ខេត្តព្រៃវែង ៖ យុវជនម្នាក់ត្រូវមិត្តភក្តិដែលផឹកស៊ីជាមួយគ្នាកាប់១កាំបិតតាំងតោ បណ្តាលឲ្យរងរបួសធ្ងន់ ដោយសារតែទំនាស់ពាក្យសម្ដីនៅក្នុងពេលផឹកស៊ីជាមួយគ្នា ។ អំពើហិង្សានេះបានកើតឡើងកាលពីវេលាម៉ោង៨និង២៥នាទីយប់ថ្ងៃទី២៨ កញ្ញានេះ នៅចំណុចភូមិព្រែកតាសរ ឃុំព្រែកតាសរ ស្រុកពោធ៌រៀង ខេត្តព្រៃវែង ។
ជនរងគ្រោះខាងលើឈ្មោះ ទ្រី ប៊ីន ភេទប្រុស អាយុ២៣ឆ្នាំ ចំណែកជនបង្កឈ្មោះ ជ័រ សារ៉ត ភេទប្រុស អាយុ១៨ឆ្នាំ អ្នកទាំង២មានទីលំនៅក្នុងភូមិកើតហេតុ ។
ប្រភពព័ត៌មានពីសមត្ថកិច្ចបានឲ្យដឹងថា មុនពេលកើតហេតុជនរងគ្រោះ និងជនបង្ករួមជាមួយមិត្តភក្តិ២ទៅ៣នាក់ផ្សេងទៀតបានបបួលគ្នាផឹកស៊ីជុំគ្នានៅផ្ទះជនបង្កតាមទម្លាប់ធម្មតាដូចសព្វមួយដង ក្នុងនាមមិត្តភក្តិ ប៉ុន្តែពេលផឹកយូរៗស្រវឹងគ្រប់គ្នា ម្នាក់ៗក៏លែងក្លែមម្ហូប ហើយនាំគ្នាក្លែមសម្ដីវិញ ហើយអួតចុះអួតឡើងជនរងគ្រោះ និងជនបង្កបានទាស់សម្ដីគ្នា ហើយក៏កើតទៅជាជម្លោះកញ្ជ្រោលរកវាយគ្នា តែត្រូវបានមិត្តភក្តិដែលផឹកជាមួយឃាត់បំបែកចេញពីគ្នាវិញ ហើយភ្លាមនោះជនបង្កជាម្ចាស់ផ្ទះក៏ស្ទុះទៅទាញបានកាំបិតតាំងតោពីក្រោមផ្ទះយកមកកាប់ជនរងគ្រោះត្រូវចំក្បាល ត្រង់ចំណុចលើគុម្ពត្រចៀកខាងឆ្វេង បណ្តាលឲ្យរយះហូរឈាមជោគខ្លួន ទើបមានការផ្អើលឆោឡោឡើង ។
សមត្ថកិច្ចបានបញ្ជាក់ថា ក្រោយកើតហេតុភ្លាមៗ សមត្ថកិច្ចបានចុះទៅដល់កន្លែងកើតហេតុភ្លាមដែរ ប៉ុន្តែជនបង្កបានរត់គេចខ្លួនបាត់នៅសល់តែជនរងគ្រោះទើបសមត្ថកិច្ចឲ្យក្រុមគ្រួសារនាំយកជនរងគ្រោះទៅសង្គ្រោះនៅឯមន្ទីរពេទ្យបង្អែកស្រុកពារាំង និងធ្វើកំណត់ហេតុ កសាងសំណុំរឿងចាត់ការទៅតាមនីតិវិធី ៕
ចែករំលែកព័តមាននេះ