ថវិកា25លានដុល្លារនឹងត្រូវប្រើសម្រាប់កម្មវិធីវះកាត់ដោយសុវត្ថិភាពឆ្នាំ២០២០ ទៅក្នុងតំបន់អាស៊ីអាគ្នេយ៍
- ភ្នំពេញ
ទីក្រុងបុស្តុន រដ្ឋម៉ាស្សាជូសេដ ៖ មូលនិធិ GE នាថ្ងៃទី 28 ខែកញ្ញា ឆ្នាំ 2018…
ទីក្រុងបុស្តុន រដ្ឋម៉ាស្សាជូសេដ ៖ មូលនិធិ GE នាថ្ងៃទី 28 ខែកញ្ញា ឆ្នាំ 2018…
ទីក្រុងបុស្តុន រដ្ឋម៉ាស្សាជូសេដ ៖ មូលនិធិ GE នាថ្ងៃទី 28 ខែកញ្ញា ឆ្នាំ 2018 ប្រកាសជាផ្នែកចុងក្រោយជាមួយថវិការ 25 លានដុល្លាររបស់ខ្លួន ចំពោះការវះកាត់ប្រកបដោយសុវត្ថិភាពទូទាំងពិភពលោក ដោយគាំទ្រកម្មវិធីវះកាត់ប្រកបដោយសុវត្ថិភាពឆ្នាំ២០២០ ទៅក្នុងតំបន់អាស៊ីអាគ្នេយ៍មានប្រទេសកម្ពុជា និងសាធារណរដ្ឋប្រជាមានិតប្រជាធិបតេយ្យឡាវ ជាដើម។
ការវិនិយោគនេះមានសារសំខាន់ក្នុងការពន្លឿនការទទួលបានសេវា វះកាត់នៅតំបន់អាស៊ីអាគ្នេយ៍ ខណៈដែលតំបន់នេះមានកម្រិតនៃការវះ កាត់ទាបបំផុតមួយនៅក្នុងពិភពលោក ដែលបច្ចុប្បន្ន 97% នៃប្រជាជនក្នុងតំបន់មិនអាចទទួលបាន ការវះកាត់ដោយសុវត្ថិភាព។
នៅក្នុងសម័យប្រជុំលើកទី 73 នៃមហាសន្និបាតអង្គការសហប្រជាជាតិ មូលនិធិ GE បានសហការជាផ្លូវការជាមួយក្រសួងសុខាភិបាលកម្ពុជា ដើម្បីពង្រឹងប្រព័ន្ធវះកាត់ តាមរយៈកម្មវិធីវះកាត់ប្រកបដោយសុវត្ថិភាពឆ្នាំ២០២០ លើការអភិវឌ្ឍធនធានមនុស្ស និងការគាំទ្រផ្នែកសម្ភារបរិក្ខារវេជ្ជសាស្ត្រ។
វះកាត់ប្រកបដោយសុវត្ថិភាពឆ្នាំ២០២០នេះ នឹងសហការជាមួយមន្ទីរពេទ្យកាល់ម៉ែត និងសាកលវិទ្យាល័យវិទ្យាសាស្ត្រសុខាភិបាល ដើម្បីបង្កើតមជ្ឈមណ្ឌលបណ្តុះបណ្តាលមួយដែលនឹងអភិវឌ្ឍធនធានជំនាញផ្នែកវះកាត់។
កម្មវិធីវះកាត់ប្រកបដោយសុវត្ថិភាពឆ្នាំ២០២០ កំពុងពង្រឹងមូលដ្ឋានគ្រឹះនៃប្រព័ន្ធវះកាត់ ដើម្បីផ្តល់ការវះកាត់សំខាន់ៗប្រកបដោយសុវត្ថិភាព និងទូលំទូលាយ។ លោក Ann Klee ប្រធានមូលនិធិ GE បានលើកឡើងថា «គំនិតផ្តួចផ្តើមនេះនឹងផ្តោតទៅ លើការកសាងសមត្ថភាពស្ថាប័នរបស់កម្ពុជា ដើម្បីបន្តកែលម្អការវះកាត់យូរអង្វែង នៅក្នុងពេលអនាគត។
«រដ្ឋាភិបាលកម្ពុជា ប្តេជ្ញាលើកកម្ពស់គុណភាព និងបង្កើនលទ្ធភាពទទួលបានការថែទាំសុខភាពនៅក្នុងប្រទេស ហើយមូលនិធិ GE រីករាយក្នុង ការសហការជាមួយក្រសួងសុខភិបាល ដើម្បីលើកកម្ពស់ផ្នែកវះកាត់នេះ»។
ឯកឧតម្តសាស្ត្រាចារ្យ ម៉ម ប៊ុនហេង រដ្ឋមន្ត្រីក្រសួងសុខាភិបាលកម្ពុជាបានលើកឡើងថា «យើងមានក្តីរំភើបរីករាយដែលត្រូវបានជ្រើសរើសជាប្រទេសដំបូងគេនៅអាស៊ីអាគ្នេយ៍ ដើម្បីដំណើរការកម្មវិធីវះកាត់ប្រកបដោយសុវតិ្ថភាពនេះ។ វាផ្តល់នូវឱកាសបណ្តុះបណ្តាលថ្មី សម្រាប់ក្រុមគ្រូពេទ្យវះកាត់បច្ចុប្បន្នរបស់យើង – កម្មវិធីនេះក៏នឹងគាំទ្របន្ថែមទៀតហើយសង្ឃឹមថា នឹងពន្លឿនការដាក់ឱ្យអនុវត្តនូវកម្មវិធីធានារ៉ាប់រងសុខភាពសាកលនាពេលអនាគតខាមុខនេះ»។
កម្មវិធីវះកាត់ប្រកបដោយសុវត្ថិភាពឆ្នាំ 2020 ត្រូវបានបង្កើតឡើងនៅឆ្នាំ 2015 ជាមួយនឹងគោលដៅកាត់បន្ថយការស្លាប់ ដែលអាចបង្ការបាន និងការពន្លឿនការទទួលបានសេវាវះកាត់ប្រកបដោយសុវត្ថិភាព និងការប្រើថ្នាំសណ្តំនៅទូទាំងពិភពលោក។
គោលបំណង សំខាន់ៗរបស់កម្មវិធីវះកាត់ប្រកបដោយសុវត្ថិភាពឆ្នាំ 2020 គឺ៖
១- ឥទ្ធិពល ៖ កាត់បន្ថយការស្លាប់ដែលអាចបង្ការបានពីលក្ខខណ្ឌជម្ងឺដែលអាចព្យាបាលដោយការវះកាត់ដោយបង្កើន គុណភាពនៃការថែទាំ និងបង្កើនចំនួននៃការវះកាត់ក្នុងកន្លែងវះកាត់ ដែលគាំទ្រដោយកម្មវិធីវះកាត់ប្រកបដោយសុវត្ថិភាពឆ្នាំ 2020។
២- ភាពច្ឋៃប្រឌិត៖ ណែនាំ និងសាកល្បងគំរូប៉ិនប្រសព្វសម្រាប់ការអនុវត្តក្នុងវិស័យសុខភាពជាសកល និង
៣- ការពង្រីក៖ កសាង និងពង្រឹងប្រព័ន្ធអេកូសាស្ត្រប្រកបដោយនិរន្តភាពសម្រាប់ការវះកាត់ សង្គ្រោះបន្ទាន់ និងសំខាន់ នៅក្នុងតំបន់ក្រីក្រ។
កម្មវិធីវះកាត់ប្រកបដោយសុវត្ថិភាពឆ្នាំ 2020 បានចាប់ផ្តើមប្រតិបត្តិការនៅប្រទេសអេត្យូពីនៅឆ្នាំ 2016 និងនៅប្រទេស តង់ហ្សានី នៅឆ្នាំ 2017។ គំនិតផ្តួចផ្តើមនេះបានជួយគាំទ្រដល់រដ្ឋាភិបាលអេត្យូពី និងតង់ហ្សានី ដើម្បីបង្កើតយុទ្ធសាស្ត្រ វះកាត់ថ្នាក់ជាតិ ដែលត្រូវបានគេស្គាល់ថា ជាការសង្គ្រោះជីវិតតាមរយៈការវះកាត់ និង ផែនការវះកាត់ សម្ភព និងថ្នាំស្ពឹកជាតិ។
តាមរយៈកម្មវិធីរបស់កម្មវិធីវះកាត់ប្រកបដោយសុវត្ថិភាពឆ្នាំ 2020 មន្ទីរពេទ្យបឋមជាក់លាក់នានាបានបង្កើនបរិមាណ នៃការ វះកាត់ដល់ទៅ 50% និងកាត់បន្តយអត្រាមរណភាព និងអត្រា ឆ្លងមេរោគដល់ទៅមួយភាគបី។
មានបុគ្គលិកជាង 1200 នាក់នៅអាហ្វ្រិកខាងកើត កម្មវិធីវះកាត់ប្រកបដោយសុវត្ថិភាពឆ្នាំ 2020 ផ្តល់លទ្ធភាពឱ្យក្រុមវះកាត់នានាធ្វើការជាមួយគ្នាបានយ៉ាងល្អ អនុវត្តមានឧត្តមានុវត្តនានាដូចជា អនុវត្តតាមនីតិវិធីវះកាត់ប្រកបដោយសុវតិ្ថភាពរបស់ អង្គការ សុខភាពពិភពលោក ជួសជុល និងសម្អាត ឧបករណ៍វះកាត់ប្រើសើរជាងមុខ។
ការវិនិយោគរបស់មូលនិធិ GE ក្នុងការវះកាត់នៅតំបន់អាស៊ីអាគ្នេយ៍បានអនុវត្តបន្តលើការងារអស់រយៈពេលជាង 10 ឆ្នាំនៅក្នុងតំបន់ ដើម្បីកែលម្អការទទួលបានសេវាថែទាំសុខភាពដែលមានគុណភាព របស់សហគមន៍ជនបទ និងសហគមន៍ងាយ រងគ្រោះ។
ក្នុងអំឡុងពេលនោះ ក្រុមហ៊ុន GE និងមូលនិធិ GE បានផ្តល់ថវិកាចំនួន 12 លានដុល្លារ ដើម្បីនាំយកឧបករណ៍វេជ្ជសាស្ដ្រទំនើបៗ បង្កើតកម្មវិធីបណ្តុះ បណ្តាលបច្ចេកទេសប្រើប្រាស់សម្ភារៈបរិក្ខារជីវវិជ្ជសាស្ត្រ (BMET) ដោយសហការជាមួយសាកលវិទ្យាល័យ Duke និងអង្គការសុខភាពវិស្វកម្មពិភពលោក ហើយបង្កើនលទ្ធភាពទទួលទឹកសុវត្ថិភាព ដោយឧបត្ថម្ភប្រព័ន្ធបន្សុតទឹក ជាមួយនឹងការបណ្តុះបណ្តាលសម្រាប់មជ្ឈមណ្ឌលថែទាំសុខភាពនានា។ កម្មវិធី នេះបានគាំទ្រដល់ មន្ទីរពេទ្យជាង 40 នៅក្នុងខេត្តចំនួន 25 ។
សូមបញ្ជាក់ថា «កម្មវិធីវះកាត់ប្រកបដោយសុវត្ថិភាពឆ្នាំ 2020» បំពេញបន្ថែមយ៉ាងល្អប្រសើរលើកម្មវិធីថែទាំសុខភាពដែលគាំទ្រដោយ មូលនិធិ GE ដែលយើងបានចាប់ផ្តើមនៅកម្ពុជាក្នុងឆ្នាំ 2009។
លោក លឹម តារារិទ្ធិ ប្រធានតំណាងក្រុមហ៊ុន GE ប្រចាំប្រទេសកម្ពុជា បានលើកឡើងថា «ខណៈដែលគំនិតផ្តួចផ្តើមនេះផ្តោតសំខាន់ លើការផ្តល់នូវការព្យាបាលចាំបាច់ ដូចជាការបណ្តុះបណ្តាល និងឧបករណ៍វិជ្ជសាស្ត្រទៅឱ្យមន្ទីរពេទ្យដែលខ្វះធនធាន កម្មវិធីដែលផ្តោតលើជំនាញឯកទេស នេះផ្តល់នូវអត្ថប្រយោជន៍ រយៈពេលវែងសម្រាប់ក្រុមគ្រូពេទ្យវះកាត់របស់យើងនៅទូទាំងប្រទេស»។
កម្មវិធីវះកាត់ប្រកបដោយសុវត្ថិភាពឆ្នាំ 2020 ៖ កម្មវិធីវះកាត់ប្រកបដោយសុវត្ថិភាពឆ្នាំ 2020 នាំមកនូវភាពប៉ិនប្រសព្វ ឯកទេសសកល និងបទពិសោធក្នុងស្រុក ដើម្បីធ្វើឱ្យ ការវះកាត់មានសុវត្ថិភាព និងទូលំទូលាយសម្រាប់មនុស្សគ្រប់គ្នា។
ដោយធ្វើការនៅទូទាំងទ្វីបអាហ្វ្រិក និងអាស៊ីខាងត្បូង គំនិតផ្តួចផ្តើមនេះបណ្តុះបណ្តាលបុគ្គលិកផ្នែកវះកាត់ គាំទ្រដល់រដ្ឋាភិបាល ដើម្បីពង្រឹងប្រព័ន្ធវះកាត់ជាតិ និងបង្កើតដំណោះ ស្រាយដែលអាចពង្រីកទៅតំបន់ផ្សេង ចំពោះឧបសគ្គផ្នែកហេដ្ឋារចនាសម្ព័ន្ធ។
កម្មវិធីវះកាត់ប្រកបដោយសុវត្ថិភាពឆ្នាំ 2020 ត្រូវបានរៀបចំឡើងដោយ Dalberg អនុវត្តដោយ Jhpiego កម្មវិធីវះកាត់សកល និងការផ្លាស់ប្តូរសង្គមរបស់សាកល វិទ្យាល័យហាវឺដ អង្គការជំនួយអន្ដរជាតិ ព្រមទាំងអង្គការសង្គមវិជ្ជាជីវៈក្នុងស្រុក និងសាកលវិទ្យាល័យនានា។ គំនិត ផ្តួចផ្តើមនេះត្រូវបានផ្តល់ ថវិកាដោយមូលនិធិ GE ៕ ដោយសហការ
ចែករំលែកព័តមាននេះ