រាជធានីភ្នំពេញ ៖ ស្ត្រីអានាថាម្នាក់ត្រូវបានប្រជាពលរដ្ឋប្រទះឃើញដេកស្លាប់នៅក្រោមដំបូលតង់មុខ ចេតិយដោយសារតែមានជំងឺប្រចាំកាយ (ផ្ទុកមេរោគអេដស៍) បន្សល់ទុកកូនកំព្រាប្រុសស្រីចំនួន៤នាក់។ ហេតុការណ៍នេះបង្កឲ្យមានការភ្ញាក់ផ្អើល កាលពីវេលាម៉ោង១ និង៣០នាទីរសៀល ថ្ងៃទី០២ ខែតុលា ឆ្នាំ២០១៨ នៅក្នុងវត្តពោធិ៍យ៉ារ៉ាម ហៅវត្តចាស់ ស្ថិតនៅភូមិ២ សង្កាត់ជ្រោយចង្វារ ខណ្ឌជ្រោយចង្វារ។
ស្ត្រីដេកស្លាប់រូបនោះឈ្មោះ ង៉ា ស្រីពេជ្រ អាយុ២៨ឆ្នាំ មានស្រុកកំណើតខេត្តកំពង់ធំ មានកូនចំនួន ៤នាក់ ក្នុងនោះមានប្រុស២នាក់ ស្រី២នាក់ ស្នាក់នៅក្រោមដំបូលតង់មុខចេតិយក្នុងវត្តខាងលើ។ តាមព័ត៌មានពី កន្លែងកើតហេតុបានឲ្យដឹងថា ស្ត្រីរងគ្រោះជាជនអនាថាផ្ទុកមេរោគអេដស៍ដែលប្តីបានស្លាប់ចោលបន្សល់ទុកកូន ចំនួន៤នាក់នៅមណ្ឌលកុមារកំព្រា។
នៅពេលថ្មីនេះ គេឃើញស្ត្រីរូបនោះធ្លាក់ខ្លួន ឈឺធ្ងន់ស្ថិតនៅក្នុងស្ថានភាព ស្គមរីងរៃ ស្បែកដណ្តប់ឆ្លឹង ហើយបានផ្លាស់ទីទៅស្នាក់នៅមុខចេតិយក្រោមដំបូលតង់ធ្លុះធ្លាយគួរឲ្យអាណោច អាធ័ម។ តាមប្រជាពលរដ្ឋបានឲ្យដឹងទៀតថា គួរឲ្យសង្វេគណាស់ពីមួយថ្ងៃទៅមួយថ្ងៃ ស្ត្រីរូបនោះរស់ដោយសាតែ អ្នកស្រុកមានការអាណិតអាសូរឲ្យបាយចំណីហូប ដើម្បីពន្យាជិវីតរួមជាមួយថ្នាំតែប៉ុណ្ណោះ។
ប្រជាពលរដ្ឋ បានឲ្យដឹងទៀតថា នៅវេលារសៀលថ្ងៃទី០២ ខែតុលានេះ អ្នកស្រុកធ្វើដំណើរឆ្លងកាត់ប្រទះឃើញស្ត្រីរូបនោះ ដេកស្តូកស្តឹងនៅសល់ដង្ហើមចុងក្រោយក៏បាននាំគ្នាជួយលើកមកដាក់ក្រោមដើមឈើក៏បានដាច់ខ្យល់ស្លាប់ ទៅហើយ។ សពត្រូវបាននគរបាលរួមជាមួយអ្នកភូមិនាំគ្នាជួយបញ្ជូនទៅកាន់ឈាបនដ្ឋានវត្តប្រជុំសារគរហៅវត្តថ្មី ដើម្បីបូជា ដោយក្រោមការជួយអាណិតអាសូរពីអ្នកស្រុក និងអង្គការសប្បុរសជនមួយចំនួន៕
https://youtu.be/BTo8iH11Y_k
ចែករំលែកព័តមាននេះ