ខេត្តបន្ទាយមានជ័យ ៖ កុមារា២នាក់បងប្អូន លេងទឹកប្រឡាយបណ្តាលឱ្យលង់ស្លាប់ទាំង២នាក់ ខណៈឪពុកកំពុងតែភ្ជួររាស់ដីស្រែព្រោះស្រូវ ។ ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១ តុលា ២០១៨…
ខេត្តបន្ទាយមានជ័យ ៖ កុមារា២នាក់បងប្អូន លេងទឹកប្រឡាយបណ្តាលឱ្យលង់ស្លាប់ទាំង២នាក់ ខណៈឪពុកកំពុងតែភ្ជួររាស់ដីស្រែព្រោះស្រូវ ។ ហេតុការណ៍បង្កឲ្យមានការភ្ញាក់ផ្អើលនេះ បានកើតឡើងកាលពីវេលាម៉ោង៥និង៣០នាទីល្ងាចថ្ងៃទី១ តុលា ២០១៨ ត្រង់ចំណុចបឹងមាឃ ខាងត្បូងភូមិគោកបល្ល័ង្ក ឃុំគោកបល្ល័ង្ក ស្រុកមង្គលបូរី ខេត្តបន្ទាយមានជ័យ ចំងាយពីភូមិ៥០០ម៉ែត្រ ។
លោកវរសេនីយ៍ឯកស៊ិន ណារ៉ាក់ អធិការនគរបាលស្រុកមង្គលបូរី បានឲ្យដឹងថា កុមារទាំង២នាក់ខាងលើដែលស្លាប់រួមមាន កុមារាជាបង ឈ្មោះកោះ លាង ភេទប្រុស អាយុ៧ឆ្នាំ និងកុមារាជាប្អូនឈ្មោះ កោះ
ឡាង ភេទប្រុស អាយុ៤ឆ្នាំ មានឪពុកឈ្មោះ កើត នី អាយុ៣៩ឆ្នាំ ម្តាយឈ្មោះ យី ស៊ីឡុង អាយុ៣១ ឆ្នាំ រស់នៅភូមិគោកបល្ល័ង្ក ឃុំគោកបល្ល័ង្ក ស្រុកមង្គលបូរី ខេត្តបន្ទាយមានជ័យ។
លោកអធិការបានបញ្ជាក់ថា មុនពេលកើតហេតុ តាមការសាកសួរព័ត៌មានពីឪពុកបាននិយាយថា កូនប្រុសរបស់គាត់ទាំង២នាក់ បានទៅតាមគាត់ភ្ជួររាស់ដីស្រែ ដើម្បីព្រោះស្រូវ ពេលគាត់កំពុងតែភ្ជួររាស់ ភ្លេចខ្លួនមួយភ្លែត ក៏ស្រាប់តែបាត់កូនប្រុសតូចទាំង២នាក់ ដោយមិនដឹងទៅណា ហើយគាត់ក៏ដើររកមើលកូនតាមប្រឡាយ ស្រាប់តែប្រទះឃើញកូនរបស់គាត់លង់ទឹកស្លាប់ទាំង២នាក់ មិនដឹងពីពេលណានោះទេ។
ជាមួយគ្នានោះដែរ លោកអធិការបានអំពាវនាវទៅដល់អាណាព្យាបាល ក៏ដូចជាឪពុកម្តាយទាំងអស់ សូមមេត្តាមានការប្រុងប្រយ័ត្នចំពោះកូន ចៅតូចៗ កុំឲ្យមានការឆ្វេសប្រហែស ខណៈពេលនេះគឺជារដូវទឹកឡើង កុំឲ្យក្មេងលេងទឹកនាំឲ្យមានគ្រោះថ្នាក់។ បច្ចុប្បន្ន សពក្មេងប្រុស២នាក់បងប្អូនត្រូវបានឪពុកម្តាយរៀបចំធ្វើបុណ្យតាមប្រពៃណីទាំងក្តីសោកសង្រែងនិងអាឡោះអាល័យជាទីបំផុត៕
ចែករំលែកព័តមាននេះ