ខេត្តមណ្ឌលគិរី ៖ ការគ្រប់គ្រងសំរាមតាមទីសាធារណៈ ជាពិសេសថង់ប្លាស្ទិក គឺជាកិច្ចការងារអាទិភាពមួយរបស់ក្រសួងបរិស្ថាន ដើម្បីគ្រប់គ្រងកាកសំណល់ដែលកំពុងបំពុលសុខភាពប្រជាពលរដ្ឋដោយសារតែការពង្រាយគ្មានសណ្តាប់ធ្នាប់។
ដើម្បីគ្រប់គ្រងបញ្ហាសំរាមនេះ រាជរដ្ឋាភិបាលតាមរយៈសំណើរបស់ក្រសួងបរិស្ថាន បានចេញអនុក្រឹត្យលេខ១១៣ សម្តៅធ្វើឱ្យប្រសើរឡើងនូវការគ្រប់គ្រងសម្រាម សំណល់រឹងនៅទីប្រជុំជនប្រកបដោយប្រសិទ្ធភាព ដើម្បីធានាបាននូវសោភ័ណភាព កិច្ចគាំពារសុខភាពសាធារណៈ ។
អាជ្ញាធរកាលពីព្រឹកថ្ងៃទី២ តុលា ២០១៨ បានប្រមូលផ្តុំគ្នាដើររើសសម្រាមនៅតាមបណ្ដោយផ្លូវជាតិលេខ៧៦ ចាប់ពីស្នាក់ការបរិស្ថានស្រុកអូររាំង រហូតដល់ស្នាក់ការស្រុកកែវសីមា ដែលមានចម្ងាយផ្លូវប្រមាណជាង៣០គីឡូម៉ែត្រ។
លោក ឌិន ប៊ុនធឿន នាយកដែនជម្រកសត្វព្រៃកែវសីមា បានទទូចឱ្យគ្រប់ភាគីទាំងអស់ដែលមានទាំងប្រជាពលរដ្ឋ ក្រុមហ៊ុនប្រមូលសម្រាម អាជ្ញាធរដែនដី អង្គសង្គមស៊ីវិល ត្រូវតែចូលរួមឱ្យបានគ្រប់ៗគ្នាដើម្បីបរិស្ថានស្អាត និងសុខមាលភាពសាធារណៈល្អ បើមិនដូច្នេះទេការគ្រប់គ្រងសម្រាម និងកាកសំណល់នឹងមិនមានប្រសិទ្ធភាពឡើយ។
អ្នកជំនាញបរិស្ថានបានស្នើឱ្យគ្រប់ភាគីពាក់ព័ន្ធបង្កើនការផ្សព្វផ្សាយសំដៅពង្រឹងការយល់ដឹងទៅដល់ប្រជាពលរដ្ឋដែលជាចំណុចសំខាន់បំផុត ព្រោះការចូលរួមរបស់ពលរដ្ឋគឺជាយន្តការគ្រប់គ្រងសម្រាមបានងាយស្រួល។
បើទោះបីជាបែបណាក៏ដោយ អាជ្ញាធរសង្ឃឹមយ៉ាងមុតមាំថា ប្រជាពលរដ្ឋ ក្រុមហ៊ុន និងគ្រប់ភាគីពាក់ព័ន្ធផ្សេងៗទៀតនឹងប្រឹងប្រែងយកអស់កម្លាំងកាយចិត្ដទាំងអស់គ្នាដើម្បីគ្រប់គ្រងកាកសំណល់ថង់ប្លាស្ទិកឱ្យមានប្រសិទ្ធភាពបំផុត៕
ចែករំលែកព័តមាននេះ