រាជធានីភ្នំពេញ ៖ អគ្គស្នងការនគបាលជាតិបានស្នើដល់ក្រុមហ៊ុនសន្តិសុខឯកជនសហគ្រាស និងគ្រឹះស្ថានទាំងអស់ពិនិត្យប្រវត្តិរូបឲ្យច្បាស់លាស់ មុននឹងជ្រើសភ្នាក់ងារមកបម្រើការងារ ។
នេះបើតាមប្រធាននាយកដ្ឋានគ្រប់សន្តិសុខឯកជននៃអគ្គស្នងការនគបាលជាតិ ។ យោងតាមគេហទំព័ររបស់អគ្គស្នងការនគបាលជាតិបានស្រង់សំដីលោកឧត្តមសេនីយឯក លឹម សុខារស្មី ប្រធាននាយកដ្ឋានគ្រប់គ្រងសន្ដិសុខឯកជននៃអគ្គស្នងការដ្ឋាននគរបាលជាតិផ្សាយនៅថ្ងៃទី២៧ ខែកញ្ញានេះ លោកបានអំពាវនាវឲ្យក្រុមហ៊ុនសន្ដិសុខឯកជនសហគ្រាស និងគ្រឹះស្ថានទាំងអស់មុននឹងជ្រើសរើសភ្នាក់ងារសន្ដិសុខឲ្យចូលបម្រើការងារត្រូវពិនិត្យប្រវត្តិរូបឲ្យបានច្បាស់លាស់ព្រោះខ្លាចក្រែងរងគ្រោះដោយសារ បុគ្គលិកទៅប្រព្រឹត្តអំពើខុសច្បាប់ជាដើមនោះ ។
ការអំពាវនាវរបស់ប្រធាននាយកដ្ឋានគ្រប់គ្រងសន្ដិសុខឯកជនដែលជាសេនាធិការជូនអគ្គស្នងការនគរបាលជាតិបែបនេះត្រូវបានធ្វើឡើងនៅព្រឹកថ្ងៃទី២៧ ខែកញ្ញា ឆ្នាំ២០១៨នេះ ក្នុងឱកាសអញ្ជើញបើកវគ្គបំប៉នជំនាញភ្នាក់ងារសន្ដិសុខឯកជនលើកទី៧ ក្រោយមានការឯកភាពពីលោកនាយឧត្តមសេនីយសន្ដិបណ្ឌិតនេត សាវឿន អគ្គស្នងការនគរបាលជាតិ ។ លោកលឹម សុខារស្មីបានបញ្ជាក់យ៉ាងដូច្នេះថា«ខ្ញុំសូមអំពាវនាវដល់ក្រុមហ៊ុនផ្ដល់សេវាសន្ដិសុខឯកជនសហគ្រាស និងគ្រឹះស្ថានទាំងអស់ត្រូវពិនិត្យមើលឲ្យបានច្បាស់លាស់ទៅលើសាវតា ប្រវត្តិរូបរបស់បុគ្គលិកម្នាក់ៗមុននឹងសម្រេចចិត្តជ្រើសរើសឲ្យចូលបម្រើការងារព្រោះខ្លាចក្រែងប៉ះចំបុគ្គលិកដែលមានប្រវត្តិមិនល្អ ជាហេតុនាំឲ្យមានគ្រោះថ្នាក់ដល់ក្រុមហ៊ុន»។
បើតាមការបញ្ជាក់របស់លោកប្រធាននាយកដ្ឋានខាងលើ ដោយមានជនខិលខូចមួយចំនួន បានជ្រកក្រោមស្លាកជាសន្ដិសុខឯកជនបានប្រព្រឹត្តបទល្មើសដោយផ្ទាល់ និងសមគំនិតជា មួយឧក្រិដ្ឋជនប្រព្រឹត្តបទល្មើសជាហេតុបង្កឲ្យមានហានិភ័យដល់គោលដៅសំខាន់ៗនិង ងាយរងគ្រោះបំផុតនៅតាមគ្រឹះស្ថានឯកជនដែលមានភ្នាក់ងារសន្ដិសុខឯកជនឈរជើង ទោះបីក្រុមហ៊ុនភាគច្រើនមានការគ្រប់គ្រងបានល្អក្ដី ប៉ុន្ដែក៏ទទួលរងគ្រោះដោយសារបុគ្គលិ កសន្ដិសុខមួយចំនួនផងដែរ ។ ជាមួយគ្នានោះដែរឧត្តមសេនីយឯក លឹម សុខារស្មី ក៏បានគូសបញ្ជាក់ថា នាពេលថ្មីៗនេះនាយកដ្ឋានគ្រប់គ្រងសន្ដិសុខឯកជនបានស្រាវជ្រាវបង្ក្រាបបាននូវភ្នាក់ងារសន្ដិសុខឯកជនចំនួន៨នាក់ដែលប្រើប្រាស់អាវុធខុសច្បាប់ ដោយក្លែងខ្លួនជានគរបាលជាតិ និងយោធិនឈរជើងនៅតាមបណ្ដាធនាគារ និងគ្រឹះស្ថានមួយចំនួន ។
លោកប្រធាននាយកដ្ឋានបានសង្កត់ធ្ងន់បន្ថែមថា«ភ្នាក់ងារសន្ដិសុខឯកជនគ្មានសិទ្ធិប្រើប្រាស់អាវុធជាតិផ្ទុះជាដាច់ខាត ហើយក្រុមហ៊ុនសន្ដិសុខឯកជនផ្ដល់សេវា និងសហគ្រា សគ្រឹះស្ថានមិនអនុញ្ញាតឲ្យប្រើប្រាស់កម្លាំងប្រដាប់អាវុធ(នគរបាល,កងរាជអាវុធហត្ថ,យោធិន) ដែលមិនទាន់ចូលនិវត្តន៍មកឈរជើងតាមគោលដៅរបស់ខ្លួន ដោយគ្មានលិខិតស្នាម ឬគ្មានការអនុញ្ញាតពីអង្គភាពសាមីនោះឡើយ» ។
ក្រៅពីការអំពាវនាវលោកឧត្តមសេនីយឯក លឹម សុខារស្មីក៏បានណែនាំ និងជំរុញឲ្យបណ្ដាក្រុមហ៊ុនសន្ដិសុខឯកជនទាំងអស់គួរតែបញ្ជូនភ្នាក់ងាររបស់ខ្លួនឲ្យមកចូលរួមក្នុងវគ្គបណ្ដុះបណ្ដាលបំប៉នជំនាញភ្នាក់ងារសន្តិសុខឯកជន ដើម្បីឲ្យភ្នាក់ងាររបស់ខ្លួនទទួលបាននូវបទពិសោធន៍ និងចំណេះផ្សេងៗ ដើម្បីបង្កើនសមត្ថកិច្ចបន្ថែមទៀត ៕
ចែករំលែកព័តមាននេះ