រាជធានីភ្នំពេញ ៖ បច្ចុប្បន្នការវិនិយោគ ក្នុងតំបន់សេដ្ឋកិច្ចពិសេសក្នុងប្រទេសកម្ពុជា កំពុងមានសកម្មភាពផុសផុលខ្លាំង ទាំងនៅរាជធានីភ្នំពេញ និងបណ្ដាខេត្តមួយចំនួន ដូចជាខេត្តបន្ទាយមានជ័យ ខេត្តស្វាយរៀង កោះកុង និងខេត្តព្រះសីហនុជាដើម ។ ដើម្បីឲ្យសកម្មភាពវិនិយោគក្នុងតំបន់សេដ្ឋកិច្ចពិសេសកាន់តែខ្លាំងថែមទៀតនោះ កម្ពុជាបានស្នើឲ្យភាគីថៃ ដែលជាអ្នកជិតខាង ពិចារណាលើការអភិវឌ្ឍសង្វាក់តម្លៃវិស័យឧស្សាហកម្មនៅកម្ពុជា ។
ក្នុងជំនួបរវាងរដ្ឋមន្ត្រីពាណិជ្ជកម្មកម្ពុជា និង តំណាងវិនិយោគិនថៃ កាលពីថ្ងៃទី១ តុលា ម្សិលមិញ លោក ប៉ាន សូរស័ក្តិ រដ្ឋមន្ត្រីពាណិជ្ជកម្មកម្ពុជាបានឲ្យដឹងថា ការវិនិយោគនៅកម្ពុជា វិនិយោគិនទទួលបានអត្ថប្រយោជន៍ជាច្រើន ក្នុងនោះវិនិយោគិនបរទេសមានសិទ្ធិ១០០ភាគរយ ក្នុងការកាន់កាប់ក្រុមហ៊ុនខ្លួនដែលបង្កើតនៅកម្ពុជា មានន័យថា ជនបរទេសអាចមានសិទ្ធិធ្វើអាជីវកម្មដោយមិនចាំបាច់មានភាគហ៊ុនជាមួយវិនិយោគិនកម្ពុជានោះឡើយ ខុសពីបណ្ដាប្រទេសជាច្រើនក្នុងតំបន់ ដែលត្រូវមានការចូលរួមពីវិនិយោគិនក្នុងស្រុក ។ លោកបន្ដថា ៖« ក្រៅអត្ថប្រយោជន៍នេះហើយ ទំនិញដែលផលិតចេញពីកម្ពុជា នឹងទទួលបានការអនុគ្រោះពន្ធនាំចេញទៅកាន់ប្រទេសទីបីផងដែរ ។ ជាក់ស្ដែងដូចជាបណ្ដាប្រទេសក្នុងសហគមន៍អឺរ៉ុប សហរដ្ឋអាមេរិក និងបណ្ដាប្រទេសមួយចំនួនទៀត ហើយបច្ចុប្បន្នកម្ពុជាក៏កំពុងចរចារជាមួយបណ្ដាប្រទេសធំៗ ដើម្បីស្នើសុំផ្ដល់ការអនុគ្រោះពន្ធទំនិញនាំចេញផងដែរ » ។
ដោយឡែក ចំពោះទំហំពាណិជ្ជកម្មនៃប្រទេសទាំងពីរវិញ លោករដ្ឋមន្ត្រីថ្លែងថា ៖« ដើម្បីជំរុញឲ្យសម្រេចបានក្នុងទំហំទឹកប្រាក់១៥ពាន់លានដុល្លារអាមេរិកនៅឆ្នាំ២០២០ កម្ពុជាក៏បានស្នើទៅភាគីថៃ ជាពិសេសក្រសួងសេដ្ឋកិច្ចថៃ ពន្លឿនការចុះអនុស្សរណៈលើកលែងពន្ធនៅតាមបន្ទាប់ព្រំដែន រវាងប្រទេសទាំងពីរផងដែរ »។
លោក ចាន់នីត ចាន់ឆៃណារ៉ុង ប្រធានក្រុមប្រឹក្សាធុរកិច្ចថៃ បានឲ្យដឹងដែរថា សក្ដានុពលរបស់កម្ពុជា ដែលមានតំបន់សេដ្ឋកិច្ចពិសេស គឺជាកត្តាមួយដែលជួយជំរុញកិច្ចប្រតិបត្តិការសេដ្ឋកិច្ច ពាណិជ្ជកម្មរវាងប្រទេសទាំងពីរ។ ដោយឡែក ពាក់ព័ន្ធនឹងការលើកលែងពន្ធ និងកិច្ចសម្រួលពាណិជ្ជកម្មនៅតាមព្រំដែនរវាងប្រទេសទាំងពីរ លោករំពឹងថា រដ្ឋាភិបាលថៃនិងធ្វើកិច្ចការនេះបានលឿនរហ័ស ដើម្បីឲ្យគោលដៅពាណិជ្ជកម្មរវាងប្រទេសទាំងពីរបានសម្រេចនៅក្នុងឆ្នាំ២០២០ និងឆ្នាំបន្តបន្ទាប់ទៀត ។
គួរបញ្ជាក់ កាលពីចុងត្រីមាសទី១ ឆ្នាំ ២០១៨នេះ កម្ពុជានិងថៃ បានជួបប្រជុំគណៈកម្មការចម្រុះផ្នែកពាណិជ្ជកម្មលើកទី៦ ដើម្បីពិភាក្សានិងផ្លស់ប្តូរយោបល់លើបញ្ហាប្រឈមផ្សេងៗ សំដៅបង្កើនទំហំពាណិជ្ជកម្មទ្វេភាគី ឲ្យបាន១៥ពាន់លានដុល្លារនៅឆ្នាំ២០២០ តាមការប្ដេជ្ញារបស់ប្រមុខថ្នាក់ដឹកនាំនៃប្រទេសទាំងពីរ ដែលបានសន្យាកាលពីឆ្នាំ២០១៥ ។
ដើម្បីឲ្យសម្រេចគោលដៅនេះ ប្រទេសទាំងពីរ បានយល់ព្រមលើចំណុចសំខាន់ៗចំនួន២គឺ យុទ្ធសាស្ត្រនៃកិច្ចសហប្រតិបត្តិការសេដ្ឋកិច្ចតាមបណ្ដាខេត្តនៅជាប់ព្រំដែន និង មួយទៀតគឺ អនុស្សណៈស្តីពីកិច្ចសហប្រតិបត្តិការជំរុញពាណិជ្ជកម្ម ។
យ៉ាងណាក៏ដោយ ទំហំទឹកប្រាក់១៥ពាន់លានដុល្លារអាមេរិកនៅឆ្នាំ២០២០ គេមិនទាន់ដឹងថា អាចសម្រេចបានឬយ៉ាងណានៅឡើយនោះទេ ខណៈរយៈពេល៧ខែ ដើមឆ្នាំ២០១៨នេះ ទំហំពាណិជ្ជកម្មរវាងប្រទេសទាំងពីរសម្រេចបានក្នុងទំហំទឹកប្រាក់តែជាង៤.៦០៧ពាន់លានដុល្លារអាមេរិកប៉ុណ្ណោះ ក្នុងនោះ ទំនិញថៃដែលនាំចូលមកកម្ពុជាមានទំហំទឹកប្រាក់សរុបជាង៤,១ពាន់លានដុល្លារ ខណៈកម្ពុជានាំចេញទៅថៃវិញមានចំនួនជិត៥០០លានដុល្លារអាមេរិក ៕
ចែករំលែកព័តមាននេះ