ខេត្តបាត់ដំបង ៖ បុរសម្នាក់ត្រូវកម្លាំងសមត្ថកិច្ចឃាត់ខ្លួននាប៉ុន្មានម៉ោង ក្រោយពីធ្វើសកម្មភាពទំលុះពិតានបន្ទប់ផ្ទះជួល ហើយចូលលួចយកលុយម្ចាស់ផ្ទះអស់ចំនួន១០ម៉ឺនបាត ហេតុការណ៍នេះកើតឡើងកាលពីម៉ោង១២ថ្ងៃត្រង់ ថ្ងៃទី២៩ កញ្ញា នៅចំណុចបន្ទប់ជួលមួយកន្លែង ស្ថិតក្នុងភូមិដូង ឃុំបឹងរាំង ស្រុកកំរៀង។ ប៉ុន្តែអ្វីដែលប៊ិះនឹងធ្វើឲ្យមហន្តរាយធ្ងន់ធ្ងរនោះ គឺជនដៃដល់ព្យាយាមដុតកំទេចបន្ទប់ផ្ទះជួលនោះទៀត តែមិនបានសម្រេច។
បើតាមរបាយការណ៍នគរបាលស្រុកកំរៀងបានឲ្យដឹងថា ជនសង្ស័យឈ្មោះ ជិន សុហេង អាយុ៤៧ឆ្នាំ ស្នាក់នៅផ្ទះជួលបណ្ដោះអាសន្នត្រង់ចំណុចកើតហេតុខាងលើ។ ដោយឡែកជនរងគ្រោះឈ្មោះ ហេង ម៉ាច ភេទស្រី អាយុ៣៨ឆ្នាំ ស្នាក់នៅបន្ទប់ជួលខាងលើនេះដែរ។
សមត្ថកិច្ចបានឲ្យដឹងថា ជនសង្ស័យត្រូវកម្លាំងនគរបាលការិយាល័យជំនាញ នៃស្នងការខេត្ត សហការជាមួយកម្លាំងនគរបាលស្រុកកំរៀង ធ្វើការស្រាវជ្រាវឃាត់ខ្លួនបាន ក្រោយពីធ្វើសកម្មភាពបានប៉ុន្មានម៉ោង។ ជននេះបានគាស់ទំលុះពិតានបន្ទប់ដេករបស់ជនរងគ្រោះ រួចចុះទៅរើកកាយលួចយកលុយស្ត្រីរងគ្រោះអស់ចំនួន១០ម៉ឺនបាត ខណៈដែលស្ត្រីរងគ្រោះចេញទៅធ្វើការនៅក្នុងកាស៊ីណូបាត់។
បើតាមសមត្ថកិច្ចប្រាប់បន្តថា ក្រោយពេលត្រូវឃាត់ខ្លួនភ្លាម ជនសង្ស័យព្យាយាមបដិសេធថា ខ្លួនមិនពាក់ព័ន្ធនឹងករណីចូលលួចលុយស្ត្រីខាងលើនេះទេ។ ប៉ុន្តែក្រោយពីធ្វើការស្រាវជ្រាវ ដែលមានការផ្ដល់តម្រុយ និងបង្ហាញស្លាកស្នាមខ្លះពីកម្លាំងបច្ចេកទេសវិទ្យាសាស្ត្រផង ទើបក្រោយមកជនសង្ស័យរូបនេះឆ្លើយសារភាព និងបានប្រគល់ភស្ដុតាងជូនសមត្ថកិច្ចវិញ។
មន្ត្រីបច្ចេកទេសនិយាយថា នៅក្នុងបន្ទប់កើតហេតុ គេរកឃើញដបសាំងមួយដបដែលភ្ជាប់ជាមួយធូបប៉ុន្មានសរសៃទៀតផង ដែលគេសង្ស័យថា ជារបស់ជនដៃដល់ធ្វើក្នុងគោលបំណងអ្វីមួយក្រោយពេលប្រព្រឹត្តបទល្មើស។
បន្ទាប់ពីមន្ត្រីជំនាញរកឃើញភស្ដុតាងគ្រប់គ្រាន់ ជនសង្ស័យបានសារភាពថា ខ្លួនពិតជាធ្វើសកម្មភាពចូលបន្ទប់ជួលលួចយកលុយចំនួន១០ម៉ឺនបាតនោះមែន។ ជននេះសារភាពទៀតថា ពេលខ្លួនទំលុះពិតានចូលលួចលុយរួច ខ្លួនក៏យកសាំងមួយដបទៅជាមួយដែរ។ ជននេះបញ្ជាក់ថា ក្រោយពីលួចលុយបាន ខ្លួនបានយកធូបចងភ្ជាប់នឹងដបសាំងក្នុងគោលបំណងដុតកំទេចបន្ទប់ជួយនោះ តែពេលនោះធូបបានរលត់ក្រោយពេលខ្លួនចាកចេញផុត។
មន្ត្រីបចេ្ចកទេសក៏បញ្ជាក់ដែរថា ភ្លើងធូបបានរលត់ពេលឆេះបានត្រឹមពាក់កណ្ដាល បើមិនដូច្នេះទេកុំថា ឡើយបន្ទប់ជួលរបស់ជនរងគ្រោះ សូម្បីបន្ទប់ផ្ទះជួលដទៃទៀតនៅក្បែរនោះក៏ត្រូវរលាយហិនហោចដែរ។
លោកឧត្តមសេនីយ៍ត្រី ជេត វណ្ណនី ស្នងការរងខេត្ត មានប្រសាសន៍ថា ក្រោយពីសួរនាំជននេះសារភាពអំពីទង្វើរបស់ខ្លួន ហើយថែមទាំងប្រគល់លុយដែលខ្លួនលួចបានឲ្យទៅសមត្ថកិច្ចវិញទៀតផង។ លោកស្នងការរងបញ្ជាក់ថា ពេលនេះលោកស្នងការខេត្ត បានបញ្ជាឲ្យមន្ត្រីជំនាញសាកសួរជនសង្ស័យ ដើម្បីកសាងសំណុំរឿងបញ្ជូនទៅតុលាការចាត់ការតាមនីតិវិធីហើយ៕
ចែករំលែកព័តមាននេះ