រាជធានីភ្នំពេញ ៖ បុរសជនជាតិស្បែកខ្មៅជាជនជាតិនីហ្សេរីយ៉ាមួយសំបុកធំមានគ្នាប្រមាណចំនួន១១នាក់ត្រូវបានកម្លាំងនគរបាលខណ្ឌចំការមនចាប់បញ្ជូនយកទៅប្រគល់អោយនគរបាលនៃការិយាល័យស៊ើបអង្កេត និងអនុវត្តន៍នីតិវិធីរាជធានីភ្នំពេញ ក្រោយពីពួកគេមានជម្លោះបង្កជាហិង្សាបណ្តាលម្នាក់រងរបួសដៃនៅក្នុងហាងមួយកន្លែងនៅខាងក្រោយផ្សារសុវណ្ណារួចមកនោះ ។
ហេតុការណ៍នេះដែរបានបង្កការភ្ញាក់ផ្អើលកើតឡើងនៅវេលាម៉ោង៤និង១៥នាទីល្ងាច ថ្ងៃទី២៦ ខែកញ្ញា ឆ្នាំ២០១៨ នៅចំណុចភោជនីយ៍ដ្ឋាន អូប៊ីអេហ្សេ ផ្ទះលេខ T-៣៤ ផ្លូវតូប៉ាស់ (ក្រោយផ្សារសុវណ្ណា) ក្នុងសង្កាត់ទំនប់ទឹក ខណ្ឌចំការមន ។
តាមប្រភពព័ត៌មានពីនគរបាលបានប្រាប់ឱ្យដឹងថា មុនពេលកើតហេតុក្រុមបុរសជនជាតិស្បែកខ្មៅជាជនជាតិនីហ្សេរីយ៉ាទាំង១១នាក់ក្នុងនោះមានស្ត្រីជនជាតិខ្មែរជាប្រពន្ធចំនួន៤ ទៅ៥នាក់ផងដែរ នាំគ្នាចូលទៅហូបអី និងជួបជុំគ្នានៅក្នុងហាងដែលមានយីហោ «អូប៊ីអេហ្សេ» ខាងលើ ។
លុះបន្តិចក្រោយមកក៏ស្រាប់តែមានក្រុមជនជាតិស្បែកខ្មៅចំនួន៣នាក់ដោយម្ខាងមានគ្នាម្នាក់ និងម្ខាងទៀតមានគ្នា២នាក់បានឈ្លោះប្រកែកគ្នា និងឈានទៅដល់ការវាយតប់គ្នានៅខាងក្នុងហាងបង្កអោយមានការភ្ញាក់ផ្អើលកើតឡើងតែម្តង ។
តាមប្រភពដដែលបានប្រាប់បន្តទៀតថា ក្រោយពេលកើតហេតុភ្លាមៗនោះកម្លាំងមានសម្ថកិច្ចខណ្ឌចំការមនជាច្រើននាក់បានចុះទៅដល់កន្លែងកើតហេតុដោយបានឃើញបុរសជនជាតិស្បែកខ្មៅម្នាក់មានស្នាមរបួសត្រង់បាតដៃម្ខាងហូរឈាមកក្លាក់ផងដែរ ។
ភ្លាមនោះក៏បានធ្វើការចាប់ឃាត់ខ្លួនពួកគេយកទៅកាន់នគរបាលប៉ុស្តិ៍ទំនប់ទឹកដើម្បីធ្វើការសាកសួរទើបដឹងថា «ពួកគេឈ្លោះគ្នា ដោយសារតែការនិយាយដើមគ្នា» ទើបបង្កជាជម្លោះ និងប្រើកាំបិតវាយតប់គ្នាបង្កជារបួសស្នាមបែបនេះ ។
ក្រោយពេលដែលកម្លាំងមានសម្ថកិច្ចចាប់ឃាត់ខ្លួនបុរសជនជាតិនីហ្សេរីយ៉ាទាំង១១នាក់ដែលសុទ្ធតែមានប្រពន្ធខ្មែរ និងមានកូនតូចតាចផងដែរនោះយកមកធ្វើការសាកសួរមិនឃើញមានឯកសារអ្វីគ្រប់គ្រាន់ក្នុងការចូលមករស់នៅក្នុងប្រទេសកម្ពុជារបស់យើងនោះ ទើបសម្រេចបញ្ជូនពួកគេបន្តទៅប្រគល់ឱ្យនគរបាលការិយាល័យស៊ើបអង្កេត និងអនុវត្តនីតិវិធីចាត់ការទៅតាមនីតិវិធីជាបន្តទៅទៀត ៕
ចែករំលែកព័តមាននេះ