រាជធានីភ្នំពេញ ៖ ជនជាតិស្បែកខ្មៅ(នីហ្សេរីយ៉ា)ចំនួន១១នាក់ បានត្រូវនគរបាលខណ្ឌចំការមន ចាប់បញ្ជូនប្រគល់ឲ្យនគរបាលនៃការិយាល័យស៊ើបអង្កេត និងអនុវត្តន៍នីតិវិធីរាជធានីភ្នំពេញ ក្រោយពីពួកគេឈ្លោះប្រកែកគ្នា បង្កជាហិង្សាបណ្តាលឱ្យម្នាក់រងរបួសដៃ រហែកអាវទាំងផ្ទាំងៗ នៅក្នុងហាងមួយខាងក្រោយផ្សារសុវណ្ណា…
រាជធានីភ្នំពេញ ៖ ជនជាតិស្បែកខ្មៅ(នីហ្សេរីយ៉ា)ចំនួន១១នាក់ បានត្រូវនគរបាលខណ្ឌចំការមន ចាប់បញ្ជូនប្រគល់ឲ្យនគរបាលនៃការិយាល័យស៊ើបអង្កេត និងអនុវត្តន៍នីតិវិធីរាជធានីភ្នំពេញ ក្រោយពីពួកគេឈ្លោះប្រកែកគ្នា បង្កជាហិង្សាបណ្តាលឱ្យម្នាក់រងរបួសដៃ រហែកអាវទាំងផ្ទាំងៗ នៅក្នុងហាងមួយខាងក្រោយផ្សារសុវណ្ណា ។
ហេតុការណ៍នេះ កើតឡើងកាលពីវេលាម៉ោង៤និង១៥នាទីរសៀលថ្ងៃទី២៦ កញ្ញា នៅភោជនីយដ្ឋាន
អូប៊ីអេហ្សេ ផ្ទះលេខT-៣៤ ផ្លូវតូប៉ាស់(ក្រោយផ្សារសុវណ្ណា) ក្នុងសង្កាត់ទំនប់ទឹក ខណ្ឌចំការមន ។ ប្រភពព័ត៌មានពីនគរបាលបានឱ្យដឹងថា ក្រុមបុរសជនជាតិនីហ្សេរីយ៉ាទាំង១១នាក់ ព្រមទាំងមានស្ត្រីជនជាតិខ្មែរជាប្រពន្ធចំនួន៤ ទៅ៥នាក់ផង បាននាំគ្នាចូលទៅហូបចុក និងជួបជុំគ្នានៅក្នុងហាងខាងលើ ។ លុះបន្តិចក្រោយមក ស្រាប់តែពួកគេចំនួន៣នាក់ ដែលភាគីម្ខាងមានតែម្នាក់ឯង និងម្ខាងទៀតមានគ្នា២នាក់ បានឈ្លោះប្រកែកគ្ នានិងឈានទៅដល់ការវាយតប់គ្នានៅខាងក្នុងហាង បង្កឲ្យមានការភ្ញាក់ផ្អើលកើតឡើងតែម្តង ។
ប្រភពដដែលឲ្យដឹងទៀតថា ភ្លាមៗនោះ កម្លាំងនគរបាលខណ្ឌចំការមនជាច្រើននាក់ បានចុះទៅដល់ ឃើញបុរសជនជាតិស្បែកខ្មៅម្នាក់ មានស្នាមរបួសបាតដៃម្ខាងហូរឈាមសស្រាក់ និងបានឃាត់ខ្លួនពួកគេបញ្ជូនទៅប៉ុស្តិ៍នគរបាលទំនប់ទឹក ដើម្បីធ្វើការសាកសួរទើបដឹងថា«ពួកគេឈ្លោះគ្នា ដោយសារតែការនិយាយដើមគ្នា»។
ក្រោយពេលសមត្ថកិច្ចឃាត់ខ្លួនបុរសនីហ្សេរីយ៉ាទាំង១១នាក់ ដែលសុទ្ធតែមានប្រពន្ធខ្មែរ និងមានកូនតូចផងដែរ យកទៅសាកសួរមិនឃើញមានឯកសារអ្វីគ្រប់គ្រាន់ ក្នុងការចូលមករស់នៅក្នុងប្រទេសកម្ពុជាទេ ទើបសម្រេចបញ្ជូនបន្តទៅប្រគល់ឱ្យការិយាល័យនគរបាលស៊ើបអង្កេត និងអនុវត្តន៍នីតិវិធីចាត់ការទៅតាមនីតិវិធីជាបន្តទៀត ៕
ចែករំលែកព័តមាននេះ