ខេត្តបាត់ដំបង៖ បន្ទាប់ពីកម្លាំងស្នងការដ្ឋានខេត្តចុះបង្ក្រាបទីតាំងកត់កន្ទុយលេខបានចំនួន៤កន្លែង កាលពីរសៀលថ្ងៃទី២៩ កញ្ញា នៅក្នុងស្រុកសំឡូត ស្រាប់តែបែកធ្លាយព័ត៏មានជាហូហែមកថា មេកន្ទុយលេខទាំង៤ទីតាំងនោះ សុទ្ធសឹងជាកន្លែងដែលការពារយ៉ាងរឹងម៉ាំដោយលោកកោ ស៊ុនកាំង អធិការនគរបាលស្រុកសំឡូត តែលោកអធិការូបនេះបានបដិសេធចំពោះការចោទប្រកាន់នេះ។
កម្លាំងកងអន្តរាគមន៏បង្ការ បង្ក្រាប នៃស្នងការដ្ឋានខេត្តដែលទទូលបទបញ្ជាពីលោកស្នងការខេត្តឲ្យចុះប្រតិបត្តិការបង្ក្រាបល្បែងកន្ទុយលេខនេះ បានឲ្យដឹងថា កម្លាំងកងអន្តរាគនមន៏បង្ការ បង្ក្រាប បានចុះបង្ក្រាបទីតាំងកត់កន្ទុយលេខ(លក់ឆ្នោត)ចំនួន៤គោលដៅធំៗនៅក្នុងឃុំកំពង់ល្ពៅ ឃុំស៊ុង និងឃុំតាសាញ នៅស្រុកសំឡូត។ មន្ត្រីដដែលបានប្រាប់ថា ទីតាំងកត់កន្ទុយលេខទាំងនេះ និងជាច្រើនកន្លែងទៀតដែលកំពុងដំណើរការពាសពេញស្រុកសំឡូត សុទ្ធតែជ្រោកក្រោមស្លាកក្រុមហ៊ុន«ឆ្នោតខ្មែរ»។
បើតាមរបាយការណ៍បានឲ្យដឹងថា នៅក្នុងកិច្ចប្រតិបត្តិការនេះកម្លាំងសមត្ថកិច្ចបានឃាត់ខ្លួនមេកន្ទុយលេខចំនួន៤នាក់មាន ១-ឈ្មោះមាស យីន ប្រុសអាយុ៣៣ឆ្នាំ រស់នៅភូមិសុង១ ឃុំសុង ស្រុកសំឡូត ២-ឈ្មោះជួន សៀកហេង ប្រុសអាយុ៤៧ឆ្នាំ នៅភូមិអូរទទឹម ឃុំតាសាញ ស្រុកសំឡូត ដែលមានទីតាំងលក់កន្ទុយលេខនៅក្នុងផ្សារ ៣-ឈ្មោះងឿន រីណា ស្រីអាយុ២៩ឆ្នាំ និង៤,ឈ្មោះគ្រី សុគុណ ប្រុសអាយុ៣៩ឆ្នាំ ទាំង២នាក់រស់នៅក្នុងភូមិព្រៃធំ ឃុំកំពង់ល្ពៅ ស្រុកសំឡូត។ ក្រៅពីឃាត់ខ្លួនមេកន្ទុយលេខ៤នាក់ សមត្ថកិច្ចក៏បានដកហូតនូវវត្តុតាងមួយចំនួនផងដែរ ដែលពាក់ព័ន្ធនឹងបទល្មើសនេះ។
ជាមួយនឹងការបង្ក្រាបមេកន្ទុយលេខនៅស្រុកសំឡូត ដែលមិនធ្លាប់មានពីមុនមកនេះ ស្រាប់តែបែកធ្លាយនូវរឿងអាស្រូវជាច្រើនរវាងមេកន្ទុយលេខនិងមន្ត្រីនគរបាល។ ជាពិសេលោកអធិការស្រុកសំឡូតតែម្ដង ដែលគេសង្ស័យថា មានជាប់ពាក់ព័ន្ធយ៉ាងកៀកបំផុតជាមួយនឹងល្បែងកន្ទុយលេខនេះ។
ប្រភពព័ត៌មានដែលគួរឲ្យទុកចិត្តមួយ បានប្រាប់កោះសន្តិភាពតាមទូរស័ព្ទថា បច្ចុប្បន្នទីតាំងកត់កន្ទុយលេខនៅក្នុងស្រុកសំឡូតមានស្ទើរគ្រប់ទីកន្លែងទាំងនៅតាមបណ្ដាឃុំនិងនៅក្នុងផ្សារស្រុកសំឡូត។ ទីតាំងទាំងនោះសុទ្ធតែមានសមត្ថកិច្ចធ្វើជាខ្នងបង្អែកយ៉ាងរាំម៉ាំទៀតផង។
ប្រភពដដែលបានឲ្យដឹងថា ដំបូងឡើយរាល់ទីតាំងកត់កន្ទុយលេខទាំងនោះ ត្រូវបង់សំណូកឲ្យលោកអធិការស្រុក ក្នុង១ខែចាប់ពី២០ដុល្លារហូតដល់១០០ដុល្លាតាមទីតាំងតូចឬធំ។ ប៉ុន្តែប្រហែល៣ឬ៤ខែកន្លងទៅនេះ ត្រូវបានកែប្រែកម្មវិធីតាមបទបញ្ជាលោកកោ ស៊ុនកាំង អធិការស្រុកវិញ។
មន្ត្រីមួយរូបក៏បានទម្លាយនូវរឿងប្រព្រឹត្តអំពើពុករលួយនេះ ស្រដៀងគ្នានឹងប្រភពខាងលើដែរថា ប៉ុន្មានខែកន្លងទៅនេះលោកកោ ស៊ុនកាំង អធិការស្រុកសំឡូត បានដាក់ផែនការឲ្យមេប៉ុស្ដិ៍គ្រប់ឃុំ កោះហៅមេកន្ទុយលេខដែលមាននៅក្នុងមូលដ្ឋានរបស់ខ្លួនឲ្យចូលទៅកាន់ប៉ុស្តិ៍រដ្ឋបាល ដើម្បីប្រជុំពិភាក្សាគ្នាអំពីរឿងលក់កន្ទុយលេខ។
មន្ត្រីរូបនេះបាននិយាយថា លោកស៊ុនកាំង បានណែនាំឲ្យលោកមេប៉ុស្ដ៏ទាំងអស់ត្រូវចាប់បង្ខំឲ្យខាងតែបានដល់មេកន្ទុយលេខទាំងនោះ ដាច់ខាតត្រូវតែលក់ឡើងឲ្យមេឆ្នោតដ៏ធំមហិមាម្នាក់ឈ្មោះប៊ុន ចាន់តូ ដែលប្រភពខ្លះថា មេឆ្នោតដ៏ធំនេះនៅបាត់ដំបងនិងខ្លះទៀតថា នៅខេត្តប៉ៃលិន តែបើអ្នកកត់កន្ទុយលេខណាមិនព្រមឡើងឲ្យមេធំឈ្មោះប៊ុន ចាន់តូ នោះទេ លោកអធិការដ៏មហិមានេះនឹងបញ្ជាឲ្យបង្ក្រាបភ្លាមៗតែម្ដង។ ព្រោះឈ្មោះតូ នេះជាអ្នកម៉ៅផ្ដាច់នៅក្នុងស្រុកសំឡូត។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