រាជធានីភ្នំពេញ ៖ ការប្រកួតអន្តរជាតិនៅលើសង្វៀនទូរទស្សន៍អាស៊ីអាគ្នេយ៍ កាលពីយប់ថ្ងៃទី២៩ កញ្ញា កីឡាករកម្ពុជា គង់ សំបូរ ទទួលជោគជ័យលើកីឡាករបរទេសគួរឱ្យសរសើរ បើទោះជាកីឡាករបារាំង បានឡើងរេញប្រកួតនោះមានកណ្ដាប់ដៃល្អមិនធម្មតាក៏ដោយ។
យ៉ាងណាមិញ បើក្រឡេកទៅមើលប្រវត្តិឡើងរេញរបស់កីឡាករទាំងពីរក៏ខុសគ្នាឆ្ងាយដែរ ដោយសារតែកីឡាករបារាំងទើបឡើងរេញបានតិចប៉ុណ្ណោះ គឺតិចជាងរហូតដល់ជាង២ដងនឹងកីឡាករកម្ពុជា។
នេះជាការប្រកួតអន្តរជាតិដែលបានធ្វើឡើងនៅរៀងរាល់ពេលយប់សម្រាប់ថ្ងៃសៅរ៍របស់ទូរទស្សន៍អាស៊ីអាគ្នេយ៍ ដោយការប្រកួតនេះ គឺមានកីឡាករគូអន្តរជាតិ២គូៗឡើងប្រកួតជាប្រចាំ ខណៈដែលគូអន្តរជាតិទី១ គឺគង់ សំបូរ និងកីឡាករបារាំង ត្រូវបានបញ្ចប់ត្រឹមតែ២ទឹកប៉ុណ្ណោះ បន្ទាប់ពីកីឡាករ គង់ សំបូរ ប្រឹងទាត់ជើងក្រោមខ្លាំង ហើយបណ្ដាលឱ្យកីឡាករបារាំង Najib D’jeloudi សម្រេចិត្តបោះបង់ការប្រកួតក្នុងទឹកទី២។
យ៉ាងណាមិញ មុនរកឃើញលទ្ធផលចាញ់ឈ្នះ កីឡាករកម្ពុជាក៏ត្រូវកីឡាករបារាំងដែលមានបទពិសោធន៍តិចជាងលើកនេះ វាយត្រូវខ្ចប់ៗផងដែរ ដោយសារតែកីឡាករបារាំងគេមានដៃវែងៗ ហើយកណ្ដាប់ដៃល្អ។
ប្រសិនបើកីឡាករបារាំងគេចរួចពីការទាត់បំបែកកង់ក្រោមប្រហែលជាកីឡាករ គង់ សំបូរ មិនងាយស៊ីផុយនោះទេ ជាពិសេសនៅពេលដែលគេពិបាកវាយម៉ាត់ចូលស្រួលទៅកាន់កីឡាករបារាំង បើធៀបនឹងកីឡាករបារាំងដែលវាយម៉ាត់បានចូលត្រូវចំប្លង់ៗល្អជាង ព្រោះតែគេមានដៃវែង។
អ្នកទស្សនាភាគច្រើននិយាយថា បើកីឡាករកម្ពុជាមិនដូរយុទ្ធសាស្ត្រទាត់ ហើយឈប់វាយសម្រុក ក៏ប្រហែលជាកីឡាករបារាំងមិនបោះបង់ការប្រកួត ព្រោះតែឈឺជើងតតាំងលែងរួចយ៉ាងស្រួលអ៊ីចឹងដែរ៕
ចែករំលែកព័តមាននេះ