ឃើញផ្សែងហុយទ្រលោមខ្មួលខ្មាញ់ចេញពីវិហារ…ផ្អើល
- កំពង់ចាម
ខេត្តត្បូងឃ្មុំ ៖ មនុស្សម្នា ក្មេង ចាស់ ប្រុស ស្រី ព្រមទាំងព្រះសង្ឃ គង់នៅវត្តសុវណ្ណបទុមវតី ហៅវត្តរកា…
ខេត្តត្បូងឃ្មុំ ៖ មនុស្សម្នា ក្មេង ចាស់ ប្រុស ស្រី ព្រមទាំងព្រះសង្ឃ គង់នៅវត្តសុវណ្ណបទុមវតី ហៅវត្តរកា
ឃ្នួច ស្ថិតនៅភូមិរកាឃ្នួចជើង ឃុំជីគរ ស្រុកត្បូងឃ្មុំ បាននាំគ្នាឆោឡោ ដោយសារតែបានឃើញភ្លើងឆេះនៅក្នុងព្រះវិហារ ដោយមានផ្សែងហុយទ្រលោមខ្មួលខ្មាញ់ ហោះទៅលើអាកាស ។ ហេតុការណ៍នេះកើតឡើងនៅវេលាម៉ោង៣និង៣០នាទីរសៀលថ្ងៃទី២៦ កញ្ញា ជាថ្ងៃកាន់បិណ្ឌទី២ តែសំណាងល្អបានរថយន្តពន្លត់អគ្គិភ័យចំនួន២គ្រឿង ចេញមកជួយអន្តរាគមន៍បាញ់ទឹកពន្លត់ទាន់ពេលវេលា ។
មន្ត្រីនគរបាលស្រុកត្បូងឃ្មុំ បានប្រាប់ឲ្យដឹងថា ក្នុងពេលដែលមានភ្លើងឆេះដំបូង នគរបាលប៉ុស្តិ៍រដ្ឋបាលមូលដ្ឋានបានសុំកិច្ចអន្គរាគមន៍ជាបន្ទាន់ ក្នុងនោះដោយសារតែរថយន្តពន្លត់អគ្គិភ័យ របស់អធិការដ្ឋាននគរបាលក្រុងសួងបានចេញមកជួយបាញ់ទឹកមុនគេ ហើយបន្ទាប់មកបានរថយន្តពន្លត់អគ្គិភ័យរបស់អធិការដ្ឋាននគរបាលស្រុកត្បូងឃ្មុំ បានចេញទៅជួយបាញ់ទឹកបន្តបន្ទាប់ដែរ ។
នគរបាលស្រុកត្បូងឃ្មុំប្រាប់បន្តថា ពុទ្ធបរិស័ទចំណុះជើងវត្តបាននាំគ្នាជួយដងទឹកទៅជះលើភ្លើងដែលកំពុងតែឆេះក្នុងព្រះវិហារ និងរួមកិច្ចសហការជាមួយនឹងសមត្ថកិច្ចទាន់ពេលវេលាបានបាញ់ទឹកអស់ចំនួន៣រថយន្តធ្វើឲ្យភ្លើងរលត់ទាំងស្រុង ។
ក្នុងហេតុការណ៍នោះបណ្តាលឲ្យមានការខូចខាត រួមមានដូចជា ព្រះពុទ្ធបដិមាចំនួន៤អង្គ ក្នុងនោះធំ៣អង្គនិងតូច១អង្គខូចខាតឆេះខ្លោច ។ កង្ហារចំនួន៦គ្រឿង ឆេះអស់ដែរ ព្រមទាំងឆេះរោលសសរព្រះវិហារ១ដើម ឆេះរោលផ្ទាំងគំនូរលើពិតានព្រះវិហារប្រមាណ២០ភាគរយ ។ ចំពោះមូលហេតុនៃការឆេះនេះ ត្រូវបានរកឃើញថា ដោយសារតែទៀនវស្សាដែលអុជជាប់ទាំងយប់ទាំងថ្ងៃនោះរលំដួលសង្កត់លើគំនរទៀនចំនួន២០គូទៀត បណ្តាលឲ្យឆេះសន្ធោសន្ធៅឡើងតែម្តង ។
លទ្ធផលពន្លត់ទាន់ពេលវេលានេះ ដោយសារតែលោកឧត្តមសេនីយ៏ទោ បែន រ័ត្ន ស្នងការនគរបាលខេត្ត បានដាក់ឲ្យកម្លាំងនគរបាលនៅគ្រប់អធិការដ្ឋានស្រុក-ក្រុងទាំង៧ ត្រូវបានប្រចាំការ២៤ម៉ោង លើ២៤ម៉ោង ដើម្បីងាយស្រួលក្នុងការចេញទៅអន្តរាគមន៍ បើមានសភាពការណ៍កើតឡើងជាយថាហេតុដូចខាងលើជាដើម ៕
ចែករំលែកព័តមាននេះ