បន្ទាយមានជ័យ ៖ គិតត្រឹមរយៈពេល៨ខែដើមឆ្នាំ២០១៨នេះ ភ្ញៀវទេសចរបរទេសចូលតាមច្រកទ្វារអន្តរជាតិប៉ោយប៉ែត មានប្រមាណជាង៣១,២ម៉ឺននាក់ ថយចុះ៨,១៥% បើធៀបនឹងរយៈពេលដូចគ្នានៃឆ្នាំមុន ។ នេះបើតាមប្រធានមន្ទីរទេសចរណ៍ខេត្តបន្ទាយមានជ័យ ។
លោក ឈឿន សេរីវុធ ប្រធានមន្ទីររូបនេះបានប្រាប់កោះសន្ដិភាពថា ភ្ញៀវទេសចរចូលតាមច្រកទ្វារអន្តរជាតិប៉ោយប៉ែត រយៈពេល៨ខែក្នុងឆ្នាំនេះ មានចំនួន៣១២.៣៧៧នាក់ បើធៀបនឹងរយៈពេលដូចគ្នាក្នុងឆ្នាំ២០១៧ មានចំនួន៣៤០.០៩២នាក់ ពោលគឺថយចុះ៨,១៥%។ ដោយឡែក ក្នុងខែសីហាកន្លងមកនេះ ភ្ញៀវអន្តរជាតិចូលមកមានចំនួន៣៣.៤៧២នាក់ បើធៀបនឹងរយៈពេលដូចគ្នានៃឆ្នាំមុន ចំនួន៤០.៨៤១នាក់ ថយចុះ១៨,០៤% ។
លោកបន្ដថា ៖« ភ្ញៀវអន្តរជាតិទាំងនោះ មកពីបណ្ដាប្រទេសជាច្រើនទាំងនៅក្នុងតំបន់ និងមកពីអឺរ៉ុប ដូចជា ថៃ ឡាវ ចិន វៀតណាម រុស្ស៊ី និងបារាំងជាដើម ហើយពួកគេបានចូលមកទស្សនានៅតាមរមណីយដ្ឋាន និងតំបន់ប្រសាទនានានៅក្នុងខេត្ត មុននឹងបន្ដដំណើរឆ្ពោះទៅកាន់គោលដៅទេសចរណ៍ផ្សេងទៀត »។
លោកបញ្ជាក់ថា ៖« ការកើនឡើងឬថយចុះនៃចំនួនភ្ញៀវ គឺទៅតាមរដូវ ពិសេសពេលនេះ ដោយសារតែជារដូវមានភ្លៀងធ្លាក់ច្រើន ហើយជាពេលដែលភ្ញៀវត្រូវត្រឡប់ទៅប្រទេសគេវិញដែរ តែចំនួនភ្ញៀវនឹងកើនឡើងវិញ ចាប់ពីខែវិច្ឆិកា ដល់ខែមេសា ខាងមុខ »។
ខេត្តបន្ទាយមានជ័យមានរមណីយដ្ឋានវប្បធម៌ និងធម្មជាតិជាច្រើន ដែលកំពុងទាក់ទាញភ្ញៀវទេសចរជាតិ និងអន្តរជាតិ មកទស្សនា ដូចជា ប្រាសាទបន្ទាយឆ្មារ, អាងទឹកត្រពាំងថ្ម, សួនស្នេហ៍ជនបទ និងរមណីយដ្ឋាន ព្រមទាំងតំបន់ប្រាសាទបុរាណជាច្រើនទៀត ។
ការមកដល់នៃភ្ញៀវទេសចរអន្តរជាតិ កំពុងផ្ដល់ចំណូលដោយផ្ទាល់ និងប្រយោលយ៉ាងច្រើនដល់ប្រជាពលរដ្ឋនៅតាមមូលដ្ឋាន ព្រមទាំងបង្កើតការងារយ៉ាងច្រើនដល់ប្រជាពលរដ្ឋ ។
ដើម្បីបន្ដទាក់ទាញភ្ញៀវអន្តរជាតិឲ្យចូលមកតាមច្រកទ្វារអន្តរជាតិដ៏សំខាន់មួយនេះកាន់តែមានកំណើនថែមទៀត បច្ចុប្បន្ននេះមន្ទីរបានយកចិត្តទុកដាក់ទៅលើការផ្ដល់សេវាកម្ម និងបំពេញបែបបទនានា ធ្វើយ៉ាងណាបង្កភាពងាយស្រួលដល់ភ្ញៀវ និងជៀសវាងការថ្នាំងថ្នាក់ណាមួយកើតឡើង ។ នេះបើតាមការបញ្ជាក់ពីលោកប្រធានមន្ទីរទេសចរណ៍ ៕
ចែករំលែកព័តមាននេះ