ខេត្តក្រចេះ ៖ សេចក្តីរាយការណ៍ឱ្យដឹងថា មនុស្ស៣នាក់ត្រូវស្លាប់ភ្លាម ដោយសារជួបគ្រោះថ្នាក់ចរាចរណ៍កើតឡើងពីរករណីផ្សេងគ្នាក្នុងថ្ងៃតែមួយ គឺថ្ងៃទី២៨ កញ្ញា ស្ថិតក្នុងស្រុកចិត្របុរី ។
នគរបាលចរចារណ៍បានឱ្យដឹងថា ករណីទី១ គឺជនរងគ្រោះជិះម៉ូតូដួលខ្លួនឯង ខណៈគាត់ជាអ្នករកស៊ីដឹកជញ្ជូនឈើតាមម៉ូតូលុះដួលក៏បណ្តាលស្លាប់ភ្លាមមួយរំពេច ។ ជនរងគ្រោះឈ្មោះប៉ុន រ៉ុង អាយុ៣២ឆ្នាំ រស់នៅឃុំសំបូរ ស្រុកសំបូរ ក្នុងពេលដែលគាត់ជិះម៉ូតូមានដឹកឈើយ៉ាងច្រើនកដួលនៅលើផ្លូវវលំមួយកន្លែង បណ្តាលឱ្យជនរងគ្រោះត្រូវកៀបជាប់ម៉ូតូ ។
នគរបាលចរាចរណ៍ឱ្យដឹងទៀតថា មួយករណីទៀត បានកើតឡើងនៅថ្ងៃដដែល រវាងម៉ូតូបុកម៉ូតូ ។ ក្នុងនោះ បង្កឱ្យជនរងគ្រោះ២នាក់ជិះម៉ូតូជាមួយគ្នាបានស្លាប់ភ្លាមៗ ខណៈភាគីម្ខាងទៀត ត្រូវរងរបួសធ្ងន់ កើតឡើងនៅចំណុចផ្លូវជាតិ លេខ៧ ក្នុងឃុំដារ ស្រុកចិត្របុរី។ គ្រោះថ្នាក់នេះ បណ្តាលមកពីការបើកបរលើសល្បឿនកំណត់ ។
គួរបញ្ជាក់ថា ពលរដ្ឋដែលប្រកបរបរដឹកជញ្ជូនឈើតាមម៉ូតូ គឺប្រឈមភាពប្រថុយប្រថានដល់អាយុជីវិតខ្លាំង នៅពេលជួបគ្រោះថ្នាក់ដួលម៉ូតូ ។ មានការកត់សម្គាល់ឃើញថា មានពលរដ្ឋចំនួន៤នាក់ហើយ ដែលជាអ្នកមានរបរដឹកជញ្ជូនឈើតាមម៉ូតូបានស្លាប់ក្នុងករណីគ្រោះថ្នាក់បែបនេះ។
ចែករំលែកព័តមាននេះ