រាជធានីភ្នំពេញ ៖ លោក ពេជ្រ វិជ្ជាធរ ប្រធានក្រុមប្រឹក្សាជំនុំជម្រះសាលាដំបូងរាជធានីភ្នំពេញ កាលរសៀលថ្ងៃទី២ តុលា បានប្រកាសសាលក្រមសម្រេចផ្ដន្ទាទោសលើសំណុំរឿងឧកញ៉ា ស៊ី ឡាឡយ (ស្លាប់នៅជាប់ពន្ធនាគារ) និងខ្មែរកាត់ឡាវម្នាក់ ដែលជាអ្នកដឹកជញ្ជូនគ្រឿងញៀនជាង ៥៤គីឡូក្រាម ពីឡាវប្រទេស ក្នុងគោលបំណងចូលមកលក់ និងចែកចាយលើទីផ្សារងងឹត ក្នុងព្រះជាណាចក្រកម្ពុជា ដាក់ពន្ធនាគារក្នុងម្នាក់អស់មួយជីវិត ក្រោមការចោទប្រកាន់ពីបទដឹកជញ្ជូន រក្សាទុក និងជួញដូរសារធាតុញៀនដោយខុសច្បាប់ តាមមាត្រា៤០ នៃច្បាប់ប្រឆាំងគ្រឿងញៀនកម្ពុជា។
រីឯជនជាប់ចោទឧកញ៉ា ស៊ី ឡាឡយ ដែលស្លាប់នៅក្នុងមន្ទីរពេទ្យ ខណៈពេលឃុំខ្លួនបណ្ដោះអាសន្ន ត្រូវបានរំលត់នៅបណ្ដឹងអាជ្ញា។ អតីតឧកញ៉ា ស៊ី ឡាឡយ ជាម្ចាស់គ្រឿងញៀនជាង៥៤គីឡូក្រាម ដែលកំពុងជាប់ការស៊ើបអង្កេតនៅក្នុងពន្ធនាគារព្រៃស បានទទួលមរណៈភាពកាលពីល្ងាចថ្ងៃទី២២ សីហា ២០១៨ នៅមន្ទីរពេទ្យមិត្តភាពខ្មែរ-សូវៀត ដោយជំងឺ។
គួរំលឹកថា កាលពីថ្ងៃទី១៨ ឧសភា ២០១៧ សមត្ថកិច្ចមន្ទីរប្រឆាំងគ្រឿងញៀនក្រសួងមហាផ្ទៃ ក្រោមការដឹកនាំដោយលោកឧត្តមសេនីយ៍ឯក ឡឹក វណ្ណៈ នាយកមន្ទីរ ក្រោមការចង្អុលបង្ហាញពីសំណាក់នាយឧត្តសេនីយ៍ ម៉ក់ ជីតូ អគ្គស្នងការរងនគរបាលជាតិ ទទួលបន្ទុកការងារប្រយុទ្ធប្រឆាំងគ្រឿងញៀន បានបង្ក្រាប និងស្ទាក់ចាប់ខ្លួនឈ្មួញគ្រឿងញៀន១ក្រុម ក្នុងនោះមានមេខ្លោងធំម្នាក់នៅក្នុងស្រុកខ្មែរគឺអតីតឧកញ៉ា ស៊ី ឡាឡយ ភេទប្រុស អាយុ៤៣ឆ្នាំ និងម្នាក់ឈ្មោះ លួន សុផា ភេទប្រុស អាយុ៣០ឆ្នាំ ជាជនជាតិខ្មែរកាត់ឡាវ ស្ថិតនៅចំណុចតាមដងផ្លូវ មួយកន្លែងចេញពីប្រទេសឡាវចូលមកខេត្តស្ទឹងត្រែង ដែលពួកគេបាន និងមានបំណងនាំគ្រឿងញៀនជាង៥៤គីឡូក្រាម នោះមកកាន់រាជធានីភ្នំពេញ។
ក្រោយចាប់ខ្លួនមេខ្លោង និងជនជាតិខ្មែរ-ឡាវម្នាក់នោះ នៅថ្ងៃទី១៦ សីហា កម្លាំងសមត្ថកិច្ចនគរបាលមន្ទីរប្រឆាំងគ្រឿងញៀនក្រសួងមហាផ្ទៃ បានសហការជាមួយនគរបាលខេត្ត ស្ទឹងត្រែង បានចុះអនុវត្តន៍ដីកាបង្គាប់ឲ្យនាំខ្លួន ចេញដោយចៅក្រមសាលាដំបូងរាជធានីភ្នំពេញ លោក ធាម ច័ន្ទពិសិដ្ឋ ចុះថ្ងៃទី២៥ កក្កដា ឈានដល់ការឃាត់ខ្លួនជនសង្ស័យម្នាក់ទៀតឈ្មោះ ថង វ៉ាង ពីបទជួញដូរ និងរក្សាទុកដោយខុសច្បាប់នូវសារធាតុញៀន ។
ជនសង្ស័យឈ្មោះ ថង វ៉ាង មានមុខរបរជានាយកក្រុមហ៊ុនដឹកជញ្ជូន ថង វ៉ាង ដែលបានជាប់ពាក់ព័ន្ធដឹកជញ្ជូនគ្រឿងញៀន ពីខេត្តស្ទឹងត្រែងយកមកឲ្យឧកញ៉ា ស៊ី ឡាឡយ នៅរាជធានីភ្នំពេញ។ ដូច្នេះសាលក្រមក្នុងសំណុំរឿងឧកញ៉ា ស៊ី ឡាឡយ ជួញដូរគ្រឿងញៀនជាង៥៤គីឡូក្រាមនេះ បានសម្រេចផ្តន្ទាទោលលើជនជាប់ចោទ២នាក់ដាក់គុកអស់មួយជីវិត ព្រោះមេខ្លោង«ស៊ី ឡាឡយ» បានស្លាប់មុនកាត់ទោសបាត់ទៅហើយ៕
ចែករំលែកព័តមាននេះ