួលបានលទ្ធផលអ្វីសោះ៕