ខេត្តបន្ទាយមានជ័យ ៖ ជនសង្ស័យម្នាក់មុខរបរទិញលក់ដី ហើយលួចដីគេលក់៤៥ហិកតា តម្លៃប្រាក់កក់៥ម៉ឺនដុល្លារ ត្រូវបានម្ចាស់ដីប្តឹងចាប់ខ្លួន បញ្ជូនទៅសាលាដំបូងខេត្តបន្ទាយមានជ័យចាត់ការតាមច្បាប់ នៅថ្ងៃទី២៧ ខែកញ្ញា ឆ្នាំ២០១៨ ។
ជនសង្ស័យដែលត្រូវចាប់ខ្លួនមានឈ្មោះ គង់ អ៊ី (ហៅអ៊ឹមសែង.M5) ភេទប្រុស អាយុ៤៩ឆ្នាំ មុខរបរទិញលក់ដី ដែលរស់នៅភូមិសូរិយាសង្កាត់-ក្រុងប៉ោយប៉ែត ។
លោកវរសេនីយត្រី នួន នីណារ៉ូ មេបញ្ជាការកងរាជអាវុធហត្ថក្រុងប៉ោយប៉ែតបានប្រាប់ថា នៅពេលឃាត់ខ្លួនជនសង្ស័យ គឺកម្លាំងកងរាជអាវុធហត្ថក្រុងប៉ោយប៉ែតបានទទួលពាក្យបណ្តឹងពីជនរងគ្រោះឈ្មោះ ណុប ណាវី ភេទស្រី អាយុ៤៩ឆ្នាំ មុខរបរលក់ដូរ រស់នៅភូមិក្បាលកោះសង្កាត់-ក្រុងប៉ោយប៉ែត ។ ដោយបានប្តឹងជនសង្ស័យឈ្មោះ គង់ អ៊ី (ហៅអ៊ឹមសែង.M5) បានលួចយកដីពីរកន្លែង មានផ្ទៃដី៤៥ហិកតា ដែលស្ថិតភូមិសូរិយាសង្កាត់និមិត្ត និងភូមិអូរឫស្សី សង្កាត់ផ្សារកណ្តាល ក្រុងប៉ោយប៉ែត ។
បានយកទៅលក់ឲ្យអ្នកដទៃ ហើយអ្នកទិញសុំពិនិត្យឯកសារដី៤៥ហិកតា ដើម្បីកក់លុយចំនួន៥ម៉ឺនដុល្លារ ក្រោយពេលពិនិត្យឯកសារដីហើយបានបែកគ្នា ហើយជនរងគ្រោះបានដឹង រួចទៅប្តឹងកម្លាំងកងរាជអាវុធហត្ថក្រុងប៉ោយប៉ែតបានធ្វើការស្រាវជ្រាវ និងកំណត់មុខសញ្ញាហើយ ដែលមានការសម្របសម្រួលពីលោក មាស ច័ន្ទពិសិដ្ឋ ព្រះរាជអាជ្ញាអមសាលាដំបូងខេត្តបន្ទាយមានជ័យ បានឃាត់ខ្លួនសង្ស័យម្នាក់ឈ្មោះ គង់ អ៊ី (ហៅអ៊ឹមសែង.M5) ដែលចោទប្រកាន់ប៉ុនប៉ងលក់អចលនទ្រព្យអ្នកដទៃដែលឃាត់ កាលពីថ្ងៃទី២៦ ខែកញ្ញា ឆ្នាំ២០១៨ នៅចំណុចភូមិសូរិយាសង្កាត់និមិត្ត ក្រុងប៉ោយប៉ែត ។
លោកឧត្តសេនីយ៍ត្រី បោន ប៊ិន មេបញ្ជាការកងរាជអាវុធហត្ថខេត្តបន្ទាយមានជ័យបានបញ្ជាក់ថា ក្រោយពេលឃាត់ខ្លួនជនសង្ស័យម្នាក់ដែលចោទប្រកាន់លួចដីគេលក់ ហើយក្រោយពេលសាកសួរតាមចម្លើយ គឺជនសង្ស័យរូបនេះធ្លាប់លួចដីអ្នកដទៃលក់ឲ្យឈ្មួញរកស៊ីលក់ទិញដី ហើយកើតមានទំនាស់ដីធ្លីដោយជនសង្ស័យឈ្មោះ គង់ អ៊ី (ហៅអ៊ឹមសែង.M5) ។
ដោយយោងតាមពាក្យបណ្តឹងជនរងគ្រោះ និងជនសង្ស័យបានសារភាពត្រូវបានកសាងសំណុំរឿងបញ្ជូនទៅសាលាដំបូងខេត្ត ដើម្បីចាត់ការតាមច្បាប់ ៕
ចែករំលែកព័តមាននេះ