ខេត្តសៀមរាប៖ ករណីគ្រោះថ្នាក់ចរាចរណ៍បានកើតឡើង ២ករណីផ្សេងគ្នា ក្នុងថ្ងៃតែមួយ នៅស្រុកជីក្រែង និង ស្រុកពួក ខេត្តសៀមរាប ដែលហេតុការណ៍ទាំង២ករណីនេះមានដូចខាងក្រោម ៖
ករណីទី១-គ្រោះថ្នាក់ចរាចរណ៍រវាងរថយន្តបុកជាមួយកង់ បណ្តាលឱ្យក្មេងប្រុសអាយុ១២ឆ្នាំស្លាប់ ភ្លាមៗ នៅហ្នឹងកន្លែង ហើយរថយន្ត បើកគេចខ្លួនបាត់ ហេតុការណ៍នេះបានកើតឡើងកាលពីវេលាម៉ោង៦និង៣០នាទីយប់ថ្ងៃទី២៦ កញ្ញា លើដងផ្លូវជាតិលេខ៦ ស្ថិតនៅក្នុងភូមិដូន្យរាជ្យ ឃុំគោកធ្លក ក្រោម ស្រុកជីក្រែង ខេត្តសៀមរាប ។
ជនរងគ្រោះដែលស្លាប់ឈ្មោះ វត់ គឹមលាក់ ភេទប្រុស អាយុ១២ឆ្នាំ ទីលំនៅភូមិដូន្យរាជ្យ ឃុំគោកធ្លកក្រោម ស្រុកជីក្រែង ខេត្តសៀមរាប ។
បើតាមប្រភពពីសមត្ថកិច្ចជំនាញខេត្តបានប្រាប់ឱ្យដឹងថា រថយន្តមួយគ្រឿងអ្នកបើកបរដោយបុរសមិនស្គាល់អត្តសញ្ញាណម្នាក់ បានធ្វើដំណើរក្នុងទិសដៅពីកើតទៅលិចបានបុកជាមួយកង់ ពណ៌ខៀវ ដែលជិះដោយក្មេងប្រុសម្នាក់ក្នុងទិសដៅពីត្បូងទៅជើង (ឆ្លងកាត់ថ្នល់) បណ្តាលឱ្យស្លាប់នៅនឹងកន្លែងកើតហេតុ ចំណែកកង់បានរងការខូចខាតទាំងស្រុង។ ក្រោយពេលកើតហេតុ អ្នកបើកបរបានបើករថយន្តគេចខ្លួនបាត់។
មូលហេតុ មកពីអ្នកជិះកង់ឆ្លងកាត់ផ្លូវមិនប្រុងប្រយ័ត្ន។
បច្ចុប្បន្ន កម្លាំងជំនាញនគរបាលស្រុកសហការជាមួយកម្លាំងប៉ុស្តិ៍ ចុះពិនិត្យវាស់វែងកន្លែងកើតហេតុ ហើយតាមស៊ើបអង្កេតស្រាវជ្រាវរករថយន្តបង្កហេតុមកផ្តន្ទាទោស។ ចំណែកសពជនរងគ្រោះត្រូវបានប្រគល់ទៅឱ្យក្រុមគ្រួសារដើម្បីធ្វើបុណ្យតាមប្រពៃណី។
ចំណែកករណីទី២-គ្រោះថ្នាក់ចរាចរណ៍រវាងម៉ូតូបុកជាមួយរ៉ឺម៉កម៉ូតូកង់បី បណ្តាលឱ្យអ្នកជិះម៉ូតូស្លាប់នៅហ្នឹងកន្លែង ហេតុការណ៍នេះបានកើតឡើងកាលពីវេលាម៉ោង៩និង៥០នាទីយប់ថ្ងៃទី២៦ ខែកញ្ញា ស្ថិតនៅចំណុចផ្លូវជាតិលេខ៦ ក្នុងភូមិគោកស្នួល ឃុំខ្នាត ស្រុកពួក ខេត្តសៀមរាប ។
ជនរងគ្រោះដែលស្លាប់ឈ្មោះ ណៃ និច្ច ភេទប្រុស អាយុ៣៨ឆ្នាំ រស់នៅភូមិគោកថ្មី ឃុំពួក ស្រុកពួក ខេត្តសៀមរាប ជាអ្នកបើកបរម៉ូតូម៉ាកនិច ពាក់ស្លាកលេខ សៀមរាប ១R-៣៦៤៣ រីឯអ្នកបើកបរម៉ូតូកង់បី ឈ្មោះ យូ វណ្ណារា ភេទប្រុស អាយុ៤៨ឆ្នាំ មុខរបររត់រ៉ឺម៉កម៉ូតូកង់បី ស្នាក់នៅភូមិគោកត្រាច ឃុំខ្នាត ស្រុកពួក ខេត្តសៀមរាប បានរត់គេចខ្លួនបាត់ បន្សល់ទុករ៉ឺម៉កម៉ូតូកង់បីនៅហ្នឹងកន្លែងកើតហេតុ។
ប្រភពព័ត៌មានបានឱ្យដឹងថា មុនពេលកើតហេតុ ម៉ូតូមួយគ្រឿងម៉ាកនិច ដែលបើកបរដោយបុរសម្នាក់ធ្វើដំណើរក្នុងទិសដៅពីកើតទៅលិចក៏បុករ៉ឺម៉កម៉ូតូកង់បីពីក្រោយ បណ្តាលឱ្យអ្នកបើកបរម៉ូតូស្លាប់ភ្លាមៗនៅនឹងកន្លែងកើតហេតុ រីឯអ្នកបើកបររ៉ឺម៉កម៉ូតូកង់បីបានរត់គេចខ្លួនបាត់ បន្សល់ទុកតែរ៉ឺម៉កម៉ូតូកង់បីនៅកន្លែងកើតហេតុ ។ ចំណែកម៉ូតូនិងរ៉ឺម៉កម៉ូតូកង់បីបានរងការខូចខាតទាំងសងខាង។
មូលហេតុ ៖ គឺអ្នកបើកបរម៉ូតូខ្វះការប្រុងប្រយ័ត្ន។
ក្រោយពេលកើតហេតុ កម្លាំងជំនាញនគរបាលស្រុកបានចុះវាស់វែងកន្លែងកើតហេតុ ហើយដកហូតវត្ថុតាងពាក់ព័ន្ធយកមករក្សាទុកនៅអធិការដ្ឋាននគរបាលស្រុក ដើម្បីរៀបចំកសាងសំណុំរឿងបញ្ជូនទៅការិយាល័យជំនាញ។
បច្ចុប្បន្នសពជនរងគ្រោះត្រូវបានសមត្ថកិច្ចប្រគល់ឱ្យក្រុមគ្រួសារដើម្បីយកទៅធ្វើបុណ្យតាមប្រពៃណី។ រីឯម្ចាស់ រឺម៉ក់កង់បីដែលបានរត់គេចខ្លួនបាត់ កម្លាំងជំនាញកំពុងធ្វើការស្រាវជ្រាវ ដើម្បីនាំខ្លួនមកដោះស្រាយតាមផ្លូវច្បាប់៕
ចែករំលែកព័តមាននេះ