ខេត្តកំពង់ចាម ៖ ស្ត្រីចំណាស់ម្នាក់បានស្លាប់យ៉ាងអាណោចអាធម៌ ដោយរថយន្តម៉ាកហ៊ីយ៉ានដាយ១គ្រឿង ពាក់ស្លាកលេខព្រះសីហនុ 3A-5742 ដឹកដំឡូងពេញមកបុកពីក្រោយ និងកិនឡើងដាច់ជើងមួយចំហៀងស្លាប់នៅក្រោមរថយន្ត ។ ហេតុការណ៍ការដ៏រន្ធត់នេះកើតឡើងនៅវេលាម៉ោង៨និង១៥នាទីព្រឹកថ្ងៃទី៣០កញ្ញានេះ ត្រង់ចំណុចភូមិអណ្តូងច្រុះ ឃុំអំពិល ស្រុកកំពង់សៀម ។
ស្ត្រីចំណាស់ខាងលើមានឈ្មោះ ស្រ៊ន់ សាវឿន អាយុ៥៨ឆ្នាំ នៅភូមិទី៧ សង្កាត់កំពង់ចាមក្រុងកំពង់ចាម ។ ក្រោយបង្កហេតុរួច អ្នកបើករថយន្តខាងលើបានប្រញាប់រត់គេចខ្លួនបាត់ស្រមោល ។
លោកវរសេនីយ៍ឯក ឯក ប៉ាន់ដន អធិការនគរបាលស្រុកកំពង់សៀមប្រាប់ឲ្យដឹងថា នៅវេលាម៉ោង
ខាងលើស្របពេលដែលស្ត្រីរូបនោះកំពុងតែជិះម៉ូតូវេវម្នាក់ឯង នៅតាមផ្លូវជាតិលេខ៧ ក្នុងទិសដៅពី
លិចមកកើត ដោយមានពាក់មួកសុវត្ថិភាពផងដែរ ។ ស្របពេលដែលមកដល់ត្រង់ចំណុចភូមិអណ្តូងច្រុះនោះក៏ត្រូវបានរថយន្តមកបុកពីខាងក្រោយ បណ្តាលឲ្យមនុស្សចូលក្រោមរថយន្តកិនស្លាប់ភ្លាម ។
អធិការនគរបាលស្រុកកំពង់សៀមប្រាប់បន្តថា រថយន្តក្រោយពីបានកិនមនុស្សស្លាប់ក្នុងទិសដៅស្រប
គ្នានោះ រថយន្តដឹកដំឡូងបានជ្រុលល្បឿនមកបុកគូថរថយន្តម៉ាកហាយឡែនឌ័ ពណ៌ទឹកមាស១ គ្រឿងទៀត ពាក់ស្លាកលេខ ភ្នំពេញ 2N-9895 បើកបរដោយឈ្មោះ ហ៊ាង សុភា ភេទប្រុស អាយុ៤១ឆ្នាំ
នៅភូមិច្រាំងចំរេះទី១ ខណ្ឌឫស្សីកែវ រាជធានីភ្នំពេញ បណ្តាលឲ្យរងការខូចខាតផងដែរ ។
សាក្សីនិយាយថា ក្រោយពីបានបុក និងកិនមនុស្សស្លាប់បែបនេះអ្នកបើកបររថយន្តដឹកដំឡូងបានរត់គេចខ្លួនបាត់ បន្ទាប់មកសមត្ថកិច្ចនគរបាលចរាចរណ៍បានចុះទៅដល់វាសវែង និងបានទាក់ទងសាច់ញាតិឲ្យមកទទួលយកសពទៅធ្វើបុណ្យតាមប្រពៃណី ។ ចំណែកវត្ថុតាងត្រូវបាននាំមករក្សាទុកនៅអធិការដ្ឋាននគរបាលស្រុកកំពង់សៀម ដោះស្រាយតាមច្បាប់ ៕
ចែករំលែកព័តមាននេះ