មានយុវនារីមួយចំនួនតែងតែភ្ជាប់ ជាមួយនូវឥរិយាបថមិនទៀងទាត់ក្នុងការទំនាក់ទំនងទាំងរឿងស្នេហា និងកិច្ចការផ្សេងៗ ហើយទីបំផុតការមិនទៀងទាត់របស់នាងច្រើនតែផ្ដល់លទ្ធផលមិនល្អដល់នាងអាចឱ្យនាងខាតបង់ទាំងខ្លួនប្រាណ ពេលវេលា ទ្រព្យសម្បត្ដិ និងកិត្ដិយស រហូតធ្វើឱ្យនាងសោកស្ដាយអស់មួយជីវិត ។
ដើម្បីចៀសវាងការខាតបង់ដ៏ធំធេងខាងលើ សូមសុភាពនារីទាំងឡាយធ្វើយ៉ាងណាលុបបំបាត់ចោលអត្ដរិត ទំលាប់មិនទៀងទាត់ (សាវ៉ា)ចេញពីខ្លួន ហើយប្រកាន់យកភាពស្មោះត្រង់ នឹងនវិញទើបជាការល្អ ។ ភាពនឹងនរបស់ស្ដ្រីជាសោភ័ណភាពទាក់ទាញការស្រឡាញ់ផង និងជាកំផែងស្នេហ៍រឹងមាំផង ព្រោះថាភាពនឹងនគឺមិនអាចធ្វើឱ្យបុរសប៉ាន់ស្មានអ្វីពីស្ដ្រីបានទាំងអស់…ផ្ទុយទៅវិញបែរជាធ្វើឱ្យបុរសទាំងឡាយព្យាយាមស្ទាបស្ទង់មកលើនារីនឹងនគ្មានទីបញ្ចប់ ហើយថែមទាំងគោរពទៀតផង ។
សូមសុភាពនារីកុំស្រឡាញ់បុរសនេះបន្ដិចបុរសនោះបន្ដិច ច្រានអ្នកនេះចោលចាប់យក អ្នកនោះ ដែលទង្វើនេះធ្វើឱ្យគេមើលឃើញពីភាពសាវារបស់នាងនៅលើគោកពេក ត្រូវរក្សាចិត្ដនិងសេចក្ដីស្រឡាញ់ឱ្យនឹងន ហើយពិនិត្យឱ្យច្បាស់មុននឹងសំរេចចិត្ដ ។ ដូចជាកាលបើនាងបានទទួលពាក្យសំដីពីនរណាម្នាក់ហើយ នាងគួរឈប់ទទួលពាក្យរបស់បុរសផ្សេងទៀតដែលចូលមកដណ្ដឹងនាងក្រោយគេឬអ្នកក្រោយណាម្នាក់ដាក់ពាក្យស្រឡាញ់នាង ប៉ុន្ដែនាងអាចទទួលយកបានក្នុងន័យជាមិត្ដភាព ។
មានករណីលើកលែងខ្លះដែរប្រសិនបើ មានបុរសម្នាក់ចូលមកដណ្ដឹងនាង “ក”ស្រាប់តែនាងជ្រុលមាត់មិនព្រមទទួលពាក្យរបស់បុរសនោះ លុះដល់ពេលក្រោយមកនាងនឹក ស្ដាយព្រោះគិតមិនទាន់ធ្វើឱ្យនាងព្រួយចិត្ដ រហូតស្គមរីងរៃសូមនាងរំសាយចិត្ដចោលទៅកុំប្រកាន់ចិត្ដរឹងរូសមិនទទួលកំហុសឱ្យសោះនោះ វាមិនមែនជាការល្អទេ ។ ការសារ ភាពនូវសេចក្ដីស្រឡាញ់ឬការឆ្លើយតបជារឿងប្រសើរបំផុតគ្រាន់តែថា យើងត្រូវរៀបចំរបៀបឆ្លើយឱ្យបានល្អចំណេញទាំងសងខាងតែប៉ុណ្ណោះ ។ ដើម្បីកែប្រែស្ថានការណ៍ឡើងវិញ បើនាងយល់ថានាងជ្រុលមាត់និយាយខុសនាងត្រូវទទួលកំហុសសុំទោសបុរសនោះ ទៅបុរសនោះនឹងស្រឡាញ់នាងទ្វេដងនេះ គេហៅថាមនុស្សមានប្រាជ្ញាឆ្លាតតែងមានគំនិតជ្រៅអាចរករបៀបកែប្រែការភាន់ ច្រឡំរបស់ខ្លួនបាន(ករណីនេះមិនមែនសាវាទេ)។ ឧទាហរណ៍នាង“ខ”បានទទួលពាក្យសន្យាពីបុរស(គ)មិនយូរប៉ុន្មានបុរសនោះ ត្រូវទៅឆ្ងាយពីនាងក្រោយមកនាងជួបនឹងបុរស “ឃ”ទៀត នាងក៏ជាប់ចិត្ដបុរសនេះ វិញ ។ រីឯបុរស“គ”ដែលពុំដឹងខ្លួនសោះ គិតតែសរសេរសំបុត្រឱ្យនាងរហូត (សម័យទំនើបទូរស័ព្ទ-អ៊ីម៉េល) ប៉ុន្ដែនាងមិនឆ្លើយ ឯចំណែកឈ្មោះ“ឃ”គ្មានជាប់ចិត្ដនឹងនាងឡើយ ទោះបីនាងរកផ្លូវតោងគេយ៉ាងណា ក៏ដោយ ក៏បុរសនេះមិនយកចិត្ដទុកដាក់ដល់នាងដែរ ផ្ទុយទៅវិញ បុរស “ឃ” គ្រាន់តែកួចចិត្ដលេងសើចជាមួយនាងតែប៉ុណ្ណោះ ។ យូរថ្ងៃនាង“ខ” ទ្រាន់ចិត្ដគិតត្រឡប់មករកបុរស “គ”វិញ គឺត្រឡប់មករកស្នេហាដែលនាងបោះចោលទៅហើយនោះ ជាប្រការមិនល្អទេរឿងនេះចង្អុលឱ្យឃើញថា នាងជាស្ដ្រីកាន់ចិត្ដមិនទៀង ហើយអយុត្ដិធម៌ផង ។ ប្រព្រឹត្ដដូចនាងនេះ គឺមានទោសនឹងស្នេហាមិនមូលមិត្ដ បើទុកជាបានគ្នាក៏គ្មានជោគសួស្ដីដែរ ថ្ងៃក្រោយនឹងទទួលការរិះគន់ពីបុរស “គ”ថា ជាស្ដ្រីអស់ផ្លូវ…សូមនារីទាំងឡាយខំចៀសវាងឱ្យផុតចំពោះប្រការនេះ ។
កញ្ញាទាំងឡាយកាលបើនាងមិនពេញចិត្ដនឹងបុរសណាម្នាក់នាងត្រូវរកវិធីដោះសាឱ្យបានស្អាត ដូចជាពោលពាក្យថា ស្ដាយណាស់ អ្នកយឺតពេលបន្ដិចទៅហើយ ! ស្ដាយណាស់ម៉ាក់ប៉ានាងខ្ញុំលើកខ្ញុំឱ្យទៅគេហើយ ! ស្ដាយណាស់ខ្ញុំមិនទាន់ចង់មានស្នេហាឬស្វាមីទេ ! ប៉ុន្ដែបើនាងពេញចិត្ដនឹងបុរសណាម្នាក់ ដែលមានគុណសម្បត្ដិគួរឱ្យនាងកោតសរសើរ គប្បីនាងកុំទើសទាស់នឹងសភាពក្រខ្សត់របស់គេ ហើយបើសិនជាញាតិសន្ដានក្នុងផ្ទះគេមិនពេញចិត្ដនឹងសភាពខ្វះខាតខាងទ្រព្យសម្បត្ដិនៃបុរសនោះដែរ នាងត្រូវយកសេចក្ដី ក្លាហានរបស់នាងមកដោះសាជំនួសអ្នកនោះ ហើយត្រូវចេះរៀបពាក្យនិយាយដូចម្ដេចឱ្យក្រុមគ្រួសារញាតិមិត្ដរបស់នាងស្ដាប់បានរាល់គ្នា និងព្រមទទួលស្គាល់ថា ការជ្រើសរើសរបស់នាងនេះសមរម្យហើយ…ចិត្ដនឹងននឹងនាំមកនូវអ្វីដែលប្រាកដប្រជានិងគុណវុឌ្ឍិ ៕ ដោយ យិន ពិសិដ្ឋ
ចែករំលែកព័តមាននេះ