ប្រទេសឥណ្ឌូណេស៊ី ៖ សាកសពយុវជនជាច្រើនសិបនាក់ត្រូវបានទាញយកចេញពីគំនរបាក់បែកនៃព្រះវិហារមួយ ដែលរងការបំផ្លាញដោយការរញ្ជួយដីខ្លាំងមួយនៅកោះសេឡែបឥណ្ឌូណេស៊ី។
ការរកឃើញសាកសពទាំងនេះធ្វើឲ្យតុល្យការអ្នកស្លាប់ដោយសារគ្រោះមហន្តរាយនោះដែលកើតមានកាលពីថ្ងៃទី២៨ កញ្ញា ជាពិសេសនៅក្រុងប៉ាលូ មានប្រជាជន៣៥០.០០០នាក់ ស្ថិតនៅឆ្នេរសមុទ្រខាងលិចនៃកោះសេឡែប ឡើងដល់១២៣៤នាក់ហើយ។ អាជ្ញាធរយល់ថា តុល្យការអាចមានខ្ពស់ថែមទៀត ខណៈ បណ្ដាអ្នកជួយសង្គ្រោះអាចចូលទៅដល់ភូមិដាច់ស្រយាលទាំងឡាយ។
កងទ័ពឥណ្ឌូណេស៊ី ដឹកនាំប្រតិបត្តិការជួយសង្គ្រោះតែក្រោយការអំពាវនាវរបស់ប្រធានាធិបតី បណ្ដាអង្គការអន្តរជាតិ ក៏បញ្ជូនកម្លាំងមកជួយ។
កាកបាទក្រហមប្រកាសនាថ្ងៃទី២ តុលាថា សាកសពមនុស្ស៣៤នាក់ ត្រូវបានកាយរកឃើញក្រោមគំនរបាក់បែកនៃព្រះវិហារគ្រឹស្តមួយ នាកណ្ដាលកោះសេឡែប។ លោកស្រី AULIA ARRIANI អ្នកនាំពាក្យកាកបាទក្រហមអះអាងថា សាកសពមនុស្ស៣៤នាក់ ត្រូវបានរកឃើញទៀត។ តាមព័ត៌មានដំបូងៗថា យុវជន៨៦នាក់ ដែលចូលរួមក្នុងការបោះជំរំសិក្សាគម្ពីរប៊ីប នៅមជ្ឈមណ្ឌលបណ្ដុះបណ្ដាលនៃព្រះវិហារ JONOOGEត្រូវបាត់ខ្លួន។
ចំណែកមជ្ឈមណ្ឌលស្រាវជ្រាវអាល្លឺម៉ងផលិតប្រព័ន្ធប្រកាសអាសន្នស៊ូណាមីផ្ដល់ឲ្យឥណ្ឌូណេស៊ីនិយាយថា ប្រព័ន្ធនោះរងការខូចខាតនាគីឡូម៉ែត្រចុងក្រោយ ដែលរលកយក្សត្រូវបោកមកដល់។ រលកយក្សស៊ូណាមីកម្ពស់ដល់ជិត៦ម៉ែត្រ វាយប្រហារលើកោះសេឡែប ក្រោយការរញ្ជួយដីកម្លាំង៧,៥រីស្ទ័រ។ ប្រជាជនជាច្រើននាក់ឆ្ងល់ថា ហេតុអីក៏ប្រព័ន្ធប្រកាសអាសន្នស៊ូណាមីមិនដើរ។
ទោះបីយ៉ាងណាអាជ្ញាធរថាប្រព័ន្ធនោះដើរ ប្រកាសពីរលកកម្ពស់៣ម៉ែត្រនៅឆ្នេរសមុទ្រភាគពាយ័ព្យនៃកោះសេឡែប ប៉ុន្តែទទួលស្គាល់ជាឧទាហរណ៍ថា បណ្ដាស៊ីរ៉ែនប្រកាសអាសន្នពុំដើរ ហើយក៏គ្មានរថយន្តប៉ូលិសណាមួយ ប្រកាសតាមប្រដាប់បំពងសំឡេង ឲ្យប្រជាជនរត់ភៀសខ្លួនចេញឱ្យទាន់ពេលដែរ។ គេក៏ទទួលស្គាល់ផងដែរថា នោះក៏មកពីបណ្ដាញគមនាគមន៍រងការបំផ្លាញដោយការរញ្ជួយដី៕
ចែករំលែកព័តមាននេះ