រាជធានីភ្នំពេញ ៖ ក្រោយបញ្ចប់ការប្រកួតយ៉ាងស្វិតស្វាញនៅប៉ុស្តិ៍លេខ៥កាលពីល្ងាចថ្ងៃទី២៩ កញ្ញា ទស្សនិកជន និងគណៈកម្មការបានរកឃើញហើយថា កីឡាករ លាភ រដ្ឋា ដែលត្រូវគេស្គាល់ថា ទទួលបរាជ័យក្នុងការដណ្ដើមយកតំណែងជើងឯកម្ដងហើយ កាលពីប៉ុស្ដិ៍លេខ៥ប្រកួតបែបនេះនៅរដូវកាលមុន បានក្លាយជាអ្នកបានឡើង។
បើទោះជាការប្រកួតមួយលើកចុងក្រោយ នៅតែបរាជ័យដូចមុន ក៏លោកនឹងទទួលបានចំណាត់ថ្នាក់ជើងឯករងផងដែរ ខណៈដែលការឈានឡើងនេះ ធ្វើអោយលោកសប្បាយចិត្តយ៉ាងខ្លាំង បើទោះជាលោកបានឡើងទៅវគ្គផ្ដាច់ព្រ័ត្រ ដោយបានត្រឹមតែឈ្នះពិន្ទុទាំងលំបាកលើកីឡាករ ឡុង រ៉ាមី បង្គោលខៀវ ក្រោយប្រឹងអស់សមត្ថភាព។
ការប្រកួតរបស់អ្នកទាំងពីរត្រូវបានធ្វើឡើងនៅលើសង្វៀនព្រែកកំពិស នៅក្នុងព្រឹត្តិការណ៍ដណ្ដើមជើងឯក TV5 Boxing Knockout Series By K-Cement ក្នុងវគ្គពាក់កណ្ដាលផ្ដាច់ព្រ័ត្រ ដោយការប្រកួតនោះ គឺដើម្បីជម្រើសយកអ្នកឈ្នះទៅប្រកួតជាមួយឈ្នះយកលេខ១ និងលេខ២ ហើយអ្នកចាញ់ការប្រកួតត្រូវប្រកួតដណ្ដើមចំណាត់ថ្នាក់លេខ៣។
បង្គោលក្រហម លាភ រដ្ឋា ត្រូវគេឃើញមិនបានបន្ធូរដៃនោះទេ ដោយគ្រាន់តែបើកឆាកអោយប្រកួតក្នុងទឹកទី១ភ្លាម ក៏បញ្ចេញនូវអស់សមត្ថភាពតែម្ដង ដោយសារតែគេចង់បានឱកាសឡើងទៅប្រកួតដណ្ដើមយកជើងឯក។
យ៉ាងណាមិញ កីឡាកររូបនេះ ក៏មិនទាន់ទំនុកចិត្តមួយរយភាគរយនោះដែរ ថា គេនឹងមិនរបូតតំណែងជើងឯកក្រោយមានសំណាងបានឡើងទៅកាន់វគ្គផ្ដាច់ព្រ័ត្រនេះ ក្នុងពេលដែលសមាសភាពរបស់កីឡាករដែលមានឈ្មោះប្រកួតដណ្ដើមជើងឯកជាមួយលោក ក៏មានជំនឿចិត្តមិនធម្មតា។
ប៉ុន្តែឱកាសរបស់គេក៏ធ្វើអោយកីឡាករម្ខាងទៀត ដែលប្រឹងណាស់ដែរហើយរបូតសំណាង បង្ហាញការតូចចិត្តយ៉ាងខ្លាំង ក្រោយពេលប្រកាសលទ្ធផលថាចាញ់ពិន្ទុនៅក្នុងការប្រកួតនោះ៕
ចែករំលែកព័តមាននេះ