រាជធានីភ្នំពេញ ៖ ស្ត្រីម្នាក់ត្រូវបានសមត្ថកិច្ចនគរបាលការិយាល័យកម្រិតក្រសួងមហាផ្ទៃ ចាប់ខ្លួនបញ្ជូនទៅកាន់ សាលាដំបូងរាជធានីភ្នំពេញ កាលពីរសៀលថ្ងៃទី២៦ កញ្ញា លើបណ្តឹងរំលោភទំនុកចិត្ត និងឆបោក ក្នុងទឹកប្រាក់…
រាជធានីភ្នំពេញ ៖ ស្ត្រីម្នាក់ត្រូវបានសមត្ថកិច្ចនគរបាលការិយាល័យកម្រិតក្រសួងមហាផ្ទៃ ចាប់ខ្លួនបញ្ជូនទៅកាន់ សាលាដំបូងរាជធានីភ្នំពេញ កាលពីរសៀលថ្ងៃទី២៦ កញ្ញា លើបណ្តឹងរំលោភទំនុកចិត្ត និងឆបោក ក្នុងទឹកប្រាក់ ប្រមាណជិត២០ ម៉ឺនដុល្លារអាមេរិក។ ស្ត្រីរូបនោះឈ្មោះ យី ពៅ អាយុ៣៩ឆ្នាំ មានទីលំនៅភូមិអំពាំង ឃុំកណ្តៀងរាយ ស្រុកកញ្ជ្រៀច ខេត្តព្រៃវែង មុខរបរធ្វើស្រែ។ ទាក់ទិននឹងការចាប់ឃាត់ខ្លួនស្ត្រីខាងលើនេះ គឺជាការអនុវត្តតាមដីកាបញ្ជាឱ្យចូលខ្លួន របស់លោក លី សុផាណា ព្រះរាជអាជ្ញារង នៃ អយ្យការអមសាលាដំបូង រាជធានីភ្នំពេញ ដែលការឃាត់នោះបានធ្វើឡើងនៅសង្កាត់កន្ទោក ខណ្ឌពោធិសែនជ័យ ខណៈស្ត្រី យី ពៅ បានមកចូលរួមពិធីមង្គលការសាច់ញាតិ។
សមត្ថកិច្ចឱ្យដឹងទៀតថា ដើមចមបណ្តាលឱ្យមានការឃាត់ខ្លួនស្ត្រី ឈ្មោះ យី ពៅ នេះគឺយោងតាមពាក្យបណ្តឹងរបស់ឈ្មោះ ហួន សីហាក់ ភេទប្រុស អាយុ២៨ឆ្នាំ មានទីលំនៅភូមិព្រៃបឹង ឃុំកន្ទោក ខណ្ឌពោធិសែនជ័យ រាជធានីភ្នំពេញ មុខរបរអ្នករកស៊ី។ តាមពាក្យបណ្តឹងបានបញ្ជក់ថា កាលពីអំឡុងឆ្នាំ២០១៧ ឈ្មោះ យី ពៅ បានទៅបញ្ចុះបញ្ចូលលួងលោមខ្លួន (ហួន សីហាក់) រកប្រាក់ថា យកទិញខ្សែពាន និងគ្រឿងបន្លាស់ម៉ាស៊ីនភ្លើង ដើម្បីលក់ឱ្យកសិករធ្វើស្រែចម្ការ។ ដំបូង យី ពៅ បានយកប្រាក់ពីគាត់ (ហួន សីហាក់) ចំនួន ១២០.០០០ដុល្លារអាមេរិក និងបន្ទាប់មកទៀតឈ្មោះ យី ពៅ បានប្រើល្បិចធ្វើជាលក់ដីចំនួន៥កន្លែង ស្ថិតនៅភូមិស្រែញរ សង្កាត់ពងទឹក ខណ្ឌពោធិសែនជ័យ រាជធានីភ្នំពេញ ដែលមានក្បាលដីលេខ ១៣៧.១៣៨.១៣៩.១៤០ និង៤៦៤ ឲ្យទៅឈ្មោះ ហេង រតនៈ។
ក្នុងលិខិតទិញលក់ឈ្មោះ យី ពៅ បានបានបញ្ជាក់ថា ក្រោយពីផ្ទេរកម្មសិទ្ធិឲ្យទៅឈ្មោះ ហេង រតនៈ រួចហើយ គេ (យី ពៅ) បានប្រគល់ប្រាក់គ្រប់ចំនួន(១២០.០០០ដុល្លារអាមេរិក) ឲ្យទៅឈ្មោះ ហួន សីហាក់ ដែលជាដើមបណ្តឹងវិញ។ ដើម្បីឲ្យដើមបណ្តឹងជឿទុកចិត្ត ឈ្មោះ យី ពៅ បានយកលិខិតទិញលក់នោះទៅបង្ហាញ ដើមបណ្តឹង និងប្រគល់ឲ្យដើមបណ្តឹងជាអ្នករត់ការ ផ្ទេរកម្មសិទ្ធិទៅឲ្យអ្នកទិញដីនោះទៀតផង។ បន្ទាប់មកដើមបណ្តឹងបានយកលិខិតទិញលក់ដី ទៅបញ្ជាក់នៅចៅសង្កាត់ ទើបដឹងថាឈ្មោះ យី ពៅ ពុំមានដីដូចដែលគាត់បានអះអាងនោះទេ ពោលគឺ យី ពៅ លក់ដីខ្យល់ និង មានគំនិតទុច្ចរិតក្នុងគោលបំណងឆបោកប្រាក់ ពីដើមបណ្តឹងតែប៉ុណ្ណោះ។
ចំណែកឈ្មោះ ហេង រតនៈ ក៏ចាញ់បោកស្ត្រីឈ្មោះ យី ពៅ ចំនួន ៦២.០០០ដុល្លារអាមេរិកដែរ ដែលប្រាក់នេះបានយកទៅកក់ថ្លៃទិញដីខ្យល់ពី យី ពៅ។ សំណុំរឿងនេះត្រូវបានលោក លី សុផាណា ព្រះរាជអាជ្ញារងចាត់ការហើយ គឺបានចោទប្រកាន់អ្នកស្រី យី ពៅ ជាផ្លូវការណ៍ និងបានចាត់បញ្ជូនទៅចៅក្រមស៊ើបសួរ គឺស្ថិតនៅដៃលោក ពេជ្រ វិជ្ជាធរ ដែលនារសៀលថ្ងៃទី២៧ កញ្ញា នេះ ខាងចៅក្រមសាកសួរមិនទាន់ចប់ទេ និងបានផ្ញើទៅសមត្ថកិច្ចវិញ តម្រូវឲ្យព្រឹកថ្ងៃទី២៨ នាំជនដែលត្រូវចោទយកមកសួរបន្ត ដើម្បីសម្រេចឃុំខ្លួន ឬមិនឃុំខ្លួន ពេលនេះជាឆន្ទានុសិទ្ធិរបស់លោកចៅក្រម ៕
ចែករំលែកព័តមាននេះ