ប្រទេសឥណ្ឌូណេស៊ី ៖ មនុស្សជាច្រើនរយនាក់បានស្លាប់ដោយសារការរញ្ជួយដីខ្លាំងមួយ បន្ទាប់មកមានស៊ូណាមី ដែលកើតមានកាលពីថ្ងៃទី២៨ កញ្ញា នៅកោះសេឡែបឥណ្ឌូណេស៊ី។
ក្នុងសន្និសីទសារព័ត៌មានមួយកាលពីថ្ងៃទី២៩ កញ្ញា លោកSUTOPO PURWO NUGROHO អ្នកនាំពាក្យនៃទីភ្នាក់ងារគ្រប់គ្រងគ្រោះមហន្តរាយថ្លែងថា តាមតួលេខរបស់បណ្ដាមន្ទីរពេទ្យមនុស្ស៣៨៤នាក់ស្លាប់ ហើយអ្នករងរបួសមានដល់៥៤០នាក់។
យើងដាក់ពង្រាយមនុស្សជាច្រើនពាន់នាក់ ជាពិសេសកងយោធា និងប៉ូលិសដើម្បីជួយសង្គ្រោះ។ សម្រាប់ពេលនេះប្រជាជន១៧.០០០នាក់ត្រូវបានជម្លៀសចេញ ខណៈតួលេខនោះនឹងមានការកើនឡើងថែមទៀត។
តាមរូបភាពនានាមកពីក្រុងប៉ាលូមានប្រជាជន៣៥០.០០០នាក់ ស្ថិតនៅឆ្នេរសមុទ្រខាងលិចនៃកោះសេឡែប គេអាចឃើញបណ្ដាសាកសពមនុស្សនៅរាយប៉ាយជិតមាត់សមុទ្រ ហើយសាកសពមួយចំនួនគ្របដោយភួយពណ៌ខៀវ។ បណ្ដាខ្មោចរថយន្តរាយប៉ាយ អគារនានារងការបំផ្លាញ ក្នុងនោះមានបណ្ដាមន្ទីរពេទ្យ និងសណ្ឋាគារ ដើមឈើនិងបង្គោលភ្លើងរលំបាក់។
ទាំងនេះអាចបញ្ជាក់ពីកម្លាំងខ្លាំងនៃការរញ្ជួយដីនោះដែលញ័ររង្គើរដល់ចម្ងាយច្រើនរយគីឡូម៉ែត្រ ព្រមទាំងរលកធំៗកម្ពស់ជិត២ម៉ែត្របោកមកច្រាំង ចំណែកនាភាគកណ្ដាលក្រុងទីណាក៏មានសុទ្ធតែការបំផ្លិចបំផ្លាញដែរ ។
ប្រជាជនក្រុងប៉ាលូ នាំគ្នាយកប្ញស្សីធ្វើជម្រក ឬដេកកណ្ដាលវាល តាមទីលានបាល់ទាត់នានា ខ្លាចមានការញ័ររញ្ជួយបន្តទៀត។ ចំណែកពួកអ្នកជួយសង្គ្រោះប៉ុនប៉ងចូលឲ្យទៅដល់ បណ្ដាតំបន់ដាច់ស្រយាល ហើយពេលរង់ចាំជំនួយអន្តរជាតិ ប្រជាជនមូលដ្ឋានប្រឈមមុខនឹងការគ្មានអ្វីចាំបាច់ដែលត្រូវការសម្រាប់រស់ ដូចជាស្បៀង និងជម្រកជាដើម។
ទីភ្នាក់ងារគ្រប់គ្រងគ្រោះមហន្តរាយក៏មានការបារម្ភផងដែរដល់វាសនារបស់មនុស្សច្រើនរយនាក់ដែលធ្វើការសម្រាប់ការរៀបចំមហោសពមួយនៅមាត់សមុទ្រនៃក្រុងប៉ាលូនាយប់ថ្ងៃទី២៨កញ្ញា មុនពេលមានស៊ូណាមីបន្តិច។
មន្ទីរពេទ្យមួយចំនួនរងការខូចខាត ហើយមន្ទីរពេទ្យឯទៀតៗមានការបញ្ជូនសាកសពមនុស្សនិងអ្នករបួសពេញណែន។បណ្ដាអ្នករបួសត្រូវធ្វើការព្យាបាលកណ្ដាលវាល។ ការរញ្ជួយដីនេះវាយប្រហារជាពិសេសក្រុងប៉ាលូនិងតំបន់DONGGALAដែលនៅក្បែរ។
គេគិតថាមនុស្សច្រើនសិបនាក់ឬជនរងគ្រោះច្រើនរយនាក់នៅជាប់ក្រោមគំនរបាក់បែក។ មជ្ឈមណ្ឌលពាណិជ្ជកម្មសំខាន់នៃក្រុងប៉ាលូត្រូវរលំបាក់។ ការរញ្ជួលដីនេះមានកម្លាំង៧,៥រីស្ទ័រជាមួយការកើតមានស៊ូណាមី។ចំណុចកណ្ដាលរបស់វាស្ថិតនៅចម្ងាយ៧៨គីឡូម៉ែត្រខាងជើងក្រុងប៉ាលូ៕
ចែករំលែកព័តមាននេះ