រាជធានីភ្នំពេញ ៖ ក្នុងករណីទំនាស់ពាក្យសម្តី ប្អូនថ្លៃកាប់បងថ្លៃ បណ្តាលឱ្យរងរបួសដាច់ម្រាមដៃអស់បី ហើយត្រូវបងថ្លៃទាមទារសំណង២៥០០ដុល្លារ តែប្អូនថ្លៃគ្មានលុយ ប្តឹងប៉ូលិសឱ្យចាប់ខ្លួន កាលពីវេលាម៉ោង៧និង៣០នាទីយប់ថ្ងៃទី២៩ ខែកញ្ញា ឆ្នាំ២០១៨ ស្ថិតនៅក្នុងភូមិត្រពាំងពោធិ សង្កាត់ចោមចៅ៣ ខណ្ឌពោធិសែនជ័យ ។
ជនរងគ្រោះឈ្មោះ សិដ្ឋ សុខ ភេទប្រុស អាយុ៣៧ឆ្នាំ មានទៅលំនៅភូមិត្រពាំងពោធិ សង្កាត់ចោមចៅ៣ ខណ្ឌពោធិសែនជ័យ ត្រូវជាបងថ្លៃ។ ចំណែកជនសង្ស័យត្រូវជាប្អូនថ្លៃឈ្មោះ ប៊ិន ណារ៉ា ហៅអូន ភេទប្រុស អាយុ២៨ឆ្នាំ មានទីលំនៅផ្ទះក្បែរខាងគ្នា ក្នុងភូមិខាងលើ ។
តាមសម្តីជនរងគ្រោះត្រូវជាបងថ្លៃបានឲ្យដឹងថា មុនកើតហេតុ ខណៈដែលខ្លួនរួមជាមួយអ្នកជិតខាងត្រូវជាបងប្អូនចំនួន៥នាក់ អង្គុយផឹកស៊ីនៅមុខផ្ទះ ដោយមានចាក់ធុងបាសកំដរផង នោះ ស្រាប់តែប្អូនសាច់ថ្លៃបានដើរមកប្រាប់ឲ្យបិទធុងបាស់ រកដេកពួនមិនបាន តែមិនបានប្រាប់ឲ្យស្រួលបួលទេ ក៏កើតជាទំនាស់ពាក្យសម្តី ហើយប្អូនថ្លៃដើរចូលក្នុងផ្ទះ ទាញកាំបិតផ្គាក់ មកវិញកាប់តែម្តង បណ្តាលឲ្យបងថ្លៃរងរបួសដាច់ម្រាមដៃឆ្វេងអស់៣ ហូរឈាមកក្លាក់ បង្កឲ្យភ្ញាក់ផ្អើលឆោឡោ ពេលនោះសមត្ថកិច្ចក៏បានចុះទៅអន្តរាគមន៍ ដោយហៅភាគីទាំង២ មកនិយាយគ្នា និងសាកសួរនៅប៉ុស្តិ៍ចោមចៅ៣ផងដែរ ។
តាមប្រភពពីសាច់ញាតិរបស់ភាគីទាំង២ បានឲ្យដឹងថា ជនរងគ្រោះត្រូវជាបងថ្លៃទាមទារសំណង២៥០០ដុល្លារ តែដោយប្អូនថ្លៃគ្មានលុយឲ្យ ទើបជនរងគ្រោះប្តឹងសមត្ថកិច្ចឱ្យឃាត់ខ្លួនជនសង្ស័យតែម្តង ។
ជនសង្ស័យត្រូវបានសមត្ថកិច្ចឃាត់ខ្លួនដើម្បីកសាងសំណុំរឿងបញ្ជូនទៅផ្នែកជំនាញអធិការដ្ឋានខណ្ឌចាត់ការតាមនីតិវិធី ៕
ចែករំលែកព័តមាននេះ