ប្រទេសរុស្ស៊ី-ស៊ីរី ៖ រដ្ឋមន្ត្រីការពារប្រទេសរុស្ស៊ីលោកស័រហ្គេយ ឆយហ្គូ កាលពីថ្ងៃទី២តុលា បានរាយការណ៍ប្រាប់ប្រធានាធិបតីលោកវ្ល៉ាឌីមៀរ ពូទីនថា រុស្ស៊ីបានបង្ហើយការផ្ដល់ប្រព័ន្ធមីស៊ីលការពារអាកាស S-300 ដល់ស៊ីរី។ លោកថា ការផ្ដល់នោះបានបង្ហើយ១ថ្ងៃមុននេះ។
ការផ្ដល់ប្រព័ន្ធការពារអាកាសនេះដល់ស៊ីរី ទោះមានការប្រឆាំងជំទាស់របស់អ៊ីស្រាអែលនិងអាមេរិកក្ដី ត្រូវបានធ្វើក្រោយការបាញ់ធ្លាក់យន្តហោះស៊ើបការណ៍រុស្ស៊ី១គ្រឿងនៅជិតខេត្ត LATTAQUIE ស៊ីរី។យន្តហោះ IL-20 នោះ ដែលមានទាហានរុស្ស៊ីជិះ១៥នាក់ ហើយស្លាប់ទាំងអស់ រងការបាញ់ប្រហារច្រឡំដោយកងការពារអាកាសស៊ីរី តែក្រុងមូស្គូ ទម្លាក់ការទទួលខុសត្រូវលើកងយន្តហោះអ៊ីស្រាអែល ដែលធ្វើអន្តរាគមន៍ក្នុងពេលតែមួយក្នុងតំបន់នោះ។
រដ្ឋាភិបាលអ៊ីស្រាអែលសង្ស័យថា មីស៊ីល S-300 កម្រិតសមត្ថភាពកងយន្តហោះរបស់ខ្លួន ក្នុងការប្រឆាំងនឹងការផ្ទេរគ្រឿងសព្វាវុធរបស់អ៊ីរ៉ង់ឲ្យដល់ពួកហេសប៊ុលឡាហ៍លីបង់។
រដ្ឋមន្ត្រីអ៊ីស្រាអែលមួយរូបលោក NAFTALI BENNETI បានព្រមាននាថ្ងៃទី២ តុលាថា យុទ្ធសាស្ត្ររបស់យើងទាក់ទិននឹងអ៊ីរ៉ង់ពុំមានការផ្លាស់ប្ដូរឡើយ។ យើងនឹងមិនអនុញ្ញាតឲ្យអ៊ីរ៉ង់បើករណសិរ្សទី៣ មួយប្រឆាំងយើងឡើយ។ យើងនឹងចាត់វិធានការប្រឆាំងតបនានា។
នៅក្រុងវ៉ាស៊ិនតោនអ្នកនាំពាក្យម្នាក់របស់ក្រសួងការបរទេសអាមេរិកនិយាយថា ខ្លួនពុំទាន់អាចអះអាងពីព័ត៌មានដែលថាបណ្ដាមីស៊ីលS-300ត្រូវបានផ្ដល់ដល់ដៃស៊ីរីរួចរាល់ទេ។ អ្នកនាំពាក្យរូបនេះលោកស្រី HEATHER NAUERT ក្នុងសន្និសីទសារព័ត៌មានមួយនិយាយថា ខ្ញុំសង្ឍឹមដែលរឿងនោះពុំមែនជាការពិត។បើដូច្នេះមែននោះវានឹងបង្កើនកាន់តែខ្លាំងការព្រួយបារម្ភនិងបញ្ហានានានៅស៊ីរី។
រដ្ឋមន្ត្រីការពារប្រទេសរុស្ស៊ីបញ្ជាក់ថា ក្រុងមូស្គូទើបបង្ហើយការផ្ដល់ប្រព័ន្ធមីស៊ីលដី-អាកាស S-300 ដល់ស៊ីរី ហើយក៏ផ្ដល់ដល់ប្រទេសនេះនូវឧបករណ៍យោធា៤៩មុខទៀត ព្រមទាំងពង្រីកប្រព័ន្ធសង្គ្រាមអេឡិត្រូនិកនៅស៊ីរីផងដែរ។ ពួកអ្នកឯកទេសស៊ីរីនឹងទទួលការបង្ហាត់បង្រៀនឲ្យចេះប្រើប្រព័ន្ធS-300រយៈពេល៣ខែ៕ វីដេអូដកស្រង់ចេញពី ៖ Sputnik France
ចែករំលែកព័តមាននេះ