ទីក្រុងបាងកក ៖ ប្រទេសចិនបានព្រមព្រៀងទិញអង្ករពីប្រទេសថៃប្រមាណ ១០ម៉ឺនតោន ក្រោមកិច្ចសន្យារវាងរដ្ឋាភិបាលនៃប្រទេសទាំងពីរ ។ ក្រសួងពាណិជ្ជកម្មថៃបានឲ្យដឹងថា ការសម្រេចចិត្តនេះ នឹងជួយបង្កើនតម្លៃអង្ករក្នុងស្រុក និងការនាំចេញទៅបរទេស…
ទីក្រុងបាងកក ៖ ប្រទេសចិនបានព្រមព្រៀងទិញអង្ករពីប្រទេសថៃប្រមាណ ១០ម៉ឺនតោន ក្រោមកិច្ចសន្យារវាងរដ្ឋាភិបាលនៃប្រទេសទាំងពីរ ។ ក្រសួងពាណិជ្ជកម្មថៃបានឲ្យដឹងថា ការសម្រេចចិត្តនេះ នឹងជួយបង្កើនតម្លៃអង្ករក្នុងស្រុក និងការនាំចេញទៅបរទេស ។
រដ្ឋមន្ត្រីពាណិជ្ជកម្មលោក Sontirat Sontijirawong បាននិយាយថា ការទិញនេះនឹងត្រូវបាននាំចេញក្នុងចុងខែនេះ និងខែក្រោយ ។ ក្រុមហ៊ុន China National Cereals, Oils and Foodstuffs Corporation របស់ប្រទេសចិនបានផ្អាកការទិញអង្ករតាំងពីពាក់កណ្តាលឆ្នាំនេះ ព្រោះតែមានការផ្គត់ផ្គង់គ្រប់គ្រាន់នៅក្នុងប្រទេសចិន ។
ប្រទេសថៃធ្លាប់នាំចេញអង្ករទៅកាន់ប្រទេសចិនប្រមាណ៥០ម៉ឺនតោន ក្រោមកិច្ចព្រមព្រៀងរវាងរដ្ឋាភិបាលដែលបានសម្រេចកាលពីឆ្នាំ ២០១៥ដែលសន្យាថា នឹងទិញអង្ករ១លានតោន ។
លោករដ្ឋមន្ត្រី Sontirat បានឲ្យដឹងថា នាយកដ្ឋានពាណិជ្ជកម្មបរទេស នឹងពន្លឿនការចរចាជាមួយនឹងភ្នាក់ងាររដ្ឋក្នុងប្រទេសចិនឲ្យព្រមព្រៀងលើតម្លៃទិញ និងការនាំចេញអង្ករដែលនៅសល់៤០ម៉ឺនតោនទៀត ក្រោមការសន្យាកាលពីឆ្នាំ២០១៥ ។
លោកបានបន្ថែមទៀតថា ក្រសួងសន្យាថានឹងបង្កើនការខិតខំប្រឹងប្រែងក្នុងការលើកតម្កើងការនាំចេញអង្ករ ។ ក្នុងអំឡុងពីថ្ងៃទី១២ដល់២០ខែកញ្ញា កន្លងមកនេះ នាយកដ្ឋានខាងលើបានចេញសកម្មភាពផ្សព្វផ្សាយ និងការតាំងពិព័រណ៍ក្នុងប្រទេសអូស្ត្រាលីដើម្បីបង្ហាញពីអង្ករកម្រិតខ្ពស់របស់ពប្រទេសថៃជាដើម ។
ព្រោះតែមានតម្រូវការខ្ពស់ រួមផ្សំជាមួយការខិតខំប្រឹងប្រែងរបស់ក្រសួង លោក Sontirat ជឿជាក់ថា ប្រទេសថៃអាចនឹងសម្រេចបានគោលដៅនាំចេញអង្ករបាន១១លានតោនក្នុងឆ្នាំនេះ ។
ចាប់ពីដើមឆ្នាំមកដល់ថ្ងៃទី២១ ខែកញ្ញាកន្លងមកនេះ ប្រទេសថៃបាននាំចេញអង្ករបាន ៨,២២លានតោន ឬច្រើនជាងឆ្នាំមុន២,៩%ក្នុងតម្លៃប្រមាណ៤ប៊ីលានដុល្លារ ឬច្រើនជាងឆ្នាំមុន១៣,៦% ៕
ចែករំលែកព័តមាននេះ