ខេត្តកំពង់ចាម ៖ បើតាមសេចក្តីរាយការណ៍ឱ្យដឹងថា គ្រោះថ្នាក់ចរាចរណ៍ដ៏រន្ធត់ ខណៈរថយន្តបុកបន្តបន្ទាប់គ្នារហូតដល់ទៅ៣គ្រឿង បណ្តាលឱ្យ២នាក់រងរបួសធ្ងន់ និងរបួសស្រាល់ម្នាក់ ហេតុការណ៍នេះកើតឡើងកាលពីម៉ោង១២និង៤០នាទីរសៀល ថ្ងៃទី២៨ ខែកញ្ញា ឆ្នាំ២០១៨ នៅលើផ្លូវជាតិលេខ៦ ស្ថិតក្នុងភូមិផ្អាវ ឃុំផ្អាវ ស្រុកបាធាយ ។
លោកវរសេនីយ៍ត្រី សុខ សូល អធិការងនគរបាលស្រុកបាធាយ ប្រាប់ឱ្យដឹងថា ជនរងគ្រោះទាំង៣ខាងលើ ១-ឈ្មោះ ឃ្លោក សារិទ្ធ ភេទប្រុស អាយុ២៣ឆ្នាំ ជាអ្នកបើករថយន្តសាំងយ៉ុង ពណ៌ស ពាក់ស្លាកលេខភ្នំពេញ 2AH.5278 មានទីលំនៅភូមិពោធ៍ ឃុំសំពងជ័យ ស្រុកជើងព្រៃ ខេត្តកំពង់ចាម (របួសធ្ងន់)។
២-ឈ្មោះ ជិន ប៊ុនថន អាយុ២៩ឆ្នាំ មានទីលំនៅភូមិពោធ៍ ឃុំសំពងជ័យ ស្រុកជើងព្រៃ ខេត្តកំពង់ចាម របួសធ្ងន់ និង
៣-ឈ្មោះ អុន ស្រូយ ភេទប្រុស អាយុ២៨ឆ្នាំ មានទីលនៅភូមិពោធ៍ ឃុំសំពងជ័យ ស្រុកជើងព្រៃ ខេត្តកំពង់ចាម របួសស្រាល ទាំង២នាក់គឺជាអ្នកជិះក្នុងរថយន្តសាំងយ៉ុង ។
លោកអធិការបន្តថា ចំណែកឈ្មោះ ឃុត ឈៀក ភេទប្រុស អាយុ២៥ឆ្នាំ អ្នកបើករថយន្តម៉ាកគៀ ពណ៌ស ពាក់ស្លាកលេខភ្នំពេញ 3A.7470 មានទីលំនៅភូមិព្រៃចារ ឃុំព្រៃចារ ស្រុកជើងព្រៃ ខេត្តកំពង់ចាម និងម្នាក់ទៀតឈ្មោះតង់ ប៉ូហេង ភេទប្រុស អាយុ២៧ឆ្នាំ បើករថយន្តម៉ាកប៉ាសេរ៉ូស្ពត ពណ៌ស មានទីលំនៅសង្កាត់អូឬស្សីពី ខណ្ឌ៧មករា រាជធានីភ្នំពេញ។
លោកអធិការងបន្តថា មុនកើតហេតុ រថយន្តសាំយ៉ុង១គ្រឿងបើកពីជើងទៅត្បូង លុះដល់ចំណុចកើតហេតុខាងលើស្រាប់តែបែកកង់មុខខាងឆ្វេងរេចង្គូតហោះឆ្លងសួនច្បារទៅផ្លូវម្ខាងទៀត ហើយបុករថយន្ត១គ្រឿងម៉ាកគៀទិសដៅពីត្បូងទៅជើង។
លោកអធិការងបន្តថា រួចរថយន្តសាំយ៉ុងនេះក៏ជ្រុលបុកជារថយន្ត១គ្រឿងទៀតម៉ាកប៉ាសេរ៉ូស្ពតពីត្បូងទៅជើង បណ្តាលឱ្យរងរបួសធ្ងន់២នាក់ និងរបួសម្នាក់ សំណាងល្អមិនប៉ះពាល់ដល់អាយុជីវិត ចំណែករថយន្តទាំង៣គ្រឿងរងការខូចខាតធ្ងន់ធ្ងរ។
គួរបញ្ជាក់ថា អ្នកបើករថយន្តប៉ាសេរ៉ូ និងរថយន្តគៀ មិនមានរងបួសទេ។ ចំណែកអ្នករងគ្រោះត្រូវបញ្ជូនទៅសង្គ្រោះនៅភ្នំពេញ ហើយករណីនេះអ្នកបើកបររថយន្តទាំង៣គ្រឿងធ្វើការសម្របសំរួលគ្នា ដោយមិនមានការប្តឹងប្តល់នោះទេ៕
ចែករំលែកព័តមាននេះ