ខេត្តបាត់ដំបង ៖ ការចុះសួរសុខទុក្ខរបស់ដៃគូរសម្ព័ន្ធមេត្រីភាពរវាងរដ្ឋបាលជលផល និងក្រុមហ៊ុនសូគីម៉ិច ក្នុងឱកាសបុណ្យកាន់បិណ្ឌភ្ជុំបិណ្ឌដល់កងទ័ព នៅទីបញ្ជាការយោធភូមិភាគទី៥ ដែលបានធ្វើឡើងវេលាព្រឹកថ្ងៃទី០១ ខែតុលា ឆ្នាំ២០១៨ក្រោមការដឹកនាំរបស់លោក អេង ជាសាន ប្រតិភូរាជរដ្ឋាភិបាលទទួលបន្ទុកជាប្រធានរដ្ឋបាលជលផល, លោកសេន រ៉ន តំណាងអគ្គនាយកក្រុមហ៊ុនសូគីម៉ិច ។
ដោយមានការស្វាគមន៍ពីលោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោក មេបញ្ជាការយោធភូមិភាគទី៥, លោកឧត្តមសេនីយ៍ទោឯក សំអូន មេបញ្ជាការរង នាយសេនាធិការយោធភូមិភាគទី៥ និងមេបញ្ជាការរង នាយការិយាល័យសរុបរួមចំនួន៥០នាក់ ។
លោកឧត្តមសេនីយ៍ឯក ប៊ុន សេង មេបញ្ជាការរងកងទ័ពជើងគោកមេបញ្ជាការយោធភូមិភាគទី៥ បានបញ្ជាក់ថា តួនាទីកងទ័ព គឺមានភារកិច្ចការពារជាតិថែររក្សាសុខសន្តិភាពដែលយើងរកបានទាំងលំបាកមកនេះ កុំឲ្យបាត់បង់ទៅវិញ សំខាន់នៅជាប់ព្រំប្រទល់ដែនជាមួយប្រទេសជិតខាងយើង បានរួមកម្លាំងសហប្រតិបត្តិការរួមគ្នាជាមួយភាគីថៃ ដោយផ្តោតលើការថែរក្សាសន្តិសុខសណ្តាប់ធ្នាប់សង្គមទប់ស្កាត់រាល់បទល្មើសដែលកើតមានឡើងជួយជំរុញវិស័យសេដ្ឋកិច្ចផ្លាស់ប្តូរគ្នាទៅវិញទៅមកឲ្យកាន់តែមានភាពល្អប្រសើរឡើង ។
លោកឧត្តមសេនីយ៍ឯក បានបន្តទៀតថា គ្រប់អ្វីៗដែលកងទ័ពយើងបានដំណើរការល្អកន្លងមកនោះ គឺដោយសារមានចំណែកស្មារតី ឆន្ទៈ ស្នេហា ស្រឡាញ់ប្រទេសជាតិយើងពីដៃគូសម្ព័ន្ធមេត្រីភាពជួយជ្រោមជ្រែង គ្រប់តាមបណ្តាអង្គភាពកន្លងមកដែរនេះ គឺជាសកម្មភាពបានបញ្ជាក់ថា យើងរួមគ្នាថែរក្សាឲ្យបាននូវសុខសន្តិភាព និងការអភិវឌ្ឍដែលយើងទាំងអស់គ្នាកំពុងទទួលបានរហូតដល់សព្វថ្ងៃនេះ ហើយនៅចុងឆ្នាំនេះ កម្មវិធីរបស់កងទ័ពមានច្រើនដែលក្រសួងការពារជាតិបានរៀបចំបុណ្យដ៏ធំមួយកសាងវិមានឈ្នះ- ឈ្នះ ដើម្បីរំលឹកខួបជ័យជំនះគំរប់២០ឆ្នាំ និងខួប៦៥ឆ្នាំនៃថ្ងៃបង្កើតកងយោធពលខេមរភូមិន្ទ ហើយអបអរសាទរថ្ងៃខួប៧មករាផងដែរ ដោយកងកម្លាំងយោធភូមិភាគទី៥ត្រៀមជំរុញការហ្វឹកហាត់នៃការបាញ់គ្រាប់ពិតនៅភ្នំវាលចាប លើកទី៣ ដើម្បីអបអរសាទរ និងគំរោងអញ្ជើញគ្រប់ដៃគូសម្ព័ន្ធមេត្រីភាពទាំងអស់មកចូលរួមផងដែរ ។
លោកអេង ជាសាន ប្រធានរដ្ឋបាលជលផលកម្ពុជាបានថ្លែងវិញថា ក្នុងនាមសមរភូមិក្រាយជួយសមរភូមិមុខ ដោយស្មារតីស្រឡាញ់ប្រទេសជាតិយើង អង្គភាពរបស់លោកក៏មានចំណែកចូលរួមអបអរសាទរជាមួយបុណ្យសម្ភោធវិមានឈ្នះ-ឈ្នះនាចុងឆ្នាំនេះផងដែរ ព្រោះកន្លងមកក្នុងនាមជលផលកម្ពុជាបានជំរុញការបណ្តុះបណ្តាលគ្រប់តាមបណ្តាអង្គភាពតាមខ្សែព្រំដែនដែលត្រូវការជំនាញផ្នែកចិញ្ចឹមត្រី និងផ្តល់ពូជសម្រាប់ជួយផ្នែកជីវភាពក្នុងជួរកងទ័ព ក្នុងគ្រួសារកងទ័ពរហូតអាចបន្សល់បានទៅលក់នៅទីផ្សារបន្ថែមទៀត ។ លោកបានបញ្ជាក់បន្តិចអំពីសហគមន៍អឺរ៉ុប និងសហរដ្ឋអាមេរិក គឺមានតែការជួយជំរុញដំណើរការល្អបន្ថែមទៀត ដែលចុងឆ្នាំនេះ និងផ្តល់ជំនួយមកប្រមាណ២៣លានដុល្លារបន្ថែមទៀត និងថវិកាផ្សេងទៀតនៅឆ្នាំក្រោយចំនួន៨៧លានដុល្លារ ក្នុងនោះវិស័យជលផលទទួលបាន៤៥លានដុល្លារ ក្នុងការសហការរួមគ្នាជាមួយបណ្តាអង្គការ ឬស្ថាប័នដែលពាក់ព័ន្ធផ្សេងៗលើកស្ទួយផលិតផលក្នុងស្រុក និងទប់ស្កាត់បង្ក្រាបរាល់បទល្មើសណាដែលមានការរាំងស្ទះជាមួយវិស័យនេះ ។
ជាចុងក្រោយក៏មានការប្រគល់អំណោយសម្រាប់បុណ្យភ្ជុំបិណ្ឌនេះផងដែរមាន អង្ករ៤០ការ៉ុង, មី៥០កេស, ទឹកត្រី៥០យួរ, ទឹកផ្លែឈើ៣០កេស, ត្រីងៀត៥០គីឡូក្រាម , ឆៃប៉ូវ១០០គីឡូក្រាម , អន្សមចេក-ជ្រូក, នំបត់, នំគម៧០០នំ, ថវិកា១០លានរៀល, ដែលសរុបជារួមទាំងអស់២០លាន ៨៨ម៉ឺនរៀល ៕
ចែករំលែកព័តមាននេះ