ខេត្តកំពង់ធំ ៖ ករណីបុរសសតិមិនគ្រប់ ហើយមិនស្គាល់អត្តសញ្ញាណម្នាក់បានដេកស្លាប់ នៅក្នុងជង្ហុកក្បែរផ្លូវជាតិលេខ០៦ ស្ថិតក្នុងភូមិជាយស្បៃ ឃុំកកោះ ស្រុកសន្ទុក ខេត្តកំពង់ធំ បង្កឲ្យមានការភ្ញាក់ផ្អើលកាលពីព្រឹកថ្ងៃទី០១…
ខេត្តកំពង់ធំ ៖ ករណីបុរសសតិមិនគ្រប់ ហើយមិនស្គាល់អត្តសញ្ញាណម្នាក់បានដេកស្លាប់ នៅក្នុងជង្ហុកក្បែរផ្លូវជាតិលេខ០៦ ស្ថិតក្នុងភូមិជាយស្បៃ ឃុំកកោះ ស្រុកសន្ទុក ខេត្តកំពង់ធំ បង្កឲ្យមានការភ្ញាក់ផ្អើលកាលពីព្រឹកថ្ងៃទី០១ ខែតុលា ឆ្នាំ២០១៨។
នគរបាលបានឲ្យដឹងថា ជនរងគ្រោះ មិនស្គាល់អត្តសញ្ញាណ ភេទប្រុស ជាមនុស្សមានសតិមិនគ្រប់ បើតាមការឲ្យដឹងពីបងប្អូនប្រជាពលរដ្ឋនិយាយថា កាលពីវេលាម៉ោង៤ល្ងាច ថ្ងៃទី៣០ ខែកញ្ញា ឆ្នាំ២០១៨ ពួកគាត់បានឃើញជនរងគ្រោះ ដើរទៅដើរមកច្រើនលើកច្រើនសារ ដោយមានកាន់ដំបងឈើមូលមួយប្រវែងប្រហែល១ម៉ែត្រកន្លះនៅនឹងដៃផង ដើរបណ្តើរវាយក្បាល ខ្លួនឯងបណ្តើរ រហូតមានស្នាមពកជាំខ្មៅនៅលើថ្ងាសខាងមុខទៀតផង ហើយបានស្រែកបណ្តើរថា ម៉ែអើយជួយផងៗ រហូតដល់យប់ពួកគាត់ក៏នាំគ្នាដេកលក់អស់ទៅ។
លុះដល់ព្រឹកថ្ងៃទី០១ ខែតុលា នេះ ក៏មានប្រជាពលរដ្ឋដែលនៅផ្ទះក្បែនោះ បានប្រទះឃើញសាកសពរបស់ជនរងគ្រោះដេកស្លាប់ផ្កាប់មុខ នៅក្នុងជង្ហុកជាប់ផ្លូវជាតិក្បែរផ្ទះរបស់គាត់ ក៏រាយការណ៍ប្រាប់សមត្ថកិច្ចតែម្ដង។ បន្ទាប់ពីទទួលបានព័ត៌មាន សមត្ថកិច្ច និងផ្នែកជំនាញបានសហការគ្នាចុះទៅពិនិត្យ និងវិភាគសន្និដ្ឋានបានថា សាកសពជនមិនស្គាល់ អត្តសញ្ញាណនេះ ពិតជាបានស្លាប់ដោយសារគាំងបេះដូងពុំមានពាក់ព័ន្ធនឹងអំពើឃាតកម្មឡើយ៕
ចែករំលែកព័តមាននេះ