រាជធានីភ្នំពេញ ៖ សេចក្តីរាយការណ៍ឱ្យដឹងថា រថយន្តបែនដឹកដីរបស់ក្រុមហ៊ុន «ទ្រី ស៊ូម៉ី » នទតគ្រឿងបានបើកបោះពួយក្នុងល្បឿនលឿន លុះមកដល់ចំណុចផ្លូវខ្វែងជ្រុលទៅបុកអ្នកជិះម៉ូតូ២នាក់ បណ្ដាលឱ្យស្លាប់ម្នាក់ភ្លាមៗនៅនឹងកន្លែង និងម្នាក់ទៀត របួសស្រាល កើតឡើងកាលពីវេលាម៉ោង០៨ និង៣០នាទីព្រឹកថ្ងៃទី២៧ កញ្ញា ស្ថិតនៅលើកំណាត់ផ្លូវបេតុង ក្នុងភូមិអង្គ សង្កាត់ប្រទះឡាង ខណ្ឌដង្កោ រាជធានីភ្នំពេញ។
សេចក្តីរាយការណ៍បន្តថា ជនររងគ្រោះដែលស្លាប់ឈ្មោះ ឃុយ ខាវី អាយុ៣៣ឆ្នាំ ជាកម្មកររោងចក្រ និងបុរសម្នាក់ទៀតរបួសស្រាល ឈ្មោះ វ៉ន វាសនា អាយុ៣២ឆ្នាំ ជាកម្មកររោងចក្រដូចគ្នា ទាំង២នាក់ជិះម៉ូតូគ្រឿងម៉ាកហុងដាវ៉េវ ពណ៌ក្រហម ពាក់ស្លាកលេខភ្នំពេញ1T-2124 និងស្នាក់នៅក្នុងភូមិកើតហេតុជាមួយគ្នា ។ ដោយឡែក ខាងរថយន្តបែន ម៉ាកHYUNDAI ពណ៌.ស ពាក់ស្លាកលេខភ្នំពេញ 3D-1611 (ជារថយន្តដឹកដីរបស់ក្រុមហ៊ុនទ្រី ស៊ូម៉ី) ។
ប្រភពបន្តថា នៅមុនពេលកើតហេតុ ពួកគាត់ឃើញជនរងគ្រោះទាំង២នាក់ជិះម៉ូតូឌុបគ្នាធ្វើដំណើរក្នុងទិសដៅពីទិសដៅពីត្បួងទៅជើង ។ លុះជិះទៅដល់ត្រង់ចំណុចកើតហេតុដែលជាចំណុចផ្លូវខ្វែង ស្រាប់តែមានរថយន្ដដឹកដីមួយគ្រឿងនេះ បើកក្នុងទិសដៅពីលិចទៅកើតក្នុងល្បឿនលឿន ទៅដល់បុកពេញទំហឹង បណ្ដាលឱ្យអ្នកឌុបស្លាប់ភ្លាមៗ និងអ្នកជិះខាងក្រោយរងរបួសស្រាល ។
បន្ទាប់មក ខាងរថយន្តបង្កបានបើកគេចចូលការដ្ឋានរណ្ដៅបាត់ស្រមោល ហើយភ្លាមៗនោះកម្លាំងនគរបាលខណ្ឌដង្កោ បានចុះទៅពិនិត្យជាក់ស្ដែង និងបានប្រគល់ករណីមួយនេះទៅឲ្យការិយាល័យនគរបាលចរាចរណ៍ផ្លូវគោក នៃស្នងការដ្ឋាននគរបាលរាជធានីភ្នំពេញ ដើម្បីស្រាវជ្រាវរកអ្នកបើករថយន្តបង្កនេះ ។
ចែករំលែកព័តមាននេះ