រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោបានធ្វើការចាប់ខ្លួនអ្នកប្រើប្រាស់គ្រឿងញៀនបានចំនួន៧នាក់ និងដកហូតបានថ្នាំញៀនមួយចំនួនរួមទាំងវត្ថុតាងផ្សេងៗទៀតផងដែរ ។ ប្រតិបត្តិការនោះបានធ្វើឡើងកាលពីវេលាម៉ោង៧និង៣០នាទីយប់ថ្ងៃទី០១ ខែតុលា ឆ្នាំ២០១៨ នៅតាមផ្លូវជាតិលេខ៣ ត្រង់ចំណុចវត្តស្លែង…
រាជធានីភ្នំពេញ ៖ កម្លាំងគណៈបញ្ជាការឯកភាពខណ្ឌដង្កោបានធ្វើការចាប់ខ្លួនអ្នកប្រើប្រាស់គ្រឿងញៀនបានចំនួន៧នាក់ និងដកហូតបានថ្នាំញៀនមួយចំនួនរួមទាំងវត្ថុតាងផ្សេងៗទៀតផងដែរ ។
ប្រតិបត្តិការនោះបានធ្វើឡើងកាលពីវេលាម៉ោង៧និង៣០នាទីយប់ថ្ងៃទី០១ ខែតុលា ឆ្នាំ២០១៨ នៅតាមផ្លូវជាតិលេខ៣ ត្រង់ចំណុចវត្តស្លែង ស្ថិតនៅក្នុងភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ។
ជនសង្ស័យដែលត្រូវសមត្ថកិច្ចឃាត់ខ្លួននោះមានទី១- ឈ្មោះ ប្រុស គឹមតុង អាយុ១៨ឆ្នាំ ជនជាតិខ្មែរ មុខរបរកម្មករធ្វើសាច់ក្រក ស្នាក់នៅផ្ទះធ្វើសាច់ក្រក ក្នុងភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ។ ទី២-ឈ្មោះ ចយ សាមៀន អាយុ១៨ឆ្នាំ ជនជាតិខ្មែរ មុខរបរកម្មករធ្វើសាច់ក្រក ស្នាក់នៅជាមួយគ្នា អ្នកទាំង២នាក់នេះមានថ្នាំញៀន១កញ្ចប់ថង់តូច នៅជាប់ខ្លួន ។ ៣- ឈ្មោះ ខាត់ សូរិយា អាយុ២១ឆ្នាំ ជនជាតិខ្មែរ មុខរបរកម្មករសំណង់ ទីលំនៅភូមិពងទឹក សង្កាត់ពងទឹក ខណ្ឌដង្កោ រាជធានីភ្នំពេញ ។
ជននេះមានថ្នាំញៀនចំនួន០២កញ្ចប់តូច,ថង់សម្រាប់ច្រកគ្រឿងញៀនមួយចំនួន ,ម៉ូតូ១គ្រឿងម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខកណ្តាល 1J -7509 មានលេខតួ និងលេខម៉ាស៊ីន 8160676 ។ ទី៤- ឈ្មោះ ឃឹម វល័ក្ខ អាយុ១៨ឆ្នាំ ជនជាតិខ្មែរ មុខរបរជាងជួសជុលរថយន្ត ស្នាក់នៅក្នុងឃ្លាំង ភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ទី៥- ឈ្មោះ ផាត ផាន់ អាយុ១៨ឆ្នាំ ជនជាតិខ្មែរ មុខរបរជាងជួសជុលរថយន្ត ស្នាក់នៅក្នុងឃ្លាំង ភូមិវត្តស្លែង សង្កាត់ពងទឹក ខណ្ឌដង្កោ រាជធានីភ្នំពេញ ។
សមត្ថកិច្ចឆែករកឃើញថ្នាំញៀនចំនួន០៣កញ្ចប់តូច, ម៉ូតូ០១គ្រឿង ម៉ាកសេ១០០កូរេ ពណ៌ក្រហម ពាក់ស្លាកលេខភ្នំពេញ 1CE -5015 ។ ដោយឡែក២នាក់ទៀតមិនទាន់ស្គាល់ឈ្មោះនៅឡើយ ។
តាមប្រភពព័ត៌មានបានឲ្យដឹងថា នៅមុនពេលកើតហេតុកម្លាំងគណៈបញ្ជាការឯកភាពខណ្ឌដង្កោបានដាក់កម្លាំងត្រួតពិនិត្យអាវុធជាតិផ្ទុះនៅលើកំណាត់ផ្លូវជាតិលេខ៣ ត្រង់ចំណុចមុខវត្តស្លែង ស្ថិតនៅក្នុងភូមិវត្តស្លែង សង្កាត់ពងទឹក ខណ្ឌដង្កោ ។ ខណៈនោះជនសង្ស័យខាងលើបានធ្វើដំណើរឆ្លងកាត់ ហើយកម្លាំងបានឃាត់ត្រួតពិនិត្យបានប្រទះឃើញគ្រឿងញៀននៅជាប់ខ្លួនទើបចាប់ខ្លួននាំទៅសួរនាំ និងចាត់ការតាមច្បាប់តែម្ដង ៕
ចែករំលែកព័តមាននេះ