ខេត្តព្រៃវែង ៖ ទីបំផុតកម្លាំងកងរាជអាវុធហត្ថខេត្តព្រៃវែង បានបំបែកសំណុំរឿង និងចាប់បានឃាតក ក្នុងអំពើឃាតកម្មវាយសម្លាប់ស្ត្រីចំណាស់ម្នាក់នៅស្រុកមេសាង កាលពីថ្ងៃទី១១ ខែកញ្ញាកន្លងទៅបានហើយ ឃាតកគឺជាអ្នកដែលផឹកស៊ីជាមួយស្ត្រីរងគ្រោះក្នុងយប់កើតហេតុនោះតែម្តង។ ប៉ុន្តែរឿងដែលគេឮហើយ ហួសចិត្តនោះ គឺមូលហេតុដែលជនសង្ស័យវាយសម្លាប់ស្ត្រីរងគ្រោះនោះ មិនមែនជារឿងធំដុំអ្វីនោះទេ គឺដោយសារតែជនសង្ស័យខឹងនឹងស្ត្រីរងគ្រោះពេលស្រវឹងជេរដៀលរូបគេ និងឪពុកម្តាយគេដដែលៗញយដងពេក ទើបគេទ្រាំមិនបានក៏វាយសម្លាប់តែម្តងទៅ នេះជាចម្លើយសារភាពរបស់ជនសង្ស័យ។
លោកវរៈសេនីយត្រី ផាត់ សុជោត ប្រធានមន្ទីរយុត្តិធម៌ កងរាជអាវុធហត្ថខេត្តព្រៃវែងបានឲ្យដឹងថា ជនសង្ស័យក្នុងករណីឃាតកម្មខាងលើ ឈ្មោះ ហ៊ាង គឹមហុង ភេទប្រុស អាយុ៣៧ឆ្នាំ មានទីលំនៅក្នុងភូមិព្រះអណ្តូង ឃុំស្វាយជ្រំ ស្រុកមេសាង ខេត្តព្រៃវែង ដែលត្រូវបានចាប់ឃាត់ខ្លួនកាលពីវេលាម៉ោង៥ និង១០នាទីល្ងាច ថ្ងៃទី២៨ កញ្ញា នៅចំណុចភូមិ ស្រែក្រសាំង ឃុំនិងស្រុកត្រពាំងប្រាសាទ ខេត្តឧត្តរមានជ័យ គឺបន្ទាប់ពីរត់គេចខ្លួនអស់រយៈពេល១៧ថ្ងៃ ក្រោយធ្វើសកម្មភាពសម្លាប់ស្ត្រីរងគ្រោះ។
ប្រភពដដែលនេះបានបន្តទៀតថា កាលពីយប់ថ្ងៃទី១១ កញ្ញា ២០១៨ មានករណីឃាតកម្មមួយបានកើតឡើងនៅភូមិព្រះអណ្តូង ឃុំស្វាយជ្រំ ស្រុកមេសាង ខេត្តព្រៃវែង ដោយស្ត្រីរងគ្រោះ ឈ្មោះ តិត នឿន ហៅណូក អាយុ៥៥ឆ្នាំ ត្រូវបានជនមិនស្គាល់មុខវាយសម្លាប់នៅលើគ្រែ ក្រោមផ្ទះរបស់ស្ត្រីរងគ្រោះដោយពុំដឹងពីមូលហេតុ និងបានបង្កឲ្យមានការភ្ញាក់ផ្អើលដល់ប្រជាពលរដ្ឋនៅក្បែរ កន្លែងកើតហេតុនាំគ្នារាយការណ៍មកសមត្ថកិច្ចចុះទៅត្រួតពិនិត្យទាំងព្រឹកតែម្តង។
លោក ផាត់ សុជោត បានបញ្ជាក់ផងដែរថា តាមរយៈការស្រាវជ្រាវជុំវិញកន្លែងកើតហេតុ និងតាមការបំភ្លឺពីអ្នកស្រុកជិតខាង សមត្ថកិច្ចក៏ឈានទៅដល់ការកំណត់បានមុខសញ្ញាជនល្មើសប៉ុន្តែភ្លាមៗនោះ ជនសង្ស័យបានរត់គេចខ្លួនបាត់ ទើបសមត្ថកិច្ចបន្តតាមរកអស់រយៈពេលជិតកន្លះខែ ទើបដឹងថាជនសង្ស័យកំពុងលាក់ខ្លួននៅស្រុកត្រពាំងប្រាសាទ ខេត្តឧត្តរមានជ័យ ទើបកម្លាំងអាវុធហត្ថខេត្តព្រៃវែង បានសុំដីកាពីលោកព្រះរាជអាជ្ញា និងបានសហការជាមួយ កម្លាំងអាវុធហត្ថខេត្តឧត្តរមានជ័យ ចុះឃាត់ខ្លួនជនសង្ស័យបាននៅថ្ងៃទី២៨ កញ្ញា និងដកហូតបានគ្រាប់បែកដៃ ១គ្រាប់ ព្រមទាំងទូរសព្ទ័១គ្រឿងពីក្នុងខ្លួនជនសង្ស័យ។
ក្រោយពីត្រូវចាប់ខ្លួនបាន ជនសង្ស័យត្រូវបានបញ្ជូន មកកាន់បញ្ជាការដ្ឋានកងរាជអាវុធហត្ថខេត្តព្រៃវែង កសាងសំណុំរឿងបញ្ជូនទៅកាន់សាលាដំបូងខេត្ត និងត្រូវបានចៅក្រមស៊ើបសួរ សាលាដំបូងខេត្តព្រៃវែង សម្រេចឃុំខ្លួនបណ្តោះអាសន្ននៅក្នុងពន្ធនាគារខេត្ត កាលពីព្រឹកថ្ងៃទី១ ខែតុលាកន្លងទៅនេះ៕
https://youtu.be/USbeS9Qb9E4
ចែករំលែកព័តមាននេះ