ខេត្តកំពត ៖ រថយន្តឡិចស៊ីសRX៣៣០ របស់លោកវេជ្ជបណ្ឌិត ពេជ្រ ប៊ុនហាប់ ត្រូវបានរថយន្តក្រឡុងសុីម៉ង់ត៍ បុកដាច់កង់ផ្នែកខាងឆ្វេងម្ខាង និងធ្វើឲ្យឆាបឆេះសន្ធោសន្ធៅកាលពីវេលាម៉ោង២១ថ្ងៃទី២២ ខែកញ្ញា នៅលើកំណាត់ផ្លូវជាតិលេខ៣១ ចំណុចភូមិព្រៃផ្ដៅ ឃុំភ្នំកុង ស្រុកអង្គរជ័យ ។
អ្នករស់នៅក្បែរកន្លែងកើតហេតុបាននិយាយថា រថយន្តឡិចស៊ីសRX៣៣០នេះ ជិះតែលោកវេជ្ជបណ្ឌិតម្នាក់ឯងទេ គឺត្រឡប់មកពីចូលរួមខួបកំណើតក្រុមសាច់ញាតិ នៅស្រុកអង្គរជ័យ ។ បន្ទាប់ពីចូលរួមកម្មវិធីចប់ លោកវេជ្ជបណ្ឌិតរូបនោះ បានបើករថយន្តតែម្នាក់ឯងត្រឡប់មកផ្ទះនៅផ្សារទូកមាសវិញ តែជាអកុសល រថយន្តរបស់លោកត្រូវបានរថយន្តក្រឡុកសុីម៉ង់ត៍ បើកមកពីត្បូងទៅជើង បុកបណ្ដាលឲ្យដាច់កង់មុខខាងឆ្វេង និងឆាបឆេះទាំងលោកវេជ្ជបណ្ឌិត ដែលជាអ្នកបើកបរនៅក្នុងរថយន្ត ។
ភ្លាមៗ លោកវេជ្ជបណ្ឌិតត្រូវបានអ្នកភូមិជាច្រើននាក់ ស្ទុះមកជួយដោយវាយទម្លុះកញ្ជក់រថយន្ត យកមនុស្សចេញផុតពីសេចក្តីស្លាប់ ។ ទោះជាបែបនេះក្តី លោកវេជ្ជបណ្ឌិតបានរងរបួសរលាកខ្លួនប្រាណ ត្រូវបានក្រុមគ្រួសារបញ្ជូនទៅព្យាបាលនៅប្រទេសថៃ ។ ចំណែករថយន្តរបស់លោកវេជ្ជបណ្ឌិត ត្រូវឆេះសល់តែដែកទៅហើយ ។
លោក ទូច ចន្ធូ អធិការរងទទួលផែនសណ្ដាប់ធ្នាប់ចរាចរណ៍ស្រុកអង្គរជ័យនិយាយថា រថយន្តក្រឡុកស៊ីម៉ង់ត៍ ដែលបង្កគ្រោះអកុសលត្រូវចាប់បានហើយ ។ លោកវេជ្ជបណ្ឌិត ពេជ្រ ប៊ុនហាប់ ត្រូវគេស្គាល់ច្បាស់ថា ជាម្ចាស់គ្លីនិកយីហោ«សុខ សាន្ត»នៅផ្សារទូកមាស ។ តាមប្រជាពលរដ្ឋថា ពួកគាត់មានជំនឿលើការព្យាបាលជំងឺរបស់លោកវេជ្ជបណ្ឌិតរូបនេះ ហើយព័ត៌មានពីការរងគ្រោះនេះ បានធ្វើឲ្យគ្រប់គ្នាមានការរន្ធត់ចិត្តជាពន់ពេក ៕
ចែករំលែកព័តមាននេះ