ប្រទេសឥណ្ឌូណេស៊ី ៖ រណ្ដៅធំមួយត្រូវបានជីកកាលពីថ្ងៃទី១ តុលា ដើម្បីបញ្ចុះសពជនរងគ្រោះជាច្រើនរយនាក់ ដោយការរញ្ជួយដី និងស៊ូណាមី នៅកោះសេឡែប ឥណ្ឌូណេស៊ី បង្ការគ្រោះថ្នាក់នៃជំងឺឆ្លងរាតត្បាត ខណៈពួកអ្នកជួយសង្គ្រោះខិតខំគាស់កកាយតាមរកអ្នកដែលអាចនៅរស់រានមានជីវិត ក្រោមគំនរបាក់បែក។
ប្រឈមមុខនឹងគ្រោះមហន្តរាយធំនេះដែលបណ្ដាលឲ្យមនុស្សស្លាប់យ៉ាងតិច៨៣២នាក់ រដ្ឋាភិបាលឥណ្ឌូណេស៊ីអំពាវនាវរកជំនួយអន្តរជាតិ។ តុល្យការមនុស្សស្លាប់ដោយគ្រោះមហន្តរាយលើកនេះ មានលើសពីចំនួនជនរងគ្រោះដោយការរញ្ជួយដីនៅកោះLOMBOK ឥណ្ឌូណេស៊ីដែរកាលពីខែសីហា បណ្ដាលឲ្យមនុស្សស្លាប់ជាង៥០០នាក់។
អាជ្ញាធរគិតថា ចំនួនចុងក្រោយនៃជនរងគ្រោះដោយការរញ្ជួយដី និងស៊ូណាមីលើកនេះ នឹងមានខ្ពស់ថែមទៀត ខណៈផ្នែកដ៏ធំនៃតំបន់រងការប៉ះពាល់ នៅពុំទាន់ចូលទៅដល់នៅឡើយ ព្រោះមានការលំបាកផ្លូវថ្នល់ទាំងឡាយដាច់ ហើយបណ្ដាព្រលានយន្តហោះរងការខូចខាត។
ជនរងគ្រោះភាគច្រើន គឺនៅទីក្រុងប៉ាលូ ជាប់ឆ្នេរសមុទ្រនៃកោះសេឡែប ដែលញ័ររង្គើរខ្លាំងដោយការរញ្ជួយដីកម្លាំង៧,៥រីស្ទ័រ បន្ទាប់មកមានស៊ូណាមី។ នាថ្ងៃទី១ តុលា ពួកអ្នកជួយសង្គ្រោះប៉ុនប៉ងកាយគំនរបាក់បែកនៃសណ្ឋាគារ ROA ROA ខណៈមនុស្សពី៥០ទៅ៦០នាក់អាចកប់ជាប់។ សម្រាប់ពេលនេះមនុស្ស២នាក់ត្រូវបានជួយសង្គ្រោះនៅទីនោះ។
នាថ្ងៃទី១ តុលា រដ្ឋាភិបាលនិយាយថា ឆ្លៀតឱកាសមានការរញ្ជួយដីអ្នកទោសដល់ទៅ១២០០នាក់បានរត់ចេញពីពន្ធនាគារ៣ផ្សេងគ្នានៅឥណ្ឌូណេស៊ី។ ហើយអ្នកទោសទាំងនេះស្វែងរកមធ្យោបាយរត់ចេញពីគុកមានមនុស្សណែនណាន់តាន់តាប់នៅក្រុងប៉ាលូ និងក្រុងដុងហ្គាឡាជិតខាង៕
ចែករំលែកព័តមាននេះ