ខេត្តបន្ទាយមានជ័យ ៖ សេចក្តីរាយការណ៍បឋមបានឲ្យដឹងថា កាលពីវេលម៉ោងប្រមាណ៤ទៀបភ្លឺឈានចូលថ្ងៃទី២៨ កញ្ញា ២០១៨ មានករណីឃាតកម្មមួយកើតឡើង នៅចំណុចភូមិត្រសេកជ្រុំ ឃុំម៉ាឡៃ ស្រុកម៉ាឡៃ ខេត្តបន្ទាយមានជ័យ បង្កឡើងដោយជនសង្ស័យជាប្ដីវាយសម្លាប់ប្រពន្ធរួច បុរសជាប្តីបានរត់គេចខ្លួនបាត់ ។
ជនរងគ្រោះជាប្រពន្ធដែលស្លាប់ឈ្មោះ ធ្លោក ថាញ់ អាយុ៤៣ឆ្នាំ ចំណែកជនសង្ស័យជាប្តីឈ្មោះ ទុង ថា ភេទប្រុស អាយុ៤៨ឆ្នាំ ។ ទាំង២នាក់មានទីលំនៅក្នុងភូមិឃុំកើតហេតុខាងលើ ។
តាមប្រភពព័ត៍ពីសាក្សីនៅកន្លែងកើតហេតុ បានប្រាប់សមត្តកិច្ចឲ្យដឹងថា មុនកើតហេតុ គេបានឮសូរសំឡេងប្តីប្រពន្ធពីរនាក់នោះឈ្លោះប្រកែក និងជេរបញ្ចោរគ្នាស្ទើពេញមួយយប់ ។
ប្រភពដដែលបន្តថា ស្រាប់តែម៉ោងប្រមាណ៤ទៀបភ្លឺ ក៏ស្ងាត់បាត់មាត់ឈឹង ពេលនោះក៏មានការភ្ញាក់ផ្អើលពីអ្នកជិតខាងថា ប្តីវាយសម្លាប់ប្រពន្ធស្លាប់នៅលើផ្ទះ ចំណែកបុរសជាប្តីបានទៅជិះម៉ូតូឌុបរបស់ឈ្មោះ ព្រឿង ថន ភេទប្រុស អាយុប្រហែល៥៧ឆ្នាំ រស់នៅភូមិឃុំជាមួយគ្នា ឌុបចេញទៅបាត់ ។
ករណីឃាតកម្មខាងលើនេះ កម្លាំងសមត្ថកិច្ចនគរបាលមូលដ្ឋាន កំពុងធ្វើការស្រាវជ្រាវ ដោយយកចិត្តទុកដាក់ ដើម្បីចាប់ជនល្មើសមកផ្តន្ទាទោសតាមច្បាប់ ។
សូមបញ្ជាក់ថា ជនសង្ស័យមានប្រពន្ធចំនួន៣នាក់ គឺប្រពន្ធទី២នៅសៀមរាប មានកូនចំនួន២នាក់ រីឯស្ត្រីរងគ្រោះជាប្រពន្ធទី៣របស់ជនសង្ស័យ ។ ដោយឡែកស្ត្រីរងគ្រោះក៏មានប្តីចំនួន៣នាក់ផងដែរ ។ ព័ត៌មានលម្អិតនឹងមានផ្សាយនៅលើទំព័រកាសែតកោះសន្តិភាព ៕
ចែករំលែកព័តមាននេះ