ខេត្តកំពង់ស្ពឺ ៖ ជនរងគ្រោះចំនួន៣នាក់ បានស្លាប់ភ្លាមៗ និងម្នាក់ទៀតរងរបួសធ្ងន់ ក្នុងគ្រោះថ្នាក់ចរាចរណ៍រវាងរថយន្តបុកជាមួយម៉ូតូកំពុងបើកឆ្លងថ្នល់ ។ គ្រោះថ្នាក់ដ៏រន្ឋត់នេះបានកើតឡើងនៅម៉ោង៨ និង៥នាទីយប់ថ្ងៃទី២៨ ខែកញ្ញា…
ខេត្តកំពង់ស្ពឺ ៖ ជនរងគ្រោះចំនួន៣នាក់ បានស្លាប់ភ្លាមៗ និងម្នាក់ទៀតរងរបួសធ្ងន់ ក្នុងគ្រោះថ្នាក់ចរាចរណ៍រវាងរថយន្តបុកជាមួយម៉ូតូកំពុងបើកឆ្លងថ្នល់ ។ គ្រោះថ្នាក់ដ៏រន្ឋត់នេះបានកើតឡើងនៅម៉ោង៨ និង៥នាទីយប់ថ្ងៃទី២៨ ខែកញ្ញា ឆ្នាំ២០១៨ ស្ថិតតាមបណ្តោយផ្លូវជាតិលេខ៤ ចន្លោះគីឡូម៉ែត្រ៦០-៦១ ក្នុងភូមិត្រពាំងក្រឡាញ់ ឃុំមហាសាំង ស្រុកភ្នំស្រួច ខេត្តកំពង់ស្ពឺ។
ជនរងគ្រោះខាងលើរួមមាន ឈ្មោះកែវ នេត្រា ភេទប្រុស អាយុ៣១ឆ្នាំ ជាអ្នកបើកបរម៉ូតូ ម៉ាកហុងដាឌ្រីមសេ១២៥ ពណ៌ខ្មៅ ពាក់ស្លាកលេខកំពង់ស្ពឺ ១G-៦៦៦៣ រស់នៅភូមិ ឃុំកើតហេតុខាងលើ បានស្លាប់ពេលបញ្ជូនដល់មន្ទីរពេទ្យ។
ចំណែកអ្នកជិះក្នុងរថយន្តម៉ាកម៉ាកឡិចស៊ីស RX300 ពណ៌ទឹកមាស ពាក់ស្លាកលេខ ព្រះសីហនុ ២A-៥៦៥៩ ចំនួន៤នាក់រួមមានឈ្មោះសូ រតនា ភេទប្រុស អាយុ៤២ឆ្នាំ រស់នៅភូមិត្រពាំងខ្លុង ឃុំដំបូករូង ស្រុកភ្នំស្រួច ខេត្តកំពង់ស្ពឺ បានស្លាប់ រីឯអ្នកស្លាប់ម្នាក់ទៀត ភេទប្រុស មិនស្គាល់អត្តសញ្ញាណ និងម្នាក់របួសធ្ងន់ ភេទស្រី មិនស្គាល់អត្តសញ្ញាណ ចំណែកអ្នកបើកបររថយន្ត មិនមានរងរបួស ហើយក៏មិនស្គាល់អត្តសញ្ញាណ បានរត់គេចខ្លួនបាត់។
ប្រភពពីសាក្សីនៅកន្លែងកើតហេតុ បានប្រាប់សមត្ថកិច្ចថា មុនពេលកើតហេតុ គេឃើញជនរងគ្រោះបើកបរម៉ូតូតែម្នាក់ឯងតាមបណ្តោយផ្លូវជាតិលេខ៤ ក្នុងទិសដៅពីលិចទៅកើត លុះមកដល់កន្លែងកើតហេតុ បានបត់ឆ្លងថ្នល់ពីត្បូងទៅជើង ស្រាប់តែរថយន្តមួយគ្រឿងម៉ាកឡិចស៊ីសដែលកំពុងបើកបរយ៉ាងលឿនក្នុងទិសដៅពីកើតទៅលិច ចាប់ហ្វ្រាំងមិនទាន់ ជ្រុលបើកម៉ូតូពីចំហៀងខ្ទាតជនរងគ្រោះចេញពីម៉ូតូជាច្រើនម៉ែត្ររងរបួសធ្ងន់ហើយបានស្លាប់ពេលបញ្ជូនដល់មន្ទីរពេទ្យ។
ដោយឡែកអ្នកជិះក្នុងរថយន្តចំនួន៤នាក់ បានស្លាប់ចំនួន២នាក់ និងរបួសធ្ងន់ម្នាក់ តែអ្នកបើកបរមិនមានរងរបួស បានរត់គេចខ្លួនបាត់។ ក្នុងចំណោមជនរងគ្រោះជាអ្នករួមដំណើរជិះក្នុងទាំង៣នាក់ គេស្គាល់អត្តសញ្ញាណតែម្នាក់គឺឈ្មោះសូ រតនា ភេទប្រុស អាយុ៤២ឆ្នាំ រស់នៅភូមិត្រពាំងខ្លុង ឃុំដំបូករូង ស្រុកភ្នំស្រួច ខេត្តកំពង់ស្ពឺ។ចំណែកអ្នកស្លាប់ម្នាក់ទៀត ភេទប្រុស និងម្នាក់របួសធ្ងន់ភេទស្រី និងអ្នកបើកបរមិនទាន់ស្គាល់អត្តសញ្ញាណ។
ក្រោយពេលកើតហេតុ សមត្ថកិច្ចបានចុះដល់ទីតាំងកើតហេតុ ប្រញាប់បញ្ជូនជនរងគ្រោះ ទៅសង្គ្រោះបឋមនៅមន្ទីរពេទ្យយោធាACO រួចបញ្ជូនបន្តមកមន្ទីរពេទ្យបង្អែកខេត្តកំពង់ស្ពឺដែរ តែដោយសារស្ថានភាពរបួសភាគីម៉ូតូធ្ងន់ធ្ងរពេក ក៏បានស្លាប់ក្នុងមន្ទីរពេទ្យ ។ ចំណែកសពបុរស២នាក់ទៀត ត្រូវបានសមត្ថកិច្ចទាក់ទងសាច់ញាតិ ឲ្យមកទទួលយកទៅធ្វើបុណ្យតាមប្រពៃណីរៀងៗខ្លួន។
ដោយឡែករថយន្ត និងម៉ូតូដែលរងការខូចខាតធ្ងន់ធ្ងរ ត្រូវសមត្ថកិច្ច នាំមករក្សាទុកនៅអធិការដ្ឋាននគរបាលស្រុកភ្នំស្រួច ដើម្បីចាត់ការបន្ត៕
ចែករំលែកព័តមាននេះ