រាជធានីភ្នំពេញ ៖ សន្តិសុខយាមស្តាតអូឡាំពិកម្នាក់ និងម្នាក់ទៀតជាអ្នកអនាម័យ កាលពីថ្ងៃទី២៦ កញ្ញា ត្រូវបានកម្លាំងសមត្ថកិច្ចកងរាជអាវុធហត្ថខណ្ឌ៧មករា ចាប់ខ្លួន និងបាននាំទៅកាន់ទីបញ្ជាការ កងរាជអាវុធហត្ថរាជធានីភ្នំពេញ និងបានកសាងសំណុំរឿងបញ្ជូនទៅកាន់សាលាដំបូងរាជធានីភ្នំពេញ ពាក់ព័ន្ធករណីឃុបឃិតគ្នា បន្លំលួចយកម៉ូតូអ្នកផ្ញើមួយគ្រឿង។ ជនសង្ស័យម្នាក់ឈ្មោះ ឃឿន សុខយន ភេទប្រុស អាយុ១៩ឆ្នាំ មុខរបរជាសន្តិសុខឯកជនយាមស្តាតអូឡាំពិក និងម្នាក់ឈ្មោះ ជួប សំណាង ភេទប្រុស អាយុ២៩ឆ្នាំ មុខរបរ ជាអ្នកអនាម័យក្នុងស្តាតអូឡាំពិក។
ការចាប់ឃាត់ខ្លួនជនសង្ស័យ២នាក់ ខាងលើនេះត្រូវមន្ត្រីកងរាជអាវុធហត្ថឲ្យដឹងថា កាលពីវេលាម៉ោង៨ និង២០នាទីព្រឹក ថ្ងៃទី២៤ កញ្ញា ជនរងគ្រោះឈ្មោះ អៀម ទិត្យតារារ័ត្ន ភេទប្រុស អាយុ៤០ឆ្នាំ បានយកម៉ូតូម៉ាក ZOOMER-X ១គ្រឿង ពណ៌ស ស្លាកលេខ ភ្នំពេញ 1FY-9297 ទៅផ្ញើកន្លែងផ្ញើកង់ម៉ូតូ ក្នុងពហុកីឡាដ្ឋានជាតិអូឡាំពិក នៅចំណុច (ច្រកចូលខាងត្បូង) ស្ថិតក្នុងសង្កាត់វាលវង់ ខណ្ឌ៧មករា រាជធានីភ្នំពេញ។ ក្រោយពេលជនរងគ្រោះផ្ញើហើយ ក៏ដើរចូលទៅហាត់ប្រាណបាត់ ពេលនោះជនសង្ស័យទាំង២នាក់ បានផ្សំគំនិតគ្នាបន្លំសំបុត្រផ្ញើម៉ូតូ និងលួចយកម៉ូតូ ZOOMER មួយគ្រឿងនោះ ចេញពីកន្លែងផ្ញើបាត់។
ម្ចាស់ម៉ូតូក្រោយពេលដឹងថា ម៉ូតូរបស់ខ្លួនដែលបានយកមកផ្ញើនោះ ត្រូវចោរលួចបាត់ក៏បានទៅដាក់ពាក្យ បណ្តឹង នៅសមត្ថកិច្ចមូលដ្ឋានអាវុធហត្ថខណ្ឌ៧មករា ដើម្បីឲ្យជួយស្រាវជ្រាវ និង វិធានការជំនាញលើ ករណីនេះជាបន្ទាន់។ រហូតដល់ថ្ងៃទី២៦ កញ្ញា កម្លាំងអាវុធហត្ថខណ្ឌ៧មករា បានកំណត់មុខសញ្ញា និង ឈានដល់ការឃាត់ខ្លួនជនសង្ស័យជាសន្តិសុខយាមម៉ូតូម្នាក់ និងអ្នកអនាម័យម្នាក់ ដូចមានឈ្មោះខាងលើ ហើយបាននាំទៅកាន់ការិយាល័យជំនាញព្រហ្មទណ្ឌ រាជធានីភ្នំពេញ។
