រាជធានីភ្នំពេញ ៖ ក្នុងបរិបទប្រទេសមានសុខសន្ដិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ វិនិយោគិនជប៉ុនប្រមាណ១៥០ក្រុមហ៊ុនបានបង្ហាញពីការចាប់អារម្មណ៍របស់ខ្លួនលើប្រទេសកំពុងអភិវឌ្ឍន៍មួយនេះ និងគ្រោងបណ្ដាក់ទុនវិនិយោគជាបន្តបន្ទាប់ ។ នៅក្នុងជំនួបរវាងវិនិយោគិនខ្មែរ និងជប៉ុនកាលពីពេលថ្មីៗនេះ…
រាជធានីភ្នំពេញ ៖ ក្នុងបរិបទប្រទេសមានសុខសន្ដិភាព ស្ថិរភាពនយោបាយ និងកំណើនសេដ្ឋកិច្ចរឹងមាំ វិនិយោគិនជប៉ុនប្រមាណ១៥០ក្រុមហ៊ុនបានបង្ហាញពីការចាប់អារម្មណ៍របស់ខ្លួនលើប្រទេសកំពុងអភិវឌ្ឍន៍មួយនេះ និងគ្រោងបណ្ដាក់ទុនវិនិយោគជាបន្តបន្ទាប់ ។
នៅក្នុងជំនួបរវាងវិនិយោគិនខ្មែរ និងជប៉ុនកាលពីពេលថ្មីៗនេះ លោកឧកញ៉ា យិន សុវណ្ណី តំណាងវិនិយោគិនកម្ពុជា បានឲ្យដឹងថា ជំនួបរវាងវិនិយោគិនកម្ពុជា និងជប៉ុននៅពេលនេះ គឺបានបង្ហាញឱ្យឃើញពីការចាប់អារម្មណ៍របស់ជប៉ុនក្នុងការបណ្ដាក់ទុននៅប្រទេសកម្ពុជា ស្របពេលកម្ពុជានៅតែមានសក្ដានុពលសម្រាប់វិនិយោគលើវិស័យផ្សេងៗជាច្រើន ។
លោកឧកញ៉ា មានប្រសាសន៍ថា ៖« ការមកដល់របស់ជប៉ុននៅកម្ពុជាពេលនេះ ក៏បានបង្ហាញពីកត្តាសន្តិសុខ ស្ថិរភាពនយោបាយ ការអភិវឌ្ឍនាពេលបច្ចុប្បន្ន និងនៅពេលអនាគត។ ម្យ៉ាងវិញទៀត បច្ចុប្បន្នកម្ពុជា បានក្លាយជាគោលដៅវិនិយោគដ៏សំខាន់របស់បណ្ដាប្រទេសរីកចម្រើននានាទាំងក្នុង និងក្រៅតំបន់ »។ លោកឧកញ៉ាបន្តថា ដោយមើលឃើញពីកត្តាស្ថិរភាពទាំងនយោបាយ និងសេដ្ឋកិច្ចកម្ពុជា ក្នុងរយៈពេលកន្លងមកនេះ ទើបជប៉ុនដែលជាប្រទេសមហាអំណាចសេដ្ឋកិច្ចលំដាប់ទី៣នៅលើពិភពលោក បានបញ្ជូនក្រុមហ៊ុនវិនិយោគជាច្រើនមកបណ្តាក់ទុននៅកម្ពុជាជាបន្តបន្ទាប់ ។ ជាក់ស្ដែងពេលនេះ ក្រុមហ៊ុនជប៉ុនចំនួន១៥០ដែលបានមកដល់កម្ពុជា កំពុងតែស្វែងការវិនិយោគនានា ដើម្បីបញ្ជាក់ឱ្យកាន់តែច្បាស់ថា កម្ពុជាជាប្រទេសមួយមានសក្តានុពលយ៉ាងខ្លាំងសម្រាប់ការវិនិយោគលើគ្រប់វិស័យ ។
លោកឧកញ៉ា យិន សុវណ្ណី បានបញ្ជាក់ថា នៅក្នុងចំណោមបណ្តាក្រុមហ៊ុនទាំង១៥០ខាងលើនេះ មានជំនាញវិនិយោគ៣វិស័យ ក្នុងនោះដូចជា វិស័យកសិកម្ម វិស័យទេសចរណ៍ និងវិស័យដឹកជញ្ជូន ។
លោក SHOJI YUSUNOKI តំណាងក្រុមហ៊ុនជប៉ុនបានឲ្យដឹងថា ប្រទេសជប៉ុន និងប្រទេសកម្ពុជា មានចំណងមិត្តភាពជាមួយគ្នាយ៉ាងស៊ីជម្រៅយូរមកហើយ ដូច្នេះហើយសម្រាប់ថ្ងៃនេះ តំណាងក្រុមហ៊ុនរបស់ជប៉ុនចំនួន១៥០បានមកដល់ប្រទេសកម្ពុជា ហើយក្រុមវិនិយោគិនទាំងអស់របស់ជប៉ុន ក៏មានចំណាប់អារម្មណ៍យ៉ាងខ្លាំងក្នុងការវិនិយោគនៅក្នុងប្រទេសកម្ពុជាផងដែរ ។ លោកបន្តថា ៖« ប្រទេសជប៉ុន មានចំនួនមនុស្សវ័យចាស់ច្រើន រីឯកម្ពុជាជាប្រទេសមួយនៅក្នុងតំបន់ដែលមានយុវវ័យច្រើន ដូច្នេះហើយកម្ពុជា-ជប៉ុន ជាប្រទេសដែលមានសក្តានុពលដែលអាចអាស្រ័យគ្នាទៅវិញទៅមកបាន ជាពិសេសលើការវិនិយោគ និងផ្លាស់ប្តូរបទពិសោធន៍គ្នាទៅវិញទៅមក » ។
ការវិនិយោគរបស់ជប៉ុននៅប្រទេសកម្ពុជាក្នុងឆ្នាំ២០១៧កន្លងទៅនេះ មានទឹកប្រាក់ចំនួន១,៦ពាន់លានដុល្លារអាមេរិក ដែលមានគម្រោងវិនិយោគរបស់ជប៉ុន ជាង១៣០បានចុះបញ្ជីជាមួយក្រុមប្រឹក្សាអភិវឌ្ឍន៍កម្ពុជា ដែលភាគច្រើននៅក្នុងវិស័យធនាគារ ផលិតកម្ម កសិកម្ម សេវាកម្ម និងហេដ្ឋារចនាសម្ព័ន្ធ ។
ប្រមុខរាជរដ្ឋាភិបាលកម្ពុជា សម្តេចតេជោ ហ៊ុន សែន បានថ្លែងកាលពីពេលថ្មីៗនេះថា ដោយសារកត្តាសុខសន្ដិភាព ស្ថិរភាពនយោបាយពេញលេញ និងគោលនយោបាយបើកចំហលើគ្រប់វិស័យនៃសេដ្ឋកិច្ចជាតិ រួមទាំងការអនុញ្ញាតឲ្យវិនិយោគិនបរទេសអាចមកវិនិយោគផ្ទាល់១០០ភាគរយនៅកម្ពុជា កំពុងតែជំរុញឲ្យវិនិយោគិនបរទេសបន្តចូលមកបណ្ដាក់ទុនវិនិយោគមានកំណើនជាបន្ដបន្ទាប់ ៕
ចែករំលែកព័តមាននេះ