តាមប្រភពពី Oddity Central បានឲ្យដឹងថា ក្មេងស្រីអាយុ៦ឆ្នាំម្នាក់ នៅក្នុងតំបន់ Ningxia ប្រទេសចិន ត្រូវទូលរែកបន្ទុកគ្រួសារមើលថែឪពុកជាជនពិការ ក្រោយពីម្តាយបង្កើតនាងបានរត់ចោលពួកគេ ។
បុរសជាឪពុកឈ្មោះ Tian Haicheng អាយុ៣៨ឆ្នាំ ជួបប្រទះរឿងអាក្រក់បំផុត ដែលធ្វើឱ្យជីវិតរបស់ខ្លួនផ្លាស់ប្តូរទាំងស្រុងកាលពី៤ឆ្នាំមុន។ គាត់ត្រូវជួបនឹងគ្រោះថ្នាក់ចរាចរណ៍បុកគ្នារវាងរថយន្តនិងរថយន្ត ដែលធ្វើឲ្យធ្លាក់ខ្លួនពិការដើរទៅណាមិនរួច។ ដោយសារតែមិនអាចទៅធ្វើការរកលុយទៀតបាន ប្រពន្ធរបស់គាត់ក៏រត់ចោល បន្សល់ទុកកូនស្រីអាយុ៦ឆ្នាំម្នាក់។
ផ្ទុយស្រឡះខុសពីក្មេងអាយុ៦ឆ្នាំដទៃទៀត នាងមិនធ្វើឲ្យឪពុករបស់ខ្លួនពិបាកមើលថែនោះទេ ថែមទាំងមើលថែឪពុកនាងវិញទៀត។ នាងរ៉ាប់រងទាំងអស់នូវរាល់ការងារផ្ទះ ដូចជា បោសសម្អាត ធ្វើម្ហូប និង ថែរក្សាការដេកដើរឈរអង្គុយរបស់ឪពុក ។
ដោយសារតែឃើញកូនរបស់ខ្លួនចេះខ្លាំងពេក Haicheng ក៏ថតនូវរាល់សកម្មភាពប្រចាំថ្ងៃរបស់ពីរនាក់ឪពុកនិងកូនបង្ហោះលើបណ្តាញសង្គម ដែលធ្វើឲ្យមហាជនមិនសរសើរមិនបាន។ គេអាចឃើញ ក្មេងស្រីជាកូន មើលថែឪពុកមិនជិនណាយ ដូចជាលាងរបួស ជួយនាំទៅកៅអីរុញ បញ្ចុកអាហារ អានសៀវភៅឲ្យស្តាប់ និង ជួយគ្រប់ភួយពេលដេក។
Haicheng ថា នឹងធ្វើខ្លួនឲ្យឆាប់ជាឡើងវិញ អាលបានទៅធ្វើការរកស៊ីចិញ្ចឹមកូនស្រីវិញ។ គាត់មិនចង់ឲ្យនាងនៅតែបែបនេះនោះទេ ព្រោះថានេះមិនមែនជាអ្វីដែលក្មេងអាយុ៦ឆ្នាំត្រូវធ្វើ។ នាងគួរតែនៅសាលាខិតខំរៀនសូត្រ បានជារឿងត្រឹមត្រូវ ៕
ចែករំលែកព័តមាននេះ