ខេត្តតាកែវ ៖ បុរសម្នាក់បានស្លាប់ភ្លាមៗនៅនឹងកន្លែង ចំណែកម្នាក់ទៀតរងរបួសស្រាលក្នុងហេតុការណ៍គ្រោះថ្នាក់ចរាចរណ៍រវាងរថយន្តបុកជាមួយម៉ូតូមួយគ្រឿងមានសណ្តោងរ៉ឺម៉ក ហើយរថយន្តរេចង្កូតបន្តទៅបុកម៉ូតូមួយគ្រឿង កាលពីវេលាម៉ោង១១ព្រឹកថ្ងៃទី២៨ ខែកញ្ញា ឆ្នាំ២០១៨ ស្ថិតនៅលើផ្លូវជាតិលេខ៣ ចន្លោះគីឡូម៉ែត្រ៩២-៩៣ ក្នុងភូមិបឹងម្កាក់ ឃុំត្រាំកក់ ស្រុកត្រាំកក់ ខេត្តតាកែវ ។
លោកវរសេនីទោ ជាល សុផាត នាយការិយាល័យចរាចរណ័ផ្លូវគោកខេត្តបានអោយដឹងថា រថយន្តមួយគ្រឿងម៉ាកសាំយ៉ុង ពណ៌បៃតងចាស់ ពាក់ស្លាកលេខ ភ្នំពេញ ២O-៩០៣៩ បើកបរដោយឈ្មោះ ឡុង លី ភេទប្រុស អាយុ៣២ឆ្នាំ មុខរបរបើកបររថយន្ត នៅភូមិអំពិលរៀង ឃុំព្រៃកប្បាស ស្រុកព្រៃកប្បាស ខេត្តតាកែវ ត្រូវបានសមត្ថកិច្ចចាប់ឃាត់ខ្លួន។
ម៉ូតូមួយគ្រឿងម៉ាកសង់កូរ៉េ ធុនC១០០ ពណ៌ក្រហម គ្មានស្លាកលេខ មានសណ្តោងរ៉ឺម៉ក បើកបរដោយឈ្មោះ ញឹម គា ភេទប្រុស អាយុ២២ឆ្នាំ មុខរបរជាងដែក នៅភូមិសេកយា ឃុំអង្គតាសោម ស្រុកត្រាំកក់ ខេត្តតាកែវ បានស្លាប់នៅកន្លែងកើតហេតុ) ។
ចំណែកម៉ូតូមួយគ្រឿងទៀតម៉ាកហុងដា C125 ស៊េរីឆ្នាំ២០១១ ពណ៌ខ្មៅ ពាក់ស្លាកលេខ តាកែវ ១F-២៨៦៣ បើកបរដោយឈ្មោះ វង់ សាន ភេទប្រុស អាយុ៥៥ឆ្នាំ មុខរបរកសិករ នៅភូមិត្រពាំងខ្លូត ឃុំត្រាំកក់ ស្រុកត្រាំកក់ ខេត្តតាកែវ បានរងរបួសស្រាល ។
លោកនាយការិយាល័យចរាចរខេត្តបានបន្តទៀតថា មានរថយន្តមួយគ្រឿងម៉ាកសាំយ៉ុង បើកបរដោយបុរសម្នាក់មកពីទិសខាងកើត លុះបើកបរមកដល់ចំណុចខាងលើក៏បានបុកគ្នាជាមួយម៉ូតូមួយគ្រឿង មានសណ្តោងរ៉ឺម៉ក បើកបរដោយបុរសម្នាក់ ដែលធ្វើដំណើរមកពីទិសខាងលិច ហើយរថយន្តបានរេចង្កូតបន្តទៅបុកនឹងម៉ូតូមួយគ្រឿងទៀតម៉ាកហុងដា បើកបរដោយបុរសម្នាក់ បើកបរមកពីទិសខាងកើត បណ្តាលឱ្យអ្នកបើកបរម៉ូតូមានសណ្តោងរ៉ឺម៉កស្លាប់នៅនឹងកន្លែងកើតហេតុ ចំណែកឯអ្នកបើកបរម៉ូតូម៉ាកហុងដាបានរងរបួសស្រាល រីឯអ្នកបើកបររថយន្តត្រូវសមត្ថកិច្ចចាប់ឃាត់ខ្លួន ។
ក្រោយពេលកើតហេតុ សមត្ថកិច្ចបានចុះមកដល់រួចកសាងសំណុំរឿងទៅតាមនីតិវិធី ចំណែកឯសពត្រូវបានប្រគល់ជូនសាច់ញាតិយកទៅធ្វើបុណ្យតាមប្រពៃណី រីឯវត្ថុតាងរថយន្ត,ម៉ូតូនិងម៉ូតូរ៉ឺម៉កត្រូវបានយកទៅរក្សាទុកនៅអធិការដ្ឋាននគរបាលស្រុកត្រាំកក់ដើម្បីដោះស្រាយគ្នានៅពេលក្រោយ ៕
ចែករំលែកព័តមាននេះ