រាជធានីភ្នំពេញ ៖ ប្រព័ន្ធតាមដាន GPS បាននាំផ្លូវកម្លាំងនគរបាលប៉ុស្តិ៍ចោមចៅ១ និងនគរបាលប៉ុស្តិ៍ភ្លើងឆេះរទេះទៅធ្វើការឆែកឆេររកឃើញម៉ូតូជាច្រើនគ្រឿង រួមជាមួយសម្ភារៈពាក់ព័ន្ធទៅនឹងអំពើចោរកម្មមួយចំនួនទៀតផងដែរ ប៉ុន្តែគួរឲ្យសោកស្ដាយចោរគេចខ្លួនបាត់នៅតែស្ត្រីជាសង្សារម្នាក់ត្រូវឃាត់ខ្លួនទៅសួរនាំ។ ប្រតិបត្តិការនេះធ្វើឡើងកាលពីម៉ោង៣និង៣០ រសៀល ថ្ងៃទី២៩ កញ្ញា ឆ្នាំ២០១៨ នៅបន្ទប់លេខ១ និងបន្ទប់១១២៣ ផ្ទះជួល ស្ថិតនៅក្នុងភូមិទួលពង្រ សង្កាត់ចោមចៅទី១ ខណ្ឌពោធិ៍សែនជ័យ។
នគរបាលបានឲ្យដឹងថា ស្ត្រីដែលជាសង្សាររបស់ជនសង្ស័យខាងលើឃាត់ខ្លួននាំទៅសាកសួរ នោះឈ្មោះ ជឿន សុផា អាយុ១៩ឆ្នាំ ស្នាក់នៅបន្ទប់ជួល ដែលជនសង្ស័យលាក់ទុកម៉ូតូដែលលួចបាន ចំណែកជនសង្ស័យបានគេចខ្លួនបាត់ស្រមោល។
ចំណែកមូលហេតុឈានដល់ការចុះឆែកឆរបន្ទប់ជួលទាំ២ខាងលើ ដោយសារតែកាលពីម៉ោងប្រហែល១១ថ្ងៃព្រឹកថ្ងៃកើតហេតុមានម៉ូតូមួយគ្រឿងម៉ាកហុងដាឌ្រីម សេ១២៥ ស៊េរីឆ្នាំ២០១៥ ពាក់ស្លាកលេខភ្នំពេញ 1DG- 5386 ត្រូវចោរលួចកាច់សោរ.កចេញពីសង្កាត់ភ្លើងឆេះរទេះ ដោយម៉ូតូនោះមានភ្ជាប់ប្រព័ន្ធតាមដាន GPS ទៀតផង ។ ក្រោយពេលដឹងថា បាត់ជនរងគ្រោះប្ដឹងសុំឲ្យនគរបាលប៉ុស្តិ៍ភ្លើងឆេះរទេះជួយអន្តរាគមន៍។
ប្រភពដដែលបន្តថា ខណៈនោះនគរបាលសហការជាមួយម្ចាស់ម៉ូតូស្រាវជ្រាវភ្លាមៗតាមរយៈប្រព័ន្ធ GPS ចង្អុលបង្ហាញទៅកាន់ប្លុកផ្ទះជួលខាងលើ ទើបកម្លាំងនគរបាលប៉ុស្តិ៍ភ្លើងឆេះរទេះសហការជាមួយកម្លាំងនគរបាលប៉ុស្តិ៍ចោមចៅ១ ធ្វើការឆែកឆេរបន្ទប់ជួលគ្មានលេខមួយនៅក្នុងភូមិទួលពង្រ ។
បន្ទាប់មកប្រទះឃើញម៉ូតូដែលត្រូវចោរលួចកាច់សោ.កខាងលើ រួមនឹងម៉ូតូ២គ្រឿងផ្សេងទៀតសុទ្ធតែមានស្នាមគាស់បំបែកសោរទាំងអស់ រួមជាមួយឧបករណ៍ដាប់លេខលេខតួម៉ាស៊ីន និងលេខតួម៉ូតូ ព្រមទាំងស្លាកលេខម៉ូតូ ដុំសោម៉ូតូសម្រាប់ដូរ និងស្លាកលេខមួយចំនួន ហើយក៏ ឃើញមានស្ត្រីម្នាក់ដែលអះអាងថា ជាសង្សារជនសង្ស័យកំពុងស្ថិតនៅក្នុងបន្ទប់នោះ ហើយកម្លាំងក៏ឃាត់ខ្លួនដើម្បីសួរនាំផងដែរ។
ក្រោយពេលសាកសួរស្ត្រីខាងលើនិយាយថា ម៉ូតូទាំងនោះត្រូវសង្សាររបស់នាងយកទៅទុកក្នុងបន្ទប់នោះ ហើយនាងមិនដឹងថា សង្សារគឺជាចោរឡើយ ព្រោះប្រុសស្នេហ៍រូបនេះប្រាប់នាងថា គេគឺជាអ្នករកស៊ីគួកជេរទិញ និងលក់ម៉ូតូ ហើយនាងក៏មិនចាប់អារម្មណ៍ថា ជននោះកុហកនាងឡើយ។ បន្ទាប់មកស្ត្រីរូបនេះបាននាំកម្លាំងនគរបាលប៉ុស្តិ៍ទាំងពីរចុះទៅធ្វើការឆែកនៅក្នុងបន្ទប់ជួលមួយទៀតលេខ១១២៣ ស្ថិតនៅចម្ងាយប្រមាណ២គីឡូម៉ែត្រពីគ្នា ដោយដកហូតម៉ូតូចំនួន២គ្រឿងបន្ថែមទៀត ព្រមទាំងស្លាកលេខ និងកាតគ្រីផងដែរ។
ប្រតិបត្តិការខាងលើនោះ កម្លាំងនគរបាលដកហូតបានម៉ូតូម៉ាកហុងដាឌ្រីមសេ១២៥ ចំនួន៤គ្រឿង ក្នុងនោះស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ 1DG-6883 ,ស៊េរីឆ្នាំ២០១៥ ពណ៌ខ្មៅ ពាក់ស្លាកលេខភ្នំពេញ1DG-5386, ស៊េរីឆ្នាំ២០១៦ ពណ៌ខ្មៅ ពាក់ស្លាកលេខភ្នំពេញ1HB-4968, និងស៊េរីឆ្នាំ២០១៤ ពណ៌ខ្មៅ ពាក់ស្លាកលេខភ្នំពេញ 1CO-0510 ។ ព្រមទាំងម៉ូតូធំ ម៉ាក MS ១គ្រឿងពាក់ស្លាកលេខភ្នំពេញ1DM-0996 និងស្លាកលេខម៉ូតូចំនួន៩បន្ទះ, កាតគ្រីចំនួន៦សន្លឹក, ដុំសោរម៉ូតូ, ឧបករណ៍សម្រាប់ដាប់លេខម៉ូតូ រួមនឹងសម្ភារៈ និងគ្រឿងបន្លាស់ម៉ូតូជាច្រើនទៀត។
បន្ទាប់មកកម្លាំងបានធ្វើការស្រាវជ្រាវ ដើម្បីចាប់ខ្លួនជនសង្ស័យដែលជាចោរលួចកំពុងរត់គេចខ្លួន ហើយនៅមិនទាន់ដឹងថា ថ្នាក់លើចាត់ការចំពោះស្ត្រីជាសង្សារជនសង្ស័យបែបណានៅឡើយ៕
ចែករំលែកព័តមាននេះ