ខេត្តព្រះសីហនុ ៖ ស្រុកកំពង់សិលា នៅរសៀលថ្ងៃទី៣០ ខែកញ្ញា ឆ្នាំ២០១៨ ក្រុមពលរដ្ឋក្រីក្រចំនួន៤០០គ្រួសារ មកពីឃុំស្ទឹងឆាយ ចំនួន១១៣គ្រួសារ និងមកពីឃុំកំពង់សីលាចំនួន២៨៧គ្រួសារ ទទួលបានមុងជ្រលក់ថ្នាំការពារមូសដើម្បីយកទៅប្រើប្រាស់។
មន្ត្រីសាខាកាកបាទក្រហមខេត្តព្រះសីហនុ ប្រាប់ថា ការចែកលើកនេះមិនមែនចែកស្បៀងអាហារទេ គឺយើងចែកមុងជ្រលក់ថ្នាំការពារមូស និងសត្វល្អិតចង្រៃផ្សេងៗ ដើម្បីការពារជំងឺដែលចម្លងដោយមូស ឬសត្វល្អិត។
ក្រៅពីនោះក៏មានចែកជូនអាវផងដែរ ដែលអំណោយទាំងនោះជាការឧបត្ថម្ភពីកាកបាទក្រហមខេត្តក្វាងស៊ី ប្រទេសចិន។ ជាមួយគ្នានេះ កាកបាទក្រហមខេត្តនិងសាលាខេត្តព្រះសីហនុ បានរួមគ្នាឧបត្ថមថវិកាម្នាក់ ៤០០០០រៀលផងដែរ។
លោក យន្ត មីន អភិបាលខេត្តព្រះសីហនុ និងជាប្រធានកិតិ្តយសសាខាកាកបាទក្រហមខេត្ត បានប្រសាសន៍ផ្តាំផ្ញើសួរសុខទុក្ខពីសម្តេចកិត្តិព្រឹទ្ធបណ្ឌិត ប៊ុន រ៉ានី ហ៊ុន សែន ប្រធានកាកបាទក្រហម និងអំពាវនាវអោយពលរដ្ឋចេះថែរក្សាសុខភាព ដេកត្រូវដាក់មុងអោយបានត្រឹមត្រូវដើម្បីកុំអោយមូសខាំ ។
ទន្ទឹមនឹងនោះ លោកបានក្រើនរំលឹកអោយមន្ត្រីតាមមូលដ្ឋានត្រូវយកចិត្តទុកដាក់មើលសុខទុក្ខប្រជាជន និងជួយពួកគាត់អោយបានទាន់ពេលវេលាក្នុងគ្រាមានអាសន្ន ៕
ចែករំលែកព័តមាននេះ