ខេត្តប៉ៃលិន ៖ មន្ត្រីរាជការដែលមកពីមន្ទីរជុំវិញខេត្ត និងប្រជាពលរដ្ឋជាច្រើននាក់មានការ សប្បាយរីករាយយ៉ាងខ្លាំងក្នុងការចូលរួមអបអរសាទរចំពោះមុខតំណែងមិត្តភក្តិរបស់ខ្លួន ដែលកំពុងទទួលបាននូវការប្រកាសតែងតាំងពីលោកអភិបាលខេត្តប៉ៃលិន កាលពីវេលាម៉ោង៣និង៣០នាទីរសៀលថ្ងៃទី២៦ ខែកញ្ញា ឆ្នាំ២០១៨ នៅក្នុងសាលប្រជុំសាលាខេត្ត…
ខេត្តប៉ៃលិន ៖ មន្ត្រីរាជការដែលមកពីមន្ទីរជុំវិញខេត្ត និងប្រជាពលរដ្ឋជាច្រើននាក់មានការ សប្បាយរីករាយយ៉ាងខ្លាំងក្នុងការចូលរួមអបអរសាទរចំពោះមុខតំណែងមិត្តភក្តិរបស់ខ្លួន ដែលកំពុងទទួលបាននូវការប្រកាសតែងតាំងពីលោកអភិបាលខេត្តប៉ៃលិន កាលពីវេលាម៉ោង៣និង៣០នាទីរសៀលថ្ងៃទី២៦ ខែកញ្ញា ឆ្នាំ២០១៨ នៅក្នុងសាលប្រជុំសាលាខេត្ត ។
ចំណែកសាម៉ីខ្លួនជាច្រើននាក់ក៏មានទឹកមុខរីកដូចគ្រាប់ជីរដោយញញឹមញញែមបិទមាត់មិនជិត ព្រោះទទួលបានមុខតំណែងថ្មីជាទីគាប់ចិត្ត ។ តែក៏មានអ្នកខ្លះតូចចិត្តស្អិតទ្រូងដោយមានការអាក់អន់ស្រពន់ចិត្តយ៉ាងខ្លាំង ខណៈកំពុងធ្វើការសុខៗក្នុងការិយាល័យនៃមន្ទីររបស់ខ្លួន ស្រាប់តែត្រូវបានគេប្តូរតំណែង ។
សូមបញ្ជាក់ផងដែរថា ការប្រកាសតែងតាំងមន្ត្រីរាជការមកពី៤មន្ទីរ គឺទី១- មន្ទីរសុខាភិបាលខេត្ត ទី២- មន្ទីររៀបចំដែនដីនគរូបនីយកម្ម សំណង់ និងសុរិយោដីខេត្ត ទី៣- មន្ទីរមុខងារសាធារណៈ និងទី៤- មន្ទីរកសិកម្ម រុក្ខប្រមាញ់ និងនេសាទខេត្ត ។
បន្ទាប់ពីលោក អ៊ុន ប៊ុនលី នាយករដ្ឋបាលសាលាខេត្តប៉ៃលិនបានធ្វើការអានរបាយការណ៍ស្តីពីការប្រកាសតែងតាំងមន្ត្រីរាជការរួចមកឯកឧត្តម ផាន់ ចាន់ធុល អភិបាលខេត្តប៉ៃលិនបានថ្លែងឱ្យដឹងថា មុននឹងធ្វើការប្រកាសតែងតាំងមន្ត្រីរាជការណាម្នាក់ឱ្យឡើងទៅកាន់មុខតំណែងថ្មី គឺខាងគណៈអភិបាលខេត្តប៉ៃលិនទាំងអស់តែងតែមានការប្រជុំគ្នារួចរាល់ជាមុនហើយទើបមានការសម្រេចដក ឬដាក់ឱ្យត្រូវនឹងកន្លែងការងាររបស់ខ្លួន ។
ឯកឧត្តមបន្តទៀតថា នៅក្នុងខេត្តប៉ៃលិនមន្ត្រីរាជការនៅតាមមន្ទីរមួយចំនួនអត់មានសញ្ញាបត្រថ្នាក់ទី១២នោះទេ តែទោះបីជាយ៉ាងណាក៏ដោយខាងខេត្តខិតខំប្រឹងប្រែងពុះពារជួយគ្នា ដើម្បីឱ្យទទួលបានជោគជ័យ និងទទួលប្រាក់ខែសម្រាប់ចិញ្ចឹមជីវិតប្រចាំថ្ងៃ ។ ម្យ៉ាងវិញទៀតនៅឆ្នាំ២០១៨នេះមានច្បាប់ចេញដោយថ្នាក់លើ គឺដោយបានប្រគល់ភារកិច្ចតួនាទីឱ្យថ្នាក់ក្រោមជាតិជាអ្នកសម្រេចនូវរាល់ការប្រកាសតែងតាំងមន្ត្រីរាជការមួយចំនួននៅតាមមន្ទីរនានាក្នុងខេត្តផ្ទាល់តែម្តង ៕
ចែករំលែកព័តមាននេះ