រាជធានីភ្នំពេញ ៖ ក្នុងពិធីសំណេះសំណាលជាមួយមន្ត្រីរាជការក្រោមឱវាទរដ្ឋបាលខណ្ឌចម្ការមន នៅសាលាខណ្ឌចម្ការមន កាលពីរសៀលថ្ងៃទី២៨ កញ្ញា លោកឃួង ស្រេង អភិបាលរាជធានីភ្នំពេញ បានដាក់បម្រាមដាច់ខាតដោយមិនឲ្យមានរថយន្តធំៗ ចេញ ចូល រាជធានីភ្នំពេញ នៅពេលថ្ងៃ និងប្រកាសលុបបំបាត់មិនឲ្យមានប័ណ្ណអនុញ្ញាតចេញ ចូលរាជធានីប្រភេទ A-B និងC ទៀតទេ។ ក្នុងពិធីសំណេះសំណាលនោះ លោក ឃួង ស្រេង មានប្រសាសន៍ថា ចាប់ពីពេលនេះតទៅឡានធំ ចេញ ចូលរាជធានីភ្នំពេញពេលថ្ងៃ មិនអនុញ្ញាតឲ្យមានដាច់ខាត ហើយក៏លែងឲ្យមានការកំណត់ម៉ោងនេះ ឬម៉ោងនោះចេញ ចូលក្រុងដូចមុនទៀតដែរ ដូចជាប័ណ្ណអនុញ្ញាតចេញ ចូលA-B និងCជាដើម។
លោកបន្តថា កន្លងមកនេះ រថយន្តចេញ ចូលរាជធានីភ្នំពេញបានតាមចិត្ត ឲ្យតែមានប័ណ្ណអនុញ្ញាតចេញ ចូលក្រុងប្រភេទA-B និងCនេះ បង្កឲ្យមានគ្រោះថ្នាក់ និងកកស្ទះចរាចរណ៍ក្នុងរាជធានីភ្នំពេញ។ លោក ឃួង ស្រេង បានឲ្យដឹងទៀតថា រឿងប័ណ្ណអនុញ្ញាតចេញ ចូលក្រុងប្រភេទA-B និងCនេះ គេអាចថតចម្លងបានយ៉ាងស្រួល ហើយនរណាគេជាអ្នកយកមកពិនិត្យថា ពិតឬមិនពិតនោះ គឺធ្វើឲ្យរថយន្តធំឆ្លៀតឱកាសចេញ ចូលក្រុងបាន។ ដូច្នេះចាប់ពីពេលនេះតទៅឡានធំ ចេញ ចូលរាជធានីភ្នំពេញពេលថ្ងៃ មិនអនុញ្ញាតឲ្យមានជាដាច់ខាត តែអាចចេញចូលក្រុងបានចាប់ពីម៉ោង ៨ទៅ៩យប់ តែសម្រាប់ផ្លូវបីមិនឲ្យរថយន្តធំឆ្លងកាត់ដាច់ខាតនោះ គឺផ្លូវព្រះមុនីវង្ស ស៊ីសុវត្ថិ និងផ្លូវព្រះនរោត្តម។
លោក ឃួង ស្រេង បានបញ្ជាក់ថា ខណ្ឌចម្ការមន មានតែសង្កាត់ទន្លេបាសាក់មួយ ដែលរៀបចំសណ្តាប់ធ្នាប់នៅមិនទាន់ល្អ ជាពិសេសការចត និងលក់ដូរតាមចិញ្ចើមផ្លូវមិនមាន សណ្តាប់ធ្នាប់ធ្វើឲ្យប៉ះពាល់ដល់សោភ័ណភាពទីក្រុង និងមានការកកស្ទះចរាចរណ៍ ដែលសុំឲ្យសង្កាត់នេះ ពង្រឹងការងាររៀបចំសណ្តាប់ធ្នាប់ល្អប្រសើរឡើងវិញ។ ប៉ុន្តែទោះជាយ៉ាងណា លោក ឃួង ស្រេង បានថ្លែងនូវការកោតសរសើរចំពោះរដ្ឋបាលខណ្ឌចម្ករមន រួមទាំងកម្លាំងមានសមត្ថកិច្ចទាំងអស់ ដែលកន្លងមក បានយកអស់កម្លាំងកាយចិត្តក្នុងកិច្ចការពារ សន្តិសុខ សណ្តាប់ធ្នាប់ រួមនឹងការផ្តល់សេវាជូនប្រជាពលរដ្ឋបាលល្អប្រសើរ រហូតទទួលបានស្នាដៃ ជាច្រើន។
លោក ព្រំ សំខាន់ អភិបាលខណ្ឌចម្ការមន ក្នុងឱកាសនោះបានលើកឡើងពីបទល្មើសពាក់ព័ន្ធ ភូមិសង្កាត់មានសុវត្ថិភាព ក្នុងត្រីមាសទី៣នេះ ដោយធ្វើការបង្ក្រាបបទល្មើសលួច ឆក់ប្លន់ បានជាច្រើន ករណី ហើយការងារនេះរដ្ឋបាលខណ្ឌ ក៏បាន និងកំពុងធ្វើរាល់ថ្ងៃផងដែរ ដើម្បីរក្សាសន្តិសុខ សុវត្ថិភាពជូនប្រជាពលរដ្ឋក្នុងខណ្ឌឲ្យបានកាន់តែល្អប្រសើរ។ លោកបន្តថា ក្រៅពីភូមិ សង្កាត់មានសុវត្ថិភាព ការកសាងនូវហេដ្ឋានរចនាសម្ព័ន្ធ ក៏បាននឹងកំពុងកសាង ជួសជុលផ្លូវ លូ ជាច្រើនខ្សែ ការផ្តល់អត្តសញ្ញាណប័ណ្ណ និងសេវាកម្មផ្សេងៗជូនប្រជាពលរដ្ឋក៏បាន និងកំពុងធ្វើយ៉ាងសកម្មផងដែរ។
ចំណែកមន្ត្រីរដ្ឋបាលខណ្ឌចម្ការមន បានលើកឡើងពីសំណូមពរ របស់ប្រជាពលរដ្ឋលើបញ្ហាបង្គោលភ្លើងនៅតាមផ្លូវសាធារណៈ ពិសេសតាមផ្លូវ៤៣០ ពីរង្វង់មូលផ្សារដើមថ្កូវ ដល់ក្រោយមន្ទីរពេទ្យរុស្ស៊ី បញ្ហាលូ បញ្ហាដើមឈើងាប់ហើយកាប់មិនបាន និងបញ្ហាសំរាម ដែលក្រុមហ៊ុនស៊ីនទ្រី ប្រមូលមិនទាន់ពេលជាដើម ដែលធ្វើឲ្យប្រជាពលរដ្ឋមានការថ្នាំថ្នាក់ផងដែរ៕
ចែករំលែកព័តមាននេះ