ប្រទេសកូរ៉េទាំង២ ៖ ក្រសួងការពារប្រទេសកូរ៉េខាងត្បូងឲ្យដឹងថា កងទ័ពកូរ៉េកាលពីថ្ងៃទី១តុលា ចាប់ផ្ដើមបោសសម្អាតគ្រាប់មីនតាមតំបន់សន្តិសុខរួម នៅព្រំដែនរវាងកូរ៉េទាំង២។
បណ្ដាបែបបទនៃប្រតិបត្តិការនេះស្ថិតក្នុងក្របខណ្ឌនៃវិធានការស្ដារទំនុកចិត្តគ្នា ត្រូវបានកំណត់នាឱកាសនៃការជួបគ្នាលើកទី៣ រវាងមេដឹកនាំកូរ៉េខាងជើង លោកគីមជុង អ៊ុន និងប្រធានាធិបតីកូរ៉េខាងត្បូងលោក MOON JAE IN កាលពីខែមុន នៅក្រុងព្យុងយ៉ាង។
ភាគីទាំង២បានព្រមព្រៀងគ្នាដោះគ្រាប់មីនប្រឆាំងមនុស្សចេញពីតំបន់សន្តិសុខរួម ស្ថិតនៅភូមិប៉ានមុនហ្សូម ឲ្យរួចរាល់ក្នុងរយៈពេល២០ថ្ងៃ។ កិច្ចព្រមព្រៀងក៏គ្រោងផងដែរ បំផ្លាញចោលបណ្ដាប៉ុស្តិ៍សង្កេតការណ៍ និងដកបណ្ដាគ្រឿងសព្វាវុធចេញ។
តំបន់សន្តិសុខរួមជាផ្នែកតែមួយគត់នៃតំបន់ហាមមិនឲ្យមានកងទ័ព មានបណ្ដោយ២៥០គីឡូម៉ែត្រដែលកងទ័ពកូរ៉េទាំង២ស្ថិតនៅទល់មុខគ្នា។
ប្រតិបត្តិការដោះមីន ក៏ចាប់ផ្ដើមដែរនាថ្ងៃទី១ តុលា ក្នុងខេត្ត GANGWON ភាគខាងកើតកូរ៉េខាងត្បូង ដើម្បីអាចរុករកទាហានដែលបាត់ខ្លួនក្នុងសម័យសង្គ្រាម។ បើយោងតាមពួកអ្នកជំនាញការថា គ្រាប់មីនជាង១លានគ្រាប់ត្រូវបានដាក់រាយតាមតំបន់ព្រំដែនរវាងកូរ៉េទាំង២។
ក្រុងព្យុងយ៉ាង និងក្រុងសេអ៊ូល ប្រកាសនាខែមេសា ពីចេតនារបស់ពួកគេ ប្រែក្លាយតំបន់ហាមមិនឲ្យមានកងទ័ពជានិមិត្តរូបនៃជម្លោះ ទៅជាតំបន់សន្តិភាពមួយ៕
ចែករំលែកព័តមាននេះ