មន្ត្រីអាវុធហត្ថបន្តថា នៅទីបញ្ជាការកងរាជអាវុធហត្ថរាជធានីភ្នំពេញ ជនសង្ស័យទាំង២នាក់ បានឆ្លើយសារភាពប្រហាក់ប្រហែលគ្នាថា ខ្លួនឈ្មោះ ឃឿន សុខយន និង ជួប សំណាង ពិតជាបានផ្សំគំនិតគ្នាលួចម៉ូតូ ZOOMER នោះប្រាកដមែន។ ជនសង្ស័យបន្តថា ដំបូងឈ្មោះ ជួប សំណាង បានទៅកន្លែងផ្ញើម៉ូតូហើយក៏សុំសំបុត្រ១សន្លឹក ពីអ្នកផ្ញើម៉ូតូ តែគេមិនឲ្យ ពេលនោះខ្លួនបាន លួចយកសំបុត្រសម្រាប់ផ្ញើម៉ូតូ១សន្លឹក ហើយគេក៏បានឲ្យសំបុត្រនោះ ទៅក្មេងប្រុសម្នាក់អាយុប្រហែល ជាង១០ឆ្នាំ(មិនស្គាល់អត្តសញ្ញាណ) ដែលជួបគ្នានៅម្តុំផ្សារដើមគរ ដោយបានប្រាប់ក្មេងនោះថា ឲ្យទៅយកជួយយកម៉ូតូ នៅកន្លែងផ្ញើជ្រុងខាងត្បូងក្នុងស្តាតអូឡាំពិក ហើយក៏បានកត់លេខទូរស័ព្ទ ឲ្យទៅក្មេងប្រុសនោះផងដែរ ដើម្បីងាយស្រួលទំនាក់ទំនងគ្នា។
ក្រោយមកក្មេងប្រុសនោះក៏បាន ទៅបណ្តើរម៉ូតូ ZOOMER-X មួយគ្រឿងចេញពីកន្លែងផ្ញើម៉ូតូនោះមែន បន្ទាប់មកខ្លួនបានយកម៉ូតូនោះ ទៅដាក់បញ្ចាំបានតម្លៃ ៦០០ដុល្លារអាមេរិក ហើយពួកគេក៏ណាត់ជួបគ្នានៅម្តុំក្រោយវត្តមហាមន្ត្រី ដោយក្មេងប្រុសនោះបានយកប្រាក់មកប្រគល់ឲ្យខ្លួនចំនួន១៥ ម៉ឺនរៀល ខ្លួនក៏បានយកទៅឲ្យម្តាយរបស់គេ។ លុះវេលាម៉ោង៩ និង៣០នាទី ព្រឹកថ្ងៃទី២៦ កញ្ញា ខ្លួន (ជួប សំណាង) បានចូលទៅស្តាតអូឡាំពិកវិញ ក៏ត្រូវកម្លាំងសមត្ថកិច្ចអាវុធហត្ថឃាត់ខ្លួន រួមជាមួយឈ្មោះ ឃឿន សុខយន ផងដែរ ដែលជាអ្នករូមគំនិត ក្នុងអំពើលួចម៉ូតូ១គ្រឿងនោះ។
នៅថ្ងៃទី២៨ កញ្ញា នេះ តំណាងអយ្យការអមសាលាដំបូងរាជធានីភ្នំពេញ បានសម្រេចធ្វើការចោទប្រកាន់សន្តិសុខ និង អ្នកអនាម័យក្នុងស្តាតអូឡាំពិកជាផ្លូវការហើយ ក្រោមបទ.លួច និង បានចាត់បញ្ជូនទៅចៅក្រមស៊ើបសួរ ដើម្បីឃុំខ្លួនដាក់ពន្ធនាគារជាបណ្តោះអាសន្ន រង់ចាំថ្ងៃបើកសវនាការផ្តន្ទាទោស តាមច្បាប់ដែលបានចូលជាធរមាន៕
ចែករំលែកព័តមាននេះ