ខេត្តកំពង់ចាម ៖ សេចក្តីរាយការណ៍ព័ត៌មានបានឲ្យដឹថា កាលពីថ្ងៃទី២៩ កញ្ញា ២០១៨ សមត្តកិច្ចនគរបាលក្រុងកំពង់ចាម និងស្រុកព្រៃឈរ រួមជាមួយកម្លាំងការិយាល័យជំនាញ ខេត្តកំពង់ចាម បានសហការធ្វើការបង្ក្រាបករណីជួញដូរ និងប្រេ់ប្រាស់ដោយខុសច្បាប់ នូវសារធាតុញៀន២ករណី និង ឃាត់ខ្លួនជនសង្ស័យចំនួន១៣នាក់ ស្រី២នាក់ រឹបអូសវត្ថុតាងសង្ស័យថ្នាំញៀនមាន ម្សៅក្រាមពណ៌ស ២៣កញ្ចប់ (ធំ៤កញ្ចប់ និងតូច១៩កញ្ចប់) ទូរស័ព្ទដៃ៩គ្រឿង ម៉ូតូ៣គ្រឿង រថយន្ត១គ្រឿង និងឧបករណ៍សេពគ្រឿងញៀន មួយចំនួនទៀត។ ជនសង្ស័យ និងសារធាតុញៀនទាំងនោះ ត្រូវបានសមត្ថកិច្ចកសាងសំណុំរឿងបញ្ជូនទៅកាន់ សាលាដំបូងខេត្តតាមនីតិវិធី។
ចំណែកនៅមន្ទីរប្រឆាំងគ្រឿងញៀនក្រសួងមហាផ្ទៃវិញ កំពុងមានការបែកធ្លាយ រឿងមិនប្រក្រតីខ្លះដែលថា មាននាយករងមន្ទីរប្រឆាំងគ្រឿងញៀន ២ទៅ៣នាក់ ជាប់ពាក់ព័ន្ធជាមួយបងប្អូនរកស៊ីជួញដូរគ្រឿងញៀន។ អ្នកដឹងរឿងបានទម្លាយទៀតថា បើធ្វើជានាយករងមន្ទីរប្រឆាំងគ្រឿងញៀន ហើយមានបងប្អូនរកស៊ីជួញដូរគ្រឿងញៀននោះ គួរតែថ្នាក់លើផ្លាស់ប្តូរចេញទៅ។ មិនធម្មតាទេ ដល់ទៅនាយករងមន្ទីរ ពាក់ថ្នាក់ឧត្តមសេនីយ៍ទោ (ផ្កាយ២) ទុកនៅតទៅទៀត ហាក់បីដូចនៅការពារ (កាង) បទល្មើសគ្រឿងញៀនដូច្នោះដែរ បើមានមែនដកចោលទៅ។
រឿងបែកធ្លាយនាយករងមន្ទីរមានបងប្អូន ជួញដូរគ្រឿងញៀននោះ គេមានជំជឿថា លោកនាយឧត្តមសេនីយ៍ ម៉ក់ ជីតូ អគ្គស្នងការរងនគបាលជាតិ មិនទាន់ជ្រាបទេ បើសិនរឿងនេះលោកនាយឧត្តមសេនីយ៍អគ្គស្នងការរង ដឹងមែនលោកមិនទុកមន្ត្រីធុននឹងឡើយ ។ ព្រោះកន្លងមកលោកនាយឧត្តមសេនីយ៍ ធ្លាប់ចាត់ការលើមន្ត្រីតូចតាច បម្រើការងារនៅមន្ទីរប្រឆាំងគ្រឿងញៀន ខិលខួចពាក់ព័ន្ធជួញដូរគ្រឿងញៀនរួចហើយ។ ដូច្នេះគេសង្ឃឹមថា ការបែកធ្លាយមាននាយករងមន្ទីរ២ទៅ៣ នាក់ មានបងប្អូនរកស៊ីគ្រឿងញៀន ប្រាកដជាត្រូវដោះដូរកន្លែងជាក់ជាមិនខាន៕
ចែករំលែកព័តមាននេះ