ខេត្តប៉ៃលិន ៖ ម្ចាស់សិប្បកម្មច្នៃត្បូងមួយរូបនៅភូមិបឌិននៀវ សង្កាត់ប៉ៃលិន ក្រុងប៉ៃលិនបាននិយាយថា របរមួយនេះអង្គុយផ្ចឹតផ្ចង់ដោយយកចិត្តទុកដាក់បំផុត ដើម្បីច្នៃគ្រាប់ត្បូងដែលល្អទៅតាមតម្រូវការចិត្តភ្ញៀវ ។ ថ្វីដ្បិតតែវាជាការងារពិបាក តែអាចរកប្រាក់ចំណូលបានសមរម្យជារៀងរាល់ថ្ងៃ…
ខេត្តប៉ៃលិន ៖ ម្ចាស់សិប្បកម្មច្នៃត្បូងមួយរូបនៅភូមិបឌិននៀវ សង្កាត់ប៉ៃលិន ក្រុងប៉ៃលិនបាននិយាយថា របរមួយនេះអង្គុយផ្ចឹតផ្ចង់ដោយយកចិត្តទុកដាក់បំផុត ដើម្បីច្នៃគ្រាប់ត្បូងដែលល្អទៅតាមតម្រូវការចិត្តភ្ញៀវ ។ ថ្វីដ្បិតតែវាជាការងារពិបាក តែអាចរកប្រាក់ចំណូលបានសមរម្យជារៀងរាល់ថ្ងៃ ។
ម្ចាស់សិប្បកម្មច្នៃត្បូងរូបនេះ ត្រូវបានគេស្គាល់ថាឈ្មោះហាក់ បាននិយាយថា ដំបូងឡើយ លោកក៏ជាកូនជាងស៊ីឈ្នួលច្នៃត្បូងឲ្យគេជាធម្មតាដែរ ។ ក្រោយពីយល់ច្បាស់ពីការងារនេះ ក៏រកដើមទុនបន្ដិចបន្ដួចបើកកន្លែងសិប្បកម្មច្នៃត្បូងដោយខ្លួនឯង ។ លោកបញ្ជាក់ថា ៖« មុខរបរនេះវាពិបាកបន្ដិច តែរកបានប្រាក់ចំណូលខ្ពស់សមរម្យជាប្រចាំថ្ងៃ ។ ចំណែកកូនជាងវិញក្នុង១ថ្ងៃអាចរកប្រាក់បានពី៧ទៅ១០ម៉ឺនរៀលឯណោះ បើធៀបនឹងទៅធ្វើការជាកម្មករសំណង់ ឬដកដំឡូងឲ្យគេ គឺខ្ពស់ជាងឆ្ងាយណាស់ »។
លោកបន្ដថា បច្ចុប្បន្ននេះ លោកមានកូនជាងពី១០ទៅ១២នាក់ មកពីតាមបណ្តាខេត្តផ្សេងៗដូចជា ខេត្តតាកែវ កំពង់ចាម ព្រៃវែងកំពង់ធំ និងខេត្តក្រចេះជាដើម ហើយកូនជាងច្នៃត្បូងទាំងអស់នេះអត់មានប្រាក់ខែទេ គឺគិតកម្រៃជាភាគរយជាមួយគាត់ មានន័យថា បើពួកគាត់ធ្វើបានច្រើន លុយក៏បានច្រើនដែរ ។ លោកថា ៖« កាលពីខ្ញុំនៅជាកូនជាងគេ អាចរកប្រាក់បានតែ៣ទៅ៥ម៉ឺនរៀលប៉ុណ្ណោះក្នុងមួយថ្ងៃ ប៉ុន្តែពេលនេះក្រុមជាងរបស់ខ្ញុំ អាចរកប្រាក់បានចាប់ពី៧ដល់១០ម៉ឺនរៀល ក្នុងមួយថ្ងៃឯណោះ »។ លោកបន្ថែមថា សព្វថ្ងៃនេះ ត្បូងដែលយកមកច្នៃនៅសិប្បកម្មរបស់លោក ជាប្រភេទត្បូងធម្មជាតិ មានការប្រេះស្រាំបន្តិចបន្តួច ហើយក៏មានត្បូងល្អដែរដែលអតិថិជនយកមកច្នៃទៅតាមការចង់បានរបស់ពួកគេ ។
លោកបញ្ជាក់ថា ៖« ការងារច្នៃត្បូងនេះ មានអនាគតល្អណាស់ ហើយកូនជាងដែលមករៀនជាមួយខ្ញុំ ប្រសិនជាចេះជំនាញនេះច្បាស់អាចបើកខ្លួនឯង ឬនៅធ្វើជាមួយខ្ញុំក៏បាន »។
លោក បាន ពិសិទ្ធ ជាអ្នកច្នៃត្បូងជាយូរឆ្នាំមកហើយបានឲ្យដឹងថា បើនិយាយពីប្រាក់ឈ្នួលវិញ គឺអាចទទួលយកបាន ព្រោះកន្លងមកការងារនេះ បានធ្វើឲ្យលោកអាចដោះស្រាយជីវភាពប្រចាំថ្ងៃបានយ៉ាងល្អប្រសើរ ។ លោកបន្តថា ៖« ការងារច្នៃត្បូងមានការលំបាកបន្ដិចដោយត្រូវចំណាយពេលច្រើនម៉ោង តែប្រាក់ក៏បានច្រើនដែរ ។ ដូច្នេះការចំណាយពេលវេលា និងកម្លាំងច្រើន ប៉ុន្តែប្រាក់ដែលបានមកក៏ស័ក្តិសមនឹងកម្លាំងញើសឈាមនេះដែរ »។
ជាងច្នៃត្បូងម្នាក់ឈ្មោះវណ្ណា មកពីខេត្តតាកែវ បានឲ្យដឹងដែរថា លោកមកធ្វើជាជាងច្នៃត្បូងនៅទីនេះរយៈពេល១៨ឆ្នាំហើយ ដោយស៊ីភាគរយ ក្នុងមួយថ្ងៃអាចរកបាន៧ទៅ៨ម៉ឺនរៀល ។ លោកថា ៖« ការងារនេះ ពិបាកបន្តិច ប៉ុន្តែវាអាចរកប្រាក់បានច្រើនសម្រាប់ដោះស្រាយជីវភាពប្រចាំថ្ងៃ »។
សូមបញ្ជាក់ថា បច្ចុប្បន្ននេះនៅខេត្តប៉ៃលិនមិនសូវមានត្បូងច្រើនដូចកាលពីសម័យមុនទេ និងសល់តែត្បូងតូចៗប៉ុណ្ណោះ ហេតុនេះហើយបានជាពិបាកច្នៃទៅតាមម៉ូដដែលភ្ញៀវត្រូវការ។ ចំណែកត្បូងដែលមានតម្លៃថ្លៃជាងគេនោះគឺត្បូងទទឹម(ពណ៌ក្រហម) និងត្បូងកណ្តៀង (ពណ៌ខៀវ) ៕
ចែករំលែកព័តមាននេះ