ខេត្តព្រះវិហារ ៖ នាឱកាសបុណ្យភ្ជុំបិណ្ឌនេះ ដើម្បីធានាបាននូវសុវត្ថិភាពចំណីអាហារ និងសម្ភារប្រើប្រាស់នៅតាមទីផ្សារ នៅទូទាំងខេត្តព្រះវិហារ អភិបាលខេត្តព្រះវិហារបានជម្រុញឲ្យមន្ត្រីជំនាញសាខាកាំកុងត្រូល ខេត្តព្រះវិហារត្រូវចុះមកត្រួតពិនិត្យ និងណែនាំដល់អាជីវករលក់ដូរចំណីអាហារ និងសម្ភារប្រើប្រាស់…
ខេត្តព្រះវិហារ ៖ នាឱកាសបុណ្យភ្ជុំបិណ្ឌនេះ ដើម្បីធានាបាននូវសុវត្ថិភាពចំណីអាហារ និងសម្ភារប្រើប្រាស់នៅតាមទីផ្សារ នៅទូទាំងខេត្តព្រះវិហារ អភិបាលខេត្តព្រះវិហារបានជម្រុញឲ្យមន្ត្រីជំនាញសាខាកាំកុងត្រូល ខេត្តព្រះវិហារត្រូវចុះមកត្រួតពិនិត្យ និងណែនាំដល់អាជីវករលក់ដូរចំណីអាហារ និងសម្ភារប្រើប្រាស់ នៅតាមទីផ្សារ ក្នុងខេត្តព្រះវិហារឲ្យបានហ្មត់ចត់ ។
ថ្លែងប្រាប់អ្នកសារព័ត៌មានតាមទូរស័ព្ទ លោកអ៊ុន ចាន់ដា អភិបាលខេត្តព្រះវិហារបានជំរុញឲ្យអាជ្ញាធរ និងមន្ត្រីជំនាញពាក់ព័ន្ធ ជាពិសេសជំនាញកាំកុងត្រូលប្រចាំខេត្តព្រះវិហារត្រូវតែចុះធ្វើការត្រួតពិនិត្យណែនាំដល់អាជីវករទាំងអស់ដែលកំពុងលក់ដូរចំណីអាហារក៏ដូចជា ទំនិញគ្រប់ប្រភេទ នៅតាមបណ្តាផ្សារនានា និងហាងលក់ទំនិញផ្សេងឲ្យពួកគាត់យល់ដឹងពីផលិតផលដែលមានគុណភាពឲ្យបានច្បាស់លាស់ ចៀសវាងការលក់ដូរទំនិញខូចគុណភាព ឬហួសកាលបរិច្ឆេទប្រើប្រាស់ ធ្វើឲ្យប៉ះពាល់ដល់សុខភាពអ្នកប្រើប្រាស់ទូទៅ ព្រោះពេលនេះជាឱកាសបុណ្យភ្ជុំបិណ្ឌប្រពៃណីជាតិខ្មែរនេះផង ។
លោកអភិបាលខេត្តបន្តថា ការធ្វើបែបនេះ ដើម្បីរក្សាបាននូវសុខសុវត្ថិភាពនូវចំណីអាហាររបស់ប្រជាជន មន្ត្រីជំនាញត្រូវតែយកចិត្តទុកដាក់ខ្ពស់ ក្នុងការត្រួតពិនិត្យទៅលើចំណីអាហារដែលដាក់លក់នៅលើទីផ្សារ និងទំនិញដែលហួសកាលបរិច្ឆេទប្រើប្រាស់ឲ្យបានញឹកញាប់ ព្រោះប្រសិនបើចំណីអាហារដែលមានផ្ទុកទៅដោយសារធាតុគីមី ឬទំនិញខូចគុណភាពនោះ វា បណ្តាលឲ្យអ្នកទទួលទាន និងអ្នកប្រើប្រាស់ជួបបញ្ហាប៉ះពាល់ដល់សុខភាព ។
តែទោះជាបែបនេះក្តីលោក ដួង មុន្នី ប្រធានសាខាកាំកុងត្រូលខេត្តព្រះវិហារបានអះអាងថា លោក និងមន្ត្រីរបស់លោកផ្ទាល់បានចុះធ្វើការត្រួតពិនិត្យ និងណែនាំដល់អាជីវករផ្សារក្នុងខេត្តព្រះវិហារជារឿយៗ នឹងបានណែនាំឲ្យអាជីវករទាំងអស់ត្រូវតែគោរពទៅតាមគោលការណែនាំរបស់មន្ត្រីជំនាញដោយចៀសវាងការលក់ដូរចំណីអាហារក៏ដូចជា ទំនិញខូចគុណភាព ឬហួសកាលបរិច្ឆេទជាដាច់ខាត ។
លោកថា ប្រសិនបើរកឃើញអាជីវករណាដែលលក់ដូរទំនិញ ឬចំណីអាហារដែលមានផ្ទុកដោយសារធាតុគីមី ឬខូចគុណភាព មន្ត្រីជំនាញសាខាកាំកុងត្រូលនឹងប្រមូលយកធ្វើការកម្ទេ ចចោលភ្លាម និងឲ្យអាជីវករនោះធ្វើកិច្ចសន្យាបញ្ឈប់ការលក់ទំនិញខូចគុណភាពបន្តទៀត តែប្រសិនបើគ្មានការរៀងចាលទេនោះនឹងត្រូវទទួលទោសតាមផ្លូវច្បាប់ជាធរមាន ។
ទន្ទឹមនេះដែរលោកថា បច្ចុប្បន្ននេះប្រជាពលរដ្ឋក៏ដូចជា អាជីវករដែលរស់នៅក្នុងខេត្តព្រះវិហារមានការយល់ដឹងច្រើនលើសុវត្ថិភាព ចំណីអាហារជាប្រចាំថ្ងៃ តែទោះជាបែបនេះក្តី លោកថា ជំនាញកាំកុងត្រូលនឹងរៀបចំកម្មវិធីបង្រៀន និងណែនាំដល់អាជីវករទាំងអស់ពីផលប៉ះពាល់ និងផលប្រយោជន៍នៃសុវត្ថិភាពចំណីអាហារ ។ លោកថា ការធ្វើបែបនេះអាចឲ្យអាជីវករក៏ដូចជា ប្រជាជនទាំងអស់មានការយល់ដឹងច្រើន ពីគុណប្រយោជន៍នៃសុវត្ថិភាពចំណីអាហារ ។
លោក សេង ប៊ុនលី ជាប្រជាពលរដ្ឋរស់នៅក្រុងព្រះវិហារបានលើកឡើងថា បច្ចុប្បន្ននេះ បន្លែ ផ្លែឈើ និងសាច់សត្វជាច្រើនទៀត ដែលដាក់លក់នៅតាមទីផ្សារ បានហូរចូលមកពីតាមបណ្តាខេត្តផ្សេងៗ ដោយមិនដឹងថា ប្រភេទ ទំនិញទាំងអស់នោះ មានសុវត្ថិភាពនោះទេ និងអាចមានផ្ទុកនូវសារធាតុគីមី ធ្វើឲ្យខូចសុខភាពអ្នកបរិភោគ ។ តែទោះជាយ៉ាងនេះក្តី លោកក៏បានសម្តែងនូវការរីករាយយ៉ាងខ្លាំង នៅពេលដែលមន្ត្រីជំនាញ ពិសោធន៍ សាខាកាំកុងត្រូលខេត្តព្រះវិហារ មានវិធានការក្នុងការចុះត្រួតពិនិត្យទៅលើចំណីអាហារនៅតាមទីផ្សារ ព្រោះអាចផ្តល់ផល ប្រយោជន៍ច្រើនសម្រាប់ប្រជាជនទាំងអស់ដែលទិញចំណីអាហារពីផ្សារ មកបរិភោគ ឬយកមកចម្អិនផ្សេងៗ ដោយធានាបាននូវគុណភាពអនាម័យ និងសុវត្ថិភាព ៕
ចែករំលែកព័តមាននេះ